ବାଇକ୍‌ ଦୁର୍ଘଟଣାରେ ୨ ମୃତ

ବାରିପଦା: ବାରିପଦା ସହର ଉପକଣ୍ଠ ମଞ୍ଚବନ୍ଧା ନିକଟରେ ଆଜି ସନ୍ଧ୍ୟାରେ ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ଜଣଙ୍କ ମୃତ୍ୟୁ ଘଟିଛି। ମୃତକ ହେଲେ ବେତନଟୀ ସେଣ୍ଟ ଜାଭିୟର୍ସ ସ୍କୁଲର କର୍ମଚାରୀ ମାଲକମ୍‌ ମାର୍ସଲ ଶେଖର। ତାଙ୍କ ଘର ବାଙ୍ଗିରିପୋଷି ବ୍ଲକ୍‌ କଳାବଡ଼ିଆ ଅଞ୍ଚଳରେ।

ଅନ୍ୟଜଣକ ହେଲେ ମହୁଲିଆର ଝୁଲଣ ସିଂହ। ମାଲକମ୍‌ ଓ ସେହି ସ୍କୁଲର ଅନ୍ୟଜଣେ କର୍ମଚାରୀ ଲକ୍ଷ୍ମୀଧର ପୁଟି ବାଇକ୍‌ରେ ସ୍କୁଲରୁ ଗାଁକୁ ଫେରୁଥିବା ବେଳେ ବିପରୀତ ଦିଗରୁ ବାଇକ୍‌ରେ ଆସୁଥିବା ଝୁଲଣଙ୍କ ସହ ଧକ୍କା ହୋଇଥିଲା। ଦୁର୍ଘଟଣାରେ ସମସ୍ତେ ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ବାରିପଦା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ମାଲକମ୍‌ ଓ ଝୁଲଣଙ୍କ ମୃତ୍ୟୁ ଘଟିଛି। ଲକ୍ଷ୍ମୀଧରଙ୍କ ଅବସ୍ଥା ସଙ୍କଟାପନ୍ନ ରହିଛି।