ସରକାରୀ ଶାରୀରିକ ଶିକ୍ଷା ମହାବିଦ୍ୟାଳୟରେ କ୍ରୀଡ଼ା ଛାତ୍ରାବାସ ଶିକ୍ଷାର୍ଥୀଙ୍କ ପାଇଁ ୧୫% ସଂରକ୍ଷଣ
ଭୁବନେଶ୍ବର : କ୍ରୀଡ଼ା ଓ ଯୁବ ସେବା ବିଭାଗ ଅଧୀନରେ ଭୁବନେଶ୍ବର ଏବଂ କୁଲୁଣ୍ଡି (ସମ୍ବଲପୁର)ଠାରେ ଅବସ୍ଥିତ ସରକାରୀ ଶାରୀରିକ ଶିକ୍ଷା ମହାବିଦ୍ୟାଳୟରେ ନାମଲେଖା ନିମନ୍ତେ କ୍ରୀଡ଼ା ଛାତ୍ରାବାସରୁ ପାସ୍ କରୁଥିବା ଛାତ୍ରଛାତ୍ରୀଙ୍କ ପାଇଁ୧୫% ଆସନ ସଂରକ୍ଷିତ ରଖାଯିବ। ଉକ୍ତ ସଂରକ୍ଷଣ ବ୍ୟବସ୍ଥା ବିଭିନ୍ନ ବର୍ଗଙ୍କ ନିମନ୍ତେ ପୂର୍ବରୁ ନିର୍ଦ୍ଧାରିତ ଥିବା ସଂରକ୍ଷଣ ମାତ୍ରା (୫୦%) ମଧ୍ୟରେ ଅନ୍ତର୍ଭୁକ୍ତ ରହିବ। ଏହାବାଦ୍ ସରକାରୀ ଶିକ୍ଷା ମହାବିଦ୍ୟାଳୟର ଚୟନ ପ୍ରକ୍ରିୟାରେ କ୍ରୀଡ଼ା ଛାତ୍ରାବାସର ଶିକ୍ଷାର୍ଥୀଙ୍କ ନିମନ୍ତେ ୫% ନମ୍ବର କୋହଳ କରାଯିବ। ଏନେଇ କ୍ରୀଡ଼ା ଓ ଯୁବସେବା ବିଭାଗର ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ଆଜି ଅନୁମୋଦନ କରିଛି।
Sambad is now on WhatsApp
Join and get latest news updates delivered to you via WhatsApp
ଜାତୀୟସ୍ତରରେ ହେଉଥିବା କ୍ରୀଡ଼ା ପ୍ରତିଯୋଗିତାଗୁଡ଼ିକରେ ତୀବ୍ର ପ୍ରତିଯୋଗିତା ହେତୁ ସମସ୍ତ କ୍ରୀଡ଼ା ଛାତ୍ରାବାସର ଶିକ୍ଷାର୍ଥୀମାନଙ୍କ ନିମନ୍ତେ ପଦକ ଜିତିବା ଓ ଏହାକୁ ନେଇ ଭବିଷ୍ୟତରେ ଉପଯୁକ୍ତ ଚାକିରି ପାଇବା ସମ୍ଭବ ନୁହେଁ। ତେଣୁ କ୍ରୀଡ଼ା ଛାତ୍ରାବାସର ଶିକ୍ଷାର୍ଥୀମାନଙ୍କୁ ଶାରୀରିକ ଶିକ୍ଷାରେ ବୃତ୍ତି କରିବା ନିମନ୍ତେ ଏହି ବ୍ୟବସ୍ଥା ଲାଭଦାୟକ ହେବ ବୋଲି କୁହାଯାଇଛି।