କଲେଜରୁ ଫେରିବାବେଳେ ଟ୍ରକ ଧକ୍କାରେ ଦୁଇ ଛାତ୍ରୀଙ୍କର ମୃତ୍ୟୁ

ବରଗଡ଼: କଲେଜରୁ ଘରକୁ ଫେରିବାବେଳେ ଟ୍ରକ ଧକ୍କାରେ ଦୁଇ ଜଣ ଛାତ୍ରୀଙ୍କର ମୃତ୍ୟୁ ହୋଇଯାଇଛି | ଅନ୍ୟ ଜଣେ ଛାତ୍ରୀ ଗୁରୁତର ଆହତ ହୋଇଛନ୍ତି | ବରଗଡ଼ ଜିଲ୍ଲା ପୋଢାବାଡି-କାଦବାହାଲ ରାସ୍ତାରେ ଏହି ଘଟଣା ଘଟିଛି | ଦୁର୍ଘଟଣାର ଶିକାର ହୋଇଥିବା ଛାତ୍ରୀମାନେ କାଦବାହାଲ କଲେଜରେ ପାଠ ପଢୁଥିବାବେଳେ ଆଜି ପାଠପଢା ସରିବା ପରେ ଘରକୁ ଫେରୁଥିଲେ | ତେବେ ଏହି ସମୟରେ ବିନିକା ପଟକୁ ଯାଉଥିବା ଏକ ଟ୍ରକ ତିନିଜଣଙ୍କୁ ଧକ୍କା ଦେଇଥିଲା |

ତେବେ ଘଟଣାସ୍ଥଳରେ ଦୁଇ ଜଣ ଛାତ୍ରୀଙ୍କର ମୃତ୍ୟୁ ଘଟିଥିବାବେଳେ ଜଣେ ଛାତ୍ରୀ ଗୁରୁତର ଆହତ ହୋଇପଡିଥିଲେ | ଗୁରୁତର ଆହତ ଛାତ୍ରୀଙ୍କୁ ଅଧିକ ଚିକିତ୍ସା ପାଇଁ ବୁର୍ଲା ସ୍ଥାନାନ୍ତର କରାଯାଇଛି | ମୃତ ଦୁଇ ଛାତ୍ରୀଙ୍କ ନାମ ଶ୍ରାବଣୀ ରଣା ଓ ଅନୁପମା ମଲ୍ଲିକ ବୋଲି ଜଣାପଡିଛି | ଏବେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିବାବେଳେ ପୁଲିସ ପହଞ୍ଚିଛି |