ଢେଙ୍କାନାଳ: ଗତରାତିରେ ଢେଙ୍କାନାଳ ସହରର ଆନନ୍ଦନଗର ବାଇପାସ୍ ଠାରେ ଫାଷ୍ଟ୍ ବାଟାଲିୟାନ୍ର ଏକ ‘ଏସ୍ୟୁଭି’ ଦୁର୍ଘଟଣାଗ୍ରସ୍ତ ହେବାରୁ ଜଣେ ଡେପୁଟି ସୁବେଦାରଙ୍କର ମୃତ୍ୟୁ ଘଟିଛି ଏବଂ ଅନ୍ୟ ତିନିଜଣ ଆହତ ହୋଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୃତ ଡେପୁଟି ସୁବେଦାର ହେଉଛନ୍ତି ଭିକାରି ଚରଣ ସେଠୀ। ଆହତ ହୋଇଥିବା ତିନି ଜଣ ବ୍ୟକ୍ତି ହେଉଛନ୍ତି ହୃଷିକେଶ ସିଂ, ରାଜେନ୍ଦ୍ର ବିଶ୍ୱାଳ ଏବଂ ଅଶ୍ୱିନୀ ରାଉତ।
ପ୍ରାପ୍ତ ସୂଚନା ଅନୁସାରେ, ଖୋର୍ଦ୍ଧାରେ ମାସ୍କ ଓ ଅନ୍ୟାନ୍ୟ ବିଶୋଧକ ସାମଗ୍ରୀ ବଣ୍ଟନ କରିବା ପରେ ଗତରାତିରେ ଶ୍ରୀ ସେଠୀ ଓ ଅନ୍ୟମାନେ ଏକ ମହିନ୍ଦ୍ରା ‘ଏସ୍ୟୁଭି’ ଯୋଗେ ଖୋର୍ଦ୍ଧାରୁ ଢେଙ୍କାନାଳ ଦେଇ ଫେରୁଥିଲେ। ରାତି ପ୍ରାୟ ୧ଟା ବେଳେ ଢେଙ୍କାନାଳ ଉପକଣ୍ଠରେ ଥିବା ଆନନ୍ଦନଗର ବାଇପାସ୍ରେ ଏକ ଦ୍ରୁତଗାମୀ ଟ୍ରକ୍ ସହ ତାଙ୍କ ଗାଡ଼ି ଧକ୍କା ଖାଇଥିଲା। ଫଳରେ ଡେପୁଟି ସୁବେଦାର ସେଠୀ ଏବଂ ଅନ୍ୟ ତିନିଜଣ ଆହତ ହୋଇଥିଲେ।
ଖବର ପାଇ ଟାଉନ୍ ଥାନା ପିସିଆର୍ ଘଟଣାସ୍ଥଳରୁ ସେମାନଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ସେଠାରେ ଡେପୁଟି ସୁବେଦାର ସେଠୀଙ୍କର ମୃତ୍ୟୁ ହୋଇଗଲା। ଦୁର୍ଘଟଣାରେ ଆହତ ଅନ୍ୟ ତିନିଜଣଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ ଗତ ରାତିରେ କଟକ ବଡ଼ ଡାକ୍ତରଖାନା ପଠାଇ ଦିଆଯାଇଥିଲା।
ତୃତୀୟ ଆହତଜଣକ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟର ୫ମ ମହଲାରେ ଥିବା ବେଡ୍ ନମ୍ବର ୧୭୯ରେ ଚିକିତ୍ସାଧୀନ ଅଛନ୍ତି।