ଓଡ଼ିଶାର କୋରାପୁଟ, ମାଲକାନଗିରି ଜିଲ୍ଲା ମାଓ ପ୍ରବଣ : ଗୃହ ମନ୍ତ୍ରାଳୟ
ନୂଆଦିଲ୍ଲୀ : ଦେଶରେ ମୋଟ ୩୦ଟି ଜିଲ୍ଲା ସର୍ବାଧିକ ମାଓ ପ୍ରବଣ । ଏହା ମଧ୍ୟରେ ଓଡ଼ିଶାର ଦୁଇଟି ଜିଲ୍ଲା – କୋରାପୁଟ ଓ ମାଲକାନଗିରି ରହିଛି ବୋଲି କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ଲୋକସଭାରେ ବିଜେପି ସାଂସଦ ମିନାକ୍ଷୀ ଲେଖିଙ୍କ ଏକ ପ୍ରଶ୍ନର ଉତ୍ତର ଦେଇ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଜି.କିଷନ ରେଡ୍ଡୀ ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ ଦେଶରେ ଏବେ ୭ଟି ରାଜ୍ୟର ମୋଟ ୩୦ଟି ଜିଲ୍ଲା ମାଓପ୍ରବଣ ରହିଛି । ଏହା ମଧ୍ୟରୁ ଝାଡ଼ଖଣ୍ଡର ସର୍ବାଧିକ ୧୩ଟି ଓ ଛତିଶଗଡ଼ର ୮ଟି ଜିଲ୍ଲା ରହିଛି ।
ଦେଶର ମାଓ ପ୍ରବଣ ଜିଲ୍ଲାଗୁଡ଼ିକରେ ଭିତ୍ତିଭୂମି ବିକାଶ ପାଇଁ କେନ୍ଦ୍ର ସରକାର ସ୍ବତନ୍ତ୍ର କେନ୍ଦ୍ରୀୟ ଅନୁଦାନ ଦେଉଛନ୍ତି । ୨୦୧୭ରେ ଆରମ୍ଭ ହୋଇଥିବା ଏହି ଯୋଜନାରେ ଏ ପର୍ଯ୍ୟନ୍ତ ମୋଟ ୨୫୪୧ କୋଟି ଟଙ୍କାର କେନ୍ଦ୍ରୀୟ ଅନୁଦାନ ପ୍ରଦାନ କରାଯାଇଛି । ଏହା ମଧ୍ୟରୁ ଓଡ଼ିଶାକୁ ପ୍ରାୟ ୧୫୭ କୋଟି ଟଙ୍କାର ଅନୁଦାନ ମିଳିଛି ।
କେନ୍ଦ୍ର ସରକାରଙ୍କ ବିଭିନ୍ନ ପ୍ରମୁଖ ଯୋଜନା ବ୍ୟତୀତ ଏସବୁ ଅନୁଦାନ ଅତିରିକ୍ତ ଭାବେ ପ୍ରଦାନ କରାଯାଉଛି । ଏହା ମାଧ୍ୟମରେ ସଡ଼କ ନିର୍ମାଣ, ଟେଲିକମ ଟାଓ୍ବାର ସ୍ଥାପନ, ଆର୍ଥିକ ଅନ୍ତର୍ଭୁକ୍ତିକରଣ ଆଦି କରାଯାଉଛି ।