ମନ୍ଦିର କାନ୍ଥରେ ପିଟିହେଲା ପଲସର, ଦୁଇ ଯୁବକଙ୍କ ମୃତ୍ୟୁ

ଦିଗପହଣ୍ଡି: ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ଉପରବସା ଫରେଷ୍ଟ ଗେଟ ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି | ଏଥିରେ ଦୁଇଜଣ ବାଇକ ଆରୋହୀଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି | ମିଳିଥିବା ସୂଚନା ମୁତାବକ ଦିଗପହଣ୍ଡି ବ୍ଲକ ଅନ୍ତର୍ଗତ ନୂଆମଉଳଭଞ୍ଜ ଗ୍ରାମର ହରିବନ୍ଧୁ ପାତ୍ରଙ୍କ ପୁଅ ଶଙ୍କର ପାତ୍ର(୨୧) ଓ ନବୀନ ଗୌଡ଼ଙ୍କ ପୁଅ ଦୀପୁନ ଗୌଡ଼(୨୨) ଏକ ପଲସର ବାଇକ ଯୋଗେ ଦିଗପହଣ୍ଡିକୁ ଯାଉଥିଲେ |

ତେବେ ଆଜି ସକାଳ ୧୧ଟା ସମୟରେ ରାସ୍ତାରେ ଭାରସାମ୍ୟ ହରାଇ ଏମାନଙ୍କ ବାଇକ ଏକ ପରିତ୍ୟକ୍ତ କାନ୍ଥକୁ ଧକ୍କା ଦେଇଥିଲା | ଯାହାଫଳରେ ଦୁଇଜଣ ଦୁରକୁ ଛିଟିକି ପଡ଼ିଥିଲେ ଓ ଉଭୟଙ୍କର ମୃତ୍ୟୁ ହୋଇଯାଇଛି | ଦୁର୍ଘଟଣା ଏତେ ଜୋରରେ ହୋଇଥିଲା ଯେ ଘଟଣାସ୍ଥଳରେ ଦୁଇ ଯୁବକଙ୍କର ମୃତ୍ୟୁ ହୋଇଯାଇଥିଲା |

ଦିଗପହଣ୍ଡି ପୁଲିସ ଘଟଣାସ୍ଥଳରେ ପହଂଚି ମୃତଦେହକୁ ଜବତ କରି ବ୍ୟବଛେଦ ପାଇଁ ପଠାଇଛି | ପୁଲିସ ୨୬୬/୧୯ରେ ଏକ କେଶ କରି ଏବେ ତଦନ୍ତ କରୁଛି | ଦୁଇ ପୁଅଙ୍କୁ ହରାଇ ଉଭୟଙ୍କ ପରିବାରରେ ଏବେ ଶୋକର ଲହରୀ ଖେଳିଯାଇଛି |