ରାଜ୍ୟରେ ୩୬ଟି ସରକାରୀ ଉଦ୍ୟୋଗ କାର୍ଯ୍ୟକ୍ଷମ ଅଛି, ୨୮ଟି ବନ୍ଦ ହୋଇଯାଇଛି : ମନ୍ତ୍ରୀ
ଅଡିଟ୍ ହୋଇ ନ ଥିବା ୫ଟି ଉଦ୍ୟୋଗକୁ ତାଗିଦ୍
ଭୁବନେଶ୍ବର : ରାଜ୍ୟରେ ବିଭିନ୍ନ ସମୟରେ ୬୪ଟି ସରକାରୀ ଉଦ୍ୟୋଗ ଗଢ଼ାଯାଇଛି। କିନ୍ତୁ ସେଥିରୁ ୨୮ଟି ପରିଚାଳନାଗତ ତ୍ରୁଟି ଓ କ୍ରମାଗତ କ୍ଷତି ଯୋଗୁ ବନ୍ଦ ହୋଇଯାଇଛି। ବର୍ତ୍ତମାନ ୩୬ଟି ସାଧାରଣ ଉଦ୍ୟୋଗ କାର୍ଯ୍ୟକ୍ଷମ ଅଛି। ତାହା ମଧ୍ୟରୁ ୨୩ଟି ଲାଭଜନକ ସଂସ୍ଥା। ଆଜି ବିଧାନସଭାରେ ସୌମ୍ୟରଞ୍ଜନ ପଟ୍ଟନାୟକ, ଭୂପିନ୍ଦର ସିଂହ, ପ୍ରଫୁଲ୍ଲ ସାମଲ, ମୋହନ ଚରଣ ମାଝୀ ଓ ସୁରେଶ ରାଉତରାୟଙ୍କ ପୃଥକ ପୃଥକ ଲିଖିତ ପ୍ରଶ୍ନର ଉତ୍ତରରେ ସରକାରୀ ଉଦ୍ୟୋଗ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଏହି ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ମନ୍ତ୍ରୀ ତାଙ୍କ ଉତ୍ତରରେ ଦର୍ଶାଇଛନ୍ତି, କୌଣସି ବନ୍ଦ ଓ ରୁଗ୍ଣ ସଂସ୍ଥାକୁ ସରକାର ଏ ପର୍ଯ୍ୟନ୍ତ ବିକ୍ରି କରି ନାହାନ୍ତି। ଉଭୟ ସଚଳ ଓ ଅଚଳ ନିଗମ ବାବଦରେ ରାଜ୍ୟ ଉପରେ ମୋଟ ୧୩୯୨.୫୮ କୋଟି ଟଙ୍କାର ଆର୍ଥିକ ବୋଝ ଅଛି। କ୍ଷତିରେ ଚାଲୁଥିବା ଉଦ୍ୟୋଗର ପୁନରୁଦ୍ଧାର ପାଇଁ ସରକାର ବିଭିନ୍ନ ପଦକ୍ଷେପ ନେଉଛନ୍ତି। ଏଥି ନିମନ୍ତେ ଚଳିତ ବଜେଟ୍ରେ ୫ କୋଟି ଟଙ୍କାର ଅର୍ଥ ବରାଦ ହୋଇଛି। ବିଗତ ତିନି ବର୍ଷରେ ଏଜି ଦ୍ବାରା ଆଦୌ ଅଡିଟ୍ ହୋଇ ନ ଥିବା ୫ଟି ଉଦ୍ୟୋଗକୁ ତାଗିଦ୍ କରାଯାଇଛି। ଏହି ଉଦ୍ୟୋଗଗୁଡ଼ିକ ହେଲା ଓଡ଼ିଶା କୃଷି ଶିଳ୍ପ ନିଗମ, ଓଡ଼ିଶା ରାଜ୍ୟ ବିହନ ନିଗମ, ଓଡ଼ିଶା ଗ୍ରାମାଞ୍ଚଳ ଗୃହ ଉନ୍ନୟନ ନିଗମ, ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ଓ କଳିଙ୍ଗ ଷ୍ଟୁଡିଓ। ତେବେ କ୍ଷତିରେ ଚାଲୁଥିବା ସରକାରୀ ଉଦ୍ୟୋଗଗୁଡ଼ିକୁ ବନ୍ଦ କରାଯିବା ପାଇଁ କୌଣସି ନିଷ୍ପତ୍ତି ନିଆଯାଇ ନାହିଁ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି।