ଜଗତସିଂହପୁର: ଜଗତସିଂହପୁର ନାବାଳିକା ଗଣଦୁଷ୍କର୍ମ ଘଟଣାରେ ମୁଖ୍ୟ ଅଭିଯୁକ୍ତ ପ୍ରିୟରଞ୍ଜନ ବେହେରା ଓରଫ୍ ଚିକୁ ଓ ତାର ସହଯୋଗୀ କାର୍ତ୍ତିକ ମାଝୀକୁ ପୁଲିସ ଗିରଫ କରିଛି। ଚିକୁ କଟକଜିଲ୍ଲା ନିଆଳି ଥାନା ଅନ୍ତର୍ଗତ କସର୍ଦ୍ଦାରେ ଜଣେ ସମ୍ପର୍କୀୟଙ୍କ ଘରେ ଲୁଚିଥିବା ବେଳେ ତାକୁ ଆଜି ଭୋର ସମୟରେ ଗିରଫ କରିଛି ସ୍ପେସାଲ୍ ସ୍କ୍ବାଡ୍। ଚିକୁର ଘର କୋଦଳ ପଳସା ଅଞ୍ଚଳରେ ବୋଲି ଜଣାପଡ଼ିଛି। ଅନ୍ୟ ଅଭିଯୁକ୍ତ କାର୍ତ୍ତିକ ମାଝୀ ହାଜିପୁର ଅଞ୍ଚଳରେ ଜଣେ ସମ୍ପର୍କୀୟଙ୍କ ଘରେ ଲୁଚିଥିବା ବେଳେ ସେଠାରୁ ତାକୁ ଗିରଫ କରାଯାଇଥିବା ପୁଲିସ ସୂଚନା ଦେଇଛି। ଦୁଷ୍କର୍ମ ପରେ ଦୁଇ ଅଭିଯୁକ୍ତ ଗାଁକୁ ଫେରି ବାଇକ୍ରେ ଅଲଗା ଅଲଗା ଫେରାର ହୋଇ ଯାଇଥିଲେ। ଆଜି ପୀଡ଼ିତା ଓ ଦୁଇ ଅଭିଯୁକ୍ତଙ୍କର ଡାକ୍ତରୀମାଇନା କରାଯାଇଛି। ମାଜିଷ୍ଟ୍ରେଟଙ୍କ ଉପସ୍ଥିତିରେ ପୀଡ଼ିତାଙ୍କର ବୟାନ ରେକର୍ଡ କରାଯାଇଛି। ଆଜି ସକାଳୁ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ରକ୍ତ ନମୁନା, କଣ୍ଡୋମ, ମାଟି ନମୁନା ଆଦି ସଂଗ୍ରହ କରି ରାଜ୍ୟ ଫୋରେନସିକ୍ ଲାବରେଟୋରିକୁ ପଠାଇଛି। ପୀଡ଼ିତାଙ୍କ ସାଙ୍ଗରେ ଥିବା ନାବାଳିକା ବାନ୍ଧବୀ ଏହି ଘଟଣାର ପ୍ରତ୍ୟକ୍ଷଦର୍ଶୀ ସାକ୍ଷୀ ଥିବା ବେଳେ ତାଙ୍କର ବୟାନ ମଧ୍ୟ ରେକର୍ଡ କରାଯାଇଛି।
ଅନ୍ୟପକ୍ଷରେ ବିଭିନ୍ନ ରାଜନୈତିକ ଦଳର ନେତା ଆଜି ହସ୍ପିଟାଲରେ ପୀଡ଼ିତାଙ୍କୁ ଭେଟିଛନ୍ତି। ବିଜେଡିର ଏକ ଫ୍ୟାକ୍ଟ ଫାଇଣ୍ଡିଂ ଟିମ୍ ପୀଡ଼ିତା ଓ ତାଙ୍କ ମା’ଙ୍କୁ ଭେଟି ଆଲୋଚନା କରିଛନ୍ତି। ଏହି ଟିମ୍ରେ ଭୁବନେଶ୍ବର ମେୟର ସୁଲୋଚନା ଦାସ, ଜଗତସିଂହପୁରର ଦୁଇ ପୂର୍ବତନ ବିଧାୟକ ଚିରଞ୍ଜୀବ ବିଶ୍ବାଳ ଓ ପ୍ରଶାନ୍ତ ମୁଦୁଲି ସାମିଲ ଥିଲେ। ସେହିପରି ପିସିସି ସମ୍ପାଦକ ଲଲାଟେନ୍ଦୁ ମହାପାତ୍ର ଓ ଜିଲ୍ଲା ସଭାପତି ନଟବର ବାରିକଙ୍କ ନେତୃତ୍ବରେ କଂଗ୍ରେସ ଟିମ୍ ମଧ୍ୟ ପୀଡ଼ିତାଙ୍କୁ ଭେଟିଥିଲା।
ବିଜେପି ଜିଲ୍ଲା ସଭାପତି ପ୍ରତାପ ମିଶ୍ର ଓ ପ୍ରାକ୍ତନ ଜିଲ୍ଲା ସଭାପତି ସତ୍ୟବ୍ରତ ମହାପାତ୍ରଙ୍କ ନେତୃତ୍ବରେ ଏକ ଟିମ୍ ମଧ୍ୟ ପୀଡ଼ିତାଙ୍କୁ ଭେଟିଥିଲେ। ଜଗତସିଂହପୁର ବିଧାୟକ ଅମରେନ୍ଦ୍ର ଦାସ ଗତକାଲି ମେଡିକାଲରେ ପୀଡ଼ିତାଙ୍କ ପରିବାରକୁ ଭେଟିବା ସହ ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ।
ଉଲ୍ଲେଖଯୋଗ୍ୟ, ଗତକାଲି ରାତିରେ ପୀଡ଼ିତା ଜଣେ ନାବାଳିକା ବାନ୍ଧବୀ ସହିତ ତାଙ୍କ ଦାଦାଙ୍କ ଘରକୁ ଜନ୍ମଦିନ ପାଳନ କରିବାକୁ ଯାଉଥିବା ବେଳେ ଦୁଇ ଅଭିଯୁକ୍ତ ପୀଡ଼ିତାଙ୍କୁ ଦୁଷ୍କର୍ମ କରିଥିବା ତାଙ୍କ ବାପା ଜଗତସିଂହପୁର ଥାନାରେ ଅଭିଯୋଗ କରିଥିଲେ।
Advertisment

Sambad is now on WhatsApp
Join and get latest news updates delivered to you via WhatsApp