ଚାନ୍ଦିପୁର ଗୋଳାବାରୁଦ ପରୀକ୍ଷଣ କେନ୍ଦ୍ରର ଦୁଇ ସେନା କର୍ମଚାରୀ କରୋନା ପଜିଟିଭ
ବାଲେଶ୍ୱର: ଚାନ୍ଦିପୁରରେ ଥିବା ଗୋଳାବାରୁଦ ପରୀକ୍ଷଣ କେନ୍ଦ୍ରର ୨ ଜଣ କର୍ମଚାରୀ କରୋନା ପଜିଟିଭ ବୋଲି ଜଣାପଡିଛି | ଏହି ଦୁଇ ଜଣ ସେନା କର୍ମଚାରୀଙ୍କ ପାଖରେ କରୋନା ଲକ୍ଷଣ ଜଣାପଡିବା ପରେ ଗତ ଶନିବାର ଦିନ ଦୁଇ ଜଣ କୋଲକାତାରେ ଥିବା କମାଣ୍ଡୋ ହସ୍ପିଟାଲକୁ ଯାଇଥିଲେ | ସେଠାରେ ସ୍ୱାବ ନମୁନା ପରୀକ୍ଷା ପରେ କରୋନା ପଜିଟିଭ ବୋଲି ଜଣାପଡିଥିଲା | ଏହା ପରେ ଦୁଇ ଜଣ କର୍ମଚାରୀଙ୍କୁ ବାରାକପୁର ହସ୍ପିଟାଲରେ ଭର୍ତ୍ତି କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ଦୁଇ ଜଣ କର୍ମଚାରୀ କରୋନା ପଜିଟିଭ ବୋଲି ଜଣାପଡିବା ପରେ ବର୍ତ୍ତମାନ ଚାନ୍ଦିପୁରରେ ଜିଲ୍ଲା ସ୍ୱାସ୍ଥ୍ୟ ଅଧିକାରୀ ପରିଦର୍ଶନ କରି କଣ୍ଟାକଟ ଟ୍ରେସିଙ୍ଗ କରାଯିବା ସହ ସମ୍ପୂର୍ଣ୍ଣ ପରିସରକୁ ସାନିଟାଇଜେସନ କରାଯାଉଛି | ସେହିପରି କର୍ମଚାରୀମାନଙ୍କୁ ଆଇସୋଲେସନରେ ରହିବାକୁ କୁହାଯାଇଥିବାବେଳେ ସମସ୍ତଙ୍କୁ ଘରେ ରହି କାମ କରିବାକୁ ପରାମର୍ଶ ଦିଆଯାଇଛି | ସେହିପରି ଦୁଇ ଜଣ କର୍ମଚାରୀ କାହା କାହା ସଂସ୍ପର୍ଶରେ ଆସିଥିଲେ ପ୍ରଶାସନ ପକ୍ଷରୁ ଏବେ ତାହାର ଅନୁସନ୍ଧାନ କରାଯାଉଛି |
ଚାନ୍ଦିପୁର ଗୋଳାବାରୁଦ ପରୀକ୍ଷଣ କେନ୍ଦ୍ରର ଅତିରିକ୍ତ ନିର୍ଦ୍ଦେଶକ ଏଚ.ଏସ ପଣ୍ଡା ଏହି ସୂଚନା ଦେଇଛନ୍ତି | ଏଠାରେ ସୂଚନା ଥାଉ କି ବାଲେଶ୍ୱରରେ ଏଯାଏଁ ୧୯୦ ଜଣ କରୋନା ପଜିଟିଭ ଚିହ୍ନଟ ହୋଇଥିବାବେଳେ ୧୫୦ ଜଣ ସୁସ୍ଥ ହୋଇଛନ୍ତି | ସେହିପରି ଜଣକର ମୃତ୍ୟୁ ହୋଇଥିବାବେଳେ ୩୯ଟି ସକ୍ରିୟ ମାମଲା ରହିଛି |