ପୁରୀ ସମୁଦ୍ରରେ ବୁଡ଼ି ଯାଉଥିବା ବେଳେ ୧୯ବର୍ଷୀୟ ଯୁବକଙ୍କ ଜୀବନ ବଞ୍ଚାଇଲେ ଉଦ୍ଧାରକାରୀ ଦଳ, ଭିଡିଓରେ କଏଦ୍ ହେଲା ଦୃଶ୍ୟ
ପୁରୀ : ବିଭିନ୍ନ ଦର୍ଶନୀୟସ୍ଥାନମାନଙ୍କରେ ଥିବା ଉଦ୍ଧାରକାରୀ ଟିମ୍ ନିଜର ଦାୟିତ୍ୱ ଠିକ୍ ଭାବରେ ତୁଲାନ୍ତି ନାହିଁ ବୋଲି ଅନେକ ସମୟରେ ଅଭିଯୋଗ ହୋଇଥାଏ । କିନ୍ତୁ ପୁରୀ ସମୁଦ୍ର କୂଳରେ ମୁତୟନ ଥିବା ୩ଜଣ ଉଦ୍ଧାରକାରୀ ଗାର୍ଡ ଏହାକୁ ଭୁଲ ପ୍ରମାଣିକ କରିଛନ୍ତି । ୩ଜଣ ଉଦ୍ଧାରକାରୀ ଗାର୍ଡଙ୍କ ପାଇଁ ଏକ ବଡ଼ ଦୁର୍ଘଟଣାରୁ ବର୍ତ୍ତି ଯାଇଛନ୍ତି ୧୯ବର୍ଷୀୟ ଯୁବକ । ପୁରୀ ସମୁଦ୍ରକୁ ନିଜ ସାଙ୍ଗମାନଙ୍କ ସହ ଗାଧୋଉଥିବା ବେଳେ ହଠାତ ବଡ଼ ଢ଼େଉ ଆସିବାରୁ ଯୁବକ ସମୁଦ୍ର ମଧ୍ୟକୁ ଟାଣି ହୋଇ ଯାଇଥିଲେ । ତାଙ୍କୁ ବୁଡ଼ି ଯାଉଥିବା ଦେଖି ଡିୟୁଟିରେ ଥିବା ଉଦ୍ଧାରକାରୀ ଟିମ୍ ତୁରନ୍ତ ସମୁଦ୍ର ଭିତରକୁ ଯାଇ ଯୁବକଙ୍କ ଜୀବନ ବଞ୍ଚାଇଥିଲେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଜଣେ ପର୍ଯ୍ୟଟକ ଏହି ଦୃଶ୍ୟକୁ ରେକର୍ଡ କରିଥିବା ବେଳେ କିଭଳି ଉଦ୍ଧାରକାରୀ ଟିମ୍ ଯୁବକଙ୍କୁ ରକ୍ଷା କରିଥିଲେ, ତାହା ସ୍ପଷ୍ଟ ଜଣା ପଡ଼ୁଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗତକାଲି ଭୁବନେଶ୍ୱରର ଶିଖରଚଣ୍ଡିରେ ରହୁଥିବା ୧୯ବର୍ଷୀୟ ରାଜା ସାହୁ ନିଜ ସାଙ୍ଗମାନଙ୍କ ସହ ପୁରୀ ବୁଲିବାକୁ ଯାଇଥିଲେ । ସମୁଦ୍ରରେ ଗାଧୋଉଥିବା ସମୟରେ ବଡ଼ ଢ଼େଉ ଆସି ତାଙ୍କୁ ଭିତରକୁ ଟାଣି ନେଇଥିଲା । ଏହି ସମୟରେ ସେଠାରେ ଉପସ୍ଥିତ ଥିବା ୩ଜଣ ଉଦ୍ଧାରକାରୀ ଗାର୍ଡ ଲଲିତ ବେହେରା, ଜି.ଜଗ୍ଦିଶ୍ ଏବଂ ଜି. ବାବାଜୀ ସମୁଦ୍ରକୁ ଯାଇ ତାଙ୍କୁ ଉଦ୍ଧାର କରିଥିଲେ । ଉଦ୍ଧାର ପରେ ରାଜାଙ୍କର ପ୍ରାଥମିକ ଚିକିତ୍ସା କରାଯାଇଥିବା ବେଳେ ଏବେ ସେ ସୁସ୍ଥ ଥିବା ଜଣାପଡ଼ିଛି ।