୧୫ ଲକ୍ଷ ଟଙ୍କା, ୩ ଭରି ସୁନା ଚୋରି

ଘଟଗାଁ: ଘଟଗାଁ ବ୍ଲକ୍‌ ରୁଟିଶିଳା ପଞ୍ଚାୟତ ସାରୁପାଟ ଗ୍ରାମର ନରେନ୍ଦ୍ର ମହାନ୍ତଙ୍କ ଘରୁ ୧୫ ଲକ୍ଷ ଟଙ୍କା ଏବଂ ତିନିଭରି ସୁନା ଅଳଙ୍କାର ଚୋରି ହୋଇଛି। ପ୍ରାପ୍ତ ସୂଚନା ଅନୁସାରେ, ଶ୍ରୀ ମହାନ୍ତ ଧାନ ରହୁଥିବା ଘରେ ଏକ ଟିଣଡବାରେ ପୂରାଇ ୧୫ ଲକ୍ଷ ଟଙ୍କା ରଖିଥିଲେ।

ଏହାଛଡ଼ା ଉକ୍ତ ଘରେ ସୁନାଗହଣା ଏବଂ ଏକ ଭ୍ୟାନିଟି ବ୍ୟାଗ୍‌ରେ ୩୫ ହଜାର ଟଙ୍କା ଥିଲା। ସକାଳୁ ଶ୍ରୀ ମହାନ୍ତଙ୍କ ସ୍ତ୍ରୀ ଗୁହାଳଘରକୁ ଗଲାବେଳକୁ ଧାନ ରହୁଥିବା ଘର ଖୋଲାଥିବା ଦେଖିବାକୁ ପାଇଥିଲେ। ଟିଣଡବା ଏବଂ ଭ୍ୟାନିଟରେ ଟଙ୍କା ନଥିବା ଦେଖିବାକୁ ପାଇଥିଲେ। ଏହାଛଡ଼ା ଦୁର୍ବୃତ୍ତମାନେ ହଳେ କାନଫୁଲ, ଗୋଟିଏ ମୁଦି, ଗୋଟିଏ ନାକଫୁଲ, ଗୋଟିଏ ସୁନା ଲକେଟ୍‌ ଏବଂ ଗୋଟିଏ ରୁପା ଲକେଟ୍‌ ସମେତ ବହୁ ସୁନାଗହଣା ଚୋରି କରିନେଇଛନ୍ତି। ଏନେଇ ଶ୍ରୀ ମହାନ୍ତ ଘଟଗାଁ ଥାନାରେ ଅଭିଯୋଗ କରିବା ପରେ ପୁଲିସ ଘଟଣାର ତଦନ୍ତ ଆରମ୍ଭ କରିଛି।