ଖୁଣ୍ଟୁଣୀ: କଟକ ଜିଲ୍ଲାର ଖୁଣ୍ଟୁଣୀ ଥାନା ଅନ୍ତର୍ଗତ ପୁରୁଣା କଟକ-ସମ୍ବଲପୁର ରାସ୍ତାର ଚେପେଟି(ଦ୍ୱାରାବତୀପୁର) ଗ୍ରାମ ଦ୍ବାରାଶୁଣି ଠାକୁରାଣୀ ମନ୍ଦିର ଠାରେ ଗତକାଲି ରାତିରେ ଜଣେ ବିଧବା ମହିଳା ଓ ତାଙ୍କର ୪ବର୍ଷର ଶିଶୁ କନ୍ୟାକୁ ଛୁରାମାଡ଼ ହୋଇଛି। ମହିଳାଙ୍କ ସମ୍ପର୍କୀୟ ଦିଅର ଏଭଳି କାଣ୍ଡ ଘଟାଇଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଗୁରୁତର ଅବସ୍ଥାରେ ମହିଳା ଓ ଶିଶୁକନ୍ୟାକୁ ସ୍ଥାନୀୟ ଲୋକେ ଓ ଘଣ୍ଟିଖାଲ ଫାଣ୍ଡି ପୁଲିସ ଉଦ୍ଧାର କରି ପୁଲିସ ଭ୍ୟାନରେ ଚିକିତ୍ସା ପାଇଁ ପ୍ରଥମେ ଆଠଗଡ଼ ଉପଖଣ୍ଡ ଚିକିତ୍ସା କେନ୍ଦ୍ରକୁ ନେଇଥିଲେ ସେଠାରେ ପ୍ରାଥମିକ ଚିକିତ୍ସା ପରେ ଉଭୟ ମାଆ ଓ ଝିଅକୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଖୁଣ୍ଟୁଣୀ ଥାନା ଅଧିକାରୀ ସୁଚିତ୍ରବିର୍ଯ୍ୟ ଦାସ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଛୁରାମାଡ଼ରେ ଗୁରୁତର ଆହତ ମହିଳା ଜଣକ ହେଲେ ଢେଙ୍କାନାଳ ଜିଲ୍ଲା ବାଲିମି ଥାନା ଦୁଦୁରକୋଟ ଗ୍ରାମର କଳ୍ପନା ଗୋଚ୍ଛାୟତ ଓ ତାଙ୍କ ଝିଅ ପାୟଲ(୪)। ପ୍ରାପ୍ତ ଖବର ମୁତାବକ ଛୁରାମାଡ଼ରେ ଗୁରୁତର କଳ୍ପନା ଢେଙ୍କାନାଳରେ ଥିବା ଏକ ସଂସ୍ଥାରେ କାମ କରନ୍ତି। ଗତକାଲି ସନ୍ଧ୍ୟାରେ ତାଙ୍କର ସମ୍ପର୍କୀୟ ଦିଅର ସେଠାରେ ପହଞ୍ଚି ଘର ଦୁଦୁରକୋଟ ଯିବା ପାଇଁ ଉଭୟ ମାଆ ଓ ଝିଅକୁ ନିଜ ବାଇକରେ ନେଇଆସିଥିଲେ। ମାତ୍ର କାମ ବାହାନାରେ ଘରକୁ ନନେଇ ପୁରୁଣା କଟକ-ସମ୍ବଲପୁର ରାସ୍ତାର ଖୁଣ୍ଟୁଣୀ ଥାନା ଦ୍ୱାରାବତୀପୁର ଗ୍ରାମ ଦ୍ୱାରାଶୁଣି ମନ୍ଦିର ପରିସରକୁ ନେଇ ସେଠାରେ ଏକ ଛୁରୀରେ ମହିଳା କଳ୍ପନା ଓ ତାର ୪ବର୍ଷର ଝିଅକୁ ଅତର୍କିତ ଭାବେ ଛୁରାମାଡ଼ କରିଥିଲା।
ଛୁରାମାଡ଼ରେ କଳ୍ପନାଙ୍କ ମୁଣ୍ଡ ,ମୁହଁ ଓ ବାମହାତ ପାପୁଲି ସହ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ହୋଇଥିବା ବେଳେ ଝିଅ ପାୟଲର ପିଠିରେ ଗଭୀର କ୍ଷତ ହୋଇ ପ୍ରବଳ ରକ୍ତସ୍ରାବ ହୋଇଥିଲା । ଛୁରାଘାତରେ ଗୁରୁତର ମହିଳା ଓ ଛୋଟ ପିଲାର ଚିତ୍କାର ଶୁଣି ସ୍ଥାନୀୟ ଲୋକମାନେ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଛୁରାମାଡ଼ କରିଥିବା ଯୁବକ ଜଣକ ଘଟଣାସ୍ଥଳରୁ ବାଇକ ଧରି ଫେରାର ହୋଇଯାଇଥିଲା। ସ୍ଥାନୀୟ ଲୋକେ ଉଭୟ ମାଆ ଝିଅକୁ କାଦୁଅରୁ ଉଦ୍ଧାର କରିଥିଲେ।