୨୦୧୭ ଗୋଷ୍ଠୀ ସଂଘର୍ଷ ମାମଲା: ୪୩ ଜଣ ଦୋଷୀ ସାବ୍ୟସ୍ତ, ୩ ବର୍ଷ ଜେଲ୍ ଓ ୧୦ହଜାର ଟଙ୍କା ଜୋରିମାନା
ଖୋର୍ଦ୍ଧା: ୨୦୧୭ରେ ସଦର ଥାନା ଅନ୍ତର୍ଗତ ଗୁଡ଼ୁମ-ଜଗନ୍ନାଥପୁରରେ ଘଟିଥିବା ଗୋଷ୍ଠୀ ସଂଘର୍ଷ ମାମଲାରେ ଆଜି ଖୋର୍ଦ୍ଧା ମୁଖ୍ୟ ବିଚାରବିଭାଗୀୟ ମାଜିଷ୍ଟ୍ରେଟ୍ ୪୩ଜଣଙ୍କୁ ଦୋଷୀ ସାବ୍ୟସ୍ତ କରିବା ସହ ବିଭିନ୍ନ ଦଫାରେ ଜେଲ ଓ ଜୋରିମାନା ଦଣ୍ଡ ବିଧାନ କରିଛନ୍ତି । ଜୋରିମାନା ଅର୍ଥ ଆକ୍ରମଣରେ ଆହତଙ୍କୁ କ୍ଷତିପୂରଣ ବାବାଦରେ ପ୍ରଦାନ କରିବାକୁ ନିଦେ୍ର୍ଦଶ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମାମଲାର ବିବରଣୀରୁ ପ୍ରକାଶ, ପୂର୍ବ ଶତ୍ରୁତାକୁ କେନ୍ଦ୍ର କରି ୨୦୧୭, ଫେବ୍ରୁଆରୀ୨୧ ତାରିଖ ରାତି ୧୦ଟା ବେଳେ ବୋତଳମା, ବେଙ୍ଗୀଟାଙ୍ଗୀ, ରାମସିଂହପ୍ରସାଦ, ଦୁର୍ଗାପୁର, ଗୋକୁଳପୁର, ମାନଗୋବିନ୍ଦପୁର, ନରସିଂହପୁରର ପ୍ରାୟ ୫୦ରୁ ଉଦ୍ଧ୍ୱର୍ ବ୍ୟକ୍ତି ହାତରେ ବିଭିନ୍ନ ମାରଣାସ୍ତ୍ର ଧରି ଗୁଡ଼ୁମ-ଜଗନ୍ନାଥପୁରରେ ପହଂଚିଥିଲେ । ସେଠାରେ ଗାଁର କେତେକ ଲୋକ ଏକଯୁଟ ହୋଇ ସେମାନଙ୍କୁ ପ୍ରତିବାଦ କରିଥିଲେ । ଏହାପରେ ଉଭୟ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଘଟିଥିଲା । ସଂଘର୍ଷରେ ଗୁଲୁ ସାହୁ, ଅଲେଖ ବେହେରା, ମକର ସାମନ୍ତସିଂହାରଙ୍କୁ ମରଣାନ୍ତକ ଆକ୍ରମଣ କରିଥିଲେ । ଏହା ସହ ପ୍ରଦୀପ କୁମାର ସାହୁଙ୍କ ସୁନା ଚେନ, ଏକ ଲକ୍ଷଟଙ୍କା ନଗଦ ସହ ଗାଁରେ ଥିବା ୧୫ଟି ଦୋକାନକୁ ଭାଙ୍ଗି ଦେବା ସହ ଜିନିଷପତ୍ର ଲୁଟିନେଇଥିଲେ ।
ଦାଣ୍ଡରେ ଥିବା ସଂଖ୍ୟାଧିକ ଅଟୋ, ଟାଟା ଏସିଇ, ବୋଲେରୋ, ମୋଟରସାଇକଲ ଆଦି ଭାଙ୍ଗି ଦେଇଥିଲେ । ଏହି ମାମଲାରେ ସଦରଥାନା ପୁଲିସ ଭାରତୀୟ ପିଙ୍ଗଳ କୋଡ୍ର ଧାରା ୧୪୭, ୧୪୮, ୧୪୯, ୩୨୩, ୨୯୪, ୩୦୭, ୪୨୭, ୩୭୯, ୪୫୨, ୫୦୬ରେ ୪୧/୨୦୧୭ ନମ୍ବର ମାମଲା ରୁଜୁ କରିଥିଲା । ୨୨ ଫେବ୍ରୁଆରୀ ୨୦୧୭ରେ ସଦର ଥାନା ପୁଲିସ ମାମଲା ରୁଜୁ କରିଥିଲା । ପୁଲିସ ତଦନ୍ତ କରି ସେହିବର୍ଷ ୬ ଜୁଲାଇରେ ଚାର୍ଜସିଟ୍ ପ୍ରସ୍ତୁତ କରିଥିଲା । ୨୩ ଜୁନ୍ ୨୦୨୨ରେ କୋର୍ଟରେ ଏହି ମାମଲାରେ ଶୁଣାଣି ଆରମ୍ଭ ହୋଇଥିଲା ।
ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ ତଥା ଅତରିକ୍ତ ସେସନ୍ସ ଜଜ୍ ଶରତ କୁମାର ଜେନା ଏହି ମାମଲାର ଶୁଣାଣି କରି ଆଜି ସମସ୍ତ ୪୩ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଛନ୍ତି । ଭାରତୀୟ ପିଙ୍ଗଳ କୋଡ୍ର ୩୨୪/୧୪୯ ଧାରାରେ ୩ ବର୍ଷ ଜେଲ୍ ଓ ୧୦ହଜାର ଟଙ୍କା ଜୋରିମାନା ଦଣ୍ଡରେ ଦଣ୍ଡିତ କରିବା ସହ ଜୋରିମାନା ଅନାଦେୟରେ ୨ ମାସ ଅତିରିକ୍ତ ଜେଲ୍ ଦଣ୍ଡ ଆଦେଶ ଦେଇଛନ୍ତି । ଏହି ମାମଲାକୁ ସରକାରୀ ଓକିଲ ବୀରେନ୍ଦ୍ର କୁମାର ପ୍ରହରାଜ ଓ ଅରୁଣ କୁମାର ସ୍ୱାଇଁ ପରିଚାଳନା କରୁଥିଲେ ।