ପୁରୀ : ସିପସରୁବାଲି ଅଞ୍ଚଳରେ ବିମାନବନ୍ଦର ପାଇଁ ନିର୍ମାଣ ହେଉଥିବା ପାଚେରିକୁ ଭାଙ୍ଗିଦେବା ଅଭିଯୋଗରେ ପୁଲିସ ଆଜି ଦୁଇଜଣଙ୍କୁ ଗିରଫ କରିଛି। ପୂର୍ବରୁ ଏହି ଘଟଣାରେ ପୁଲିସ ୩ ଜଣଙ୍କୁ ଗିରଫ କରିସାରିଛି। ପୁଲିସ ସୂତ୍ରରୁ ପ୍ରକାଶ ଯେ କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ମିଳିତ ଉଦ୍ୟମରେ ପୁରୀର ସିପସରୁବାଲି ଅଞ୍ଚଳରେ ପ୍ରସ୍ତାବିତ ବିମାନ ବନ୍ଦର ନିର୍ମାଣକୁ ସଦର ଥାନା ଅନ୍ତର୍ଗତ ବଳଭଦ୍ରପାଟଣା ଗାଁର ଲୋକମାନେ ବିରୋଧ କରୁଛନ୍ତି। ସେହିପରି ଗତ ମଇ ମାସ ୩୦ ତାରିଖ ଦିନ ଇଡ୍‌କୋ ପକ୍ଷରୁ ଏହି ଜମିରେ ପାଚେରି ନିର୍ମାଣ କରିବା ସମୟରେ ଏହାକୁ ବଳଭଦ୍ରପାଟଣାର କେତେକ ଲୋକେ ବିରୋଧ କରି ଭଙ୍ଗାରୁଜା କରିଥିଲେ। ତେଣୁ ଇଡ୍‌କୋର ବିଭାଗୀୟ ମୁଖ୍ୟ ଶାନ୍ତନୁ କୁମାର ଜେନା ସଦର ଥାନାରେ ଅଭିଯୋଗ କରିଥିଲେ। ତାଙ୍କ ଅଭିଯୋଗକୁ ଭିତ୍ତି କରି ପୁଲିସ ୧୭୨/୨୨ ନମ୍ବରରେ ଏକ ମାମଲା ରୁଜୁ କରି ପୂର୍ବରୁ ୩ ଜଣଙ୍କୁ ଗିରଫ କରିଥିଲା। ଏହି ମାମଲାରେ ଆଜି ପୁଲିସ ବଳଭଦ୍ରପାଟଣାର ମକୁ ପ୍ରଧାନ(୫୫) ଓ ଯୋଗୀ ପ୍ରଧାନ(୫୨)କୁ ଗିରଫ କରି କୋର୍ଟଚାଲାଣ କରିଛି।