ଅଶ୍ବିନୀ କୋଭିଡ୍ ହସ୍ପିଟାଲରେ ଭର୍ତ୍ତି ହେଲେ ପୁଣି ୩ ଆକ୍ରାନ୍ତ, ସଂଖ୍ୟା ୧୯ ଛୁଇଁଲା
କଟକ: କଟକ ଅଶ୍ୱନୀ କୋଭିଡ୍ -୧୯ ହସ୍ପିଟାଲରେ ଆଜି ଭର୍ତ୍ତି ହୋଇଛନ୍ତି ୩ କରୋନା ଆକ୍ରାନ୍ତ। ସନ୍ଧ୍ୟାରେ କଳାହାଣ୍ଡିର ବିଦେଶ ଫେରନ୍ତା ଯୁବକଙ୍କୁ ଭର୍ତ୍ତି କରାଯାଇଛି। ଅନ୍ୟପଟେ ରବିବାର ଭୁବନେଶ୍ୱରରୁ ଚିହ୍ନଟ ହୋଇଥିବା ବମିଖାଲ ଓ କପିଳ ପ୍ରସାଦ ହାଉସିଂ କଲୋନୀର ୭୦ବର୍ଷର ବୃଦ୍ଧଙ୍କୁ ମଧ୍ୟ ରାତି ୭ଟାରେ ଭର୍ତ୍ତି କରାଯାଇଛି। ତେବେ ଅଶ୍ୱନୀ କୋଭିଡ଼- ୧୯ ହସ୍ପିଟାଲରେ ଚିକିତ୍ସିତ ହେଉଥିବା ସମସ୍ତ ଆକ୍ରାନ୍ତଙ୍କ ଅବସ୍ଥା ଭଲ ରହିଛି ଓ ସମସ୍ତଙ୍କୁ ସ୍ୱତନ୍ତ୍ର ଭାବେ ଅଲଗା କେବିନରେ ରଖାଯାଇଛି।
Sambad is now on WhatsApp
Join and get latest news updates delivered to you via WhatsApp
ରାଜ୍ୟରେ ବର୍ତ୍ତମାନ ସୁଦ୍ଧା ୩୯ଜଣ କରୋନା ରୋଗୀ ଚିହ୍ନଟ ହୋଇଛନ୍ତି। ସେଥିରୁ ୨ଜଣ ସୁସ୍ଥ ହୋଇ ଘରକୁ ଫେରିଥିବାବେଳେ ୩୭ଜଣ ଆକ୍ରାନ୍ତ ଚିକିତ୍ସିତ ହେଉଛନ୍ତି। ସେଥିରୁ ୨ଜଣ କ୍ୟାପିଟାଲ ହସ୍ପିଟାଲ ଓ ବାକି ୧୯ଜଣ କଟକ ଅଶ୍ୱନୀ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଆକ୍ରାନ୍ତଙ୍କ ମଧ୍ୟରେ ଭୁବନେଶ୍ୱରର ସର୍ବାଧିକ ୩୨ଜଣ, ଭଦ୍ରକର ୩, କଟକ, ଯାଜପୁର, ପୁରୀ ଓ କଳାହାଣ୍ଡିରୁ ଜଣେ ଲେଖାଏ ରହିଛନ୍ତି। କଟକ ଜିଲ୍ଲା ପ୍ରଶାସନ ପକ୍ଷରୁ ଉପଜିଲ୍ଲାପାଳ ତଥା ନୋଡାଲ ଅଫିସର ଶୁଭ୍ରାଂଶୁ ମିଶ୍ର ଅଶ୍ୱନୀ କୋଭିଡ଼ ହସ୍ପିଟାଲରେ ପହଁଚି ଚିକିତ୍ସା ବ୍ୟବସ୍ଥା ସମ୍ପର୍କରେ ଆଲୋଚନା କରିଛନ୍ତି। ସୂଚନା ଅନୁସାରେ, ବର୍ତ୍ତମାନ କଟକରେ ନିର୍ମିତ ୧୫୦ ଶଯ୍ୟା ଓ ୩୫ ଆଇସିୟୁ ବିଶିଷ୍ଟ କୋଭିଡ୍ ହସ୍ପିଟାଲରେ ସ୍ୱତନ୍ତ୍ର ଡାକ୍ତରୀ ଦଳ ଓ ପରାମେଡିକାଲ ଷ୍ଟେଫ ଚିକିତ୍ସା ସେବାରେ ଲାଗିଥିବା ଜଣାପଡିଛି। କିନ୍ତୁ ଏସ୍ ସିବିରୁ କୌଣସି ଡାକ୍ତରୀ ଦଳ ଅନୁଧ୍ୟାନ ପାଇଁ ଯାଇନଥିବା ଏସ୍ ସିବି ପକ୍ଷରୁ ଜଣାପଡିଛି।