ପୃଥକ ଦୁର୍ଘଟଣାରେ ୨ ମୃତ: ଦୁଇ ମହିଳା କାଉଡ଼ିଆ ଗୁରୁତର

ବୈପାରିଗୁଡା/ ଖଲ୍ଲିକୋଟ: କୋରାପୁଟ ଓ ଗଞାମ ଜିଲ୍ଲାରେ ପୃଥକ ସଡ଼କ ଦୁର୍ଘଟଣାରେ ଦୁଇଜଣଙ୍କର ମୃତ୍ୟୁ ହୋଇଥିବା ବେଳେ ଉଭୟ ଜିଲ୍ଲାର ଦୁଇ ମହିଳା କାଉଡ଼ିଆ ଗୁରୁତର ଆହତ ହୋଇଛି। ଆସନ୍ତାକାଲି ଶ୍ରାବଣ ମାସର ପ୍ରଥମ ସୋମବାର। କୋରାପୁଟ ଜିଲ୍ଲାର ପ୍ରସିଦ୍ଧ ଶୈବପୀଠ ଗୁପ୍ତେଶ୍ବରରେ ଶ୍ରଦ୍ଧାଳୁଙ୍କର ପ୍ରବଳ ଭିଡ଼ ହେଉଥିବାରୁ ସୁରକ୍ଷା ନିମନ୍ତେ ଆଜି ଗୋଟିଏ ଦମକଳ ଗାଡ଼ି ସେଠାକୁ ଯାଉଥିଲା। ତେବେ ସୁକନାଳ ଘାଟିରେ ଯାନ୍ତ୍ରିକ ତ୍ରୁଟି ଯୋଗୁଁ ଡ୍ରାଇଭର ନିୟନ୍ତ୍ରଣ ହରାଇଥିଲେ ଓ ଗାଡ଼ି ଘାଟି ତଳକୁ ଖସି ଯାଇଥିଲା। ପୀଠ ଅଭିମୁଖେ ଯାଉଥିବା ଶହ ଶହ କାଉଡ଼ିଆଙ୍କ ଆଡ଼କୁ ଗାଡ଼ି ବୁଲିଯାଇ ପାଡ଼ୁଆ ଅଞ୍ଚଳର ଯୁବତୀ ରଶ୍ମିତା ଖିଲଙ୍କୁ ପ୍ରଥମେ ଧକ୍କା ଦେଇଥିଲା। ଏହାପରେ ନିକଟସ୍ଥ ଚା’ ଦୋକାନରେ ବସିଥିବା କନ୍ଧଗୁଡ଼ା ଗାଁର ଦୁଇ ଭାଇ ସହଦେବ ଦୁରୁଆ ଓ ପର୍ଶୁରାମ ଦୁରୁଆଙ୍କ ଉପରେ ଗାଡ଼ି ଚଢ଼ି ଯାଇଥିଲା। ଏଥିରେ ଦୁଇ ଭାଇ ଗୁରୁତର ଆହତ ହୋଇଥିଲେ। ଘଟଣାସ୍ଥଳରେ ବୈପାରିଗୁଡ଼ା ପୁଲିସ ଓ ଆଇଆର୍‌ବି ଯବାନ ଗୁରୁତର ଆହତଙ୍କୁ ଉଦ୍ଧାର କରି ବୈପାରିଗୁଡ଼ା ଡାକ୍ତରଖାନାରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ପର୍ଶୁରାମଙ୍କ ମୃତ୍ୟୁ ହୋଇଥିଲା। ରଶ୍ମିତା ଖିଲଙ୍କ ଗୋଡ଼ ଭାଙ୍ଗିବା ସହ ମୁଣ୍ଡରେ ଗଭୀର ଆଘାତ ଲାଗିଛି। ସହଦେବ ଦୁରୁଆଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ହୋଇଛି। ଦୁଇ ଗୁରୁତରଙ୍କୁ କୋରାପୁଟ ବଡ଼ମେଡିକାଲକୁ ସ୍ଥାନାନ୍ତର କରାଯାଇଛି।