୫୬୭ ଡାକ୍ତର ପଦବିରୁ ୨୯୩ ଖାଲି, ୧୯୯ ନର୍ସ, ୫୨ ଫାର୍ମାସିଷ୍ଟ୍ ନାହାନ୍ତି
ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ସ୍ବାସ୍ଥ୍ୟସେବାର ବିକଳ ଚିତ୍ର
ବ୍ରହ୍ମପୁର : ଗଞ୍ଜାମ ଜିଲ୍ଲାରେ ଦିନକୁ ଦିନ ସ୍ବାସ୍ଥ୍ୟସେବା ଭୁଶୁଡ଼ିବାରେ ଲାଗିଛି। ଦକ୍ଷିଣ ଓଡ଼ିଶାର ପ୍ରମୁଖ ସ୍ବାସ୍ଥ୍ୟକେନ୍ଦ୍ର ବ୍ରହ୍ମପୁର ଏମ୍କେସିଜି ମେଡିକାଲରୁ ସରକାର ପର୍ଯ୍ୟାୟ କ୍ରମେ ବିଶେଷଜ୍ଞ ଡାକ୍ତରଙ୍କୁ ବଦଳି କରି ନେଉଛନ୍ତି। ଫଳରେ ଏମ୍କେସିଜି ମେଡିକାଲରେ ଅନେକ ଗୁରୁତ୍ବପୂର୍ଣ ବିଭାଗରେ ରୋଗୀ ତ୍ବରିତ ଚିକିତ୍ସାସେବା ପାଇପାରୁ ନାହାନ୍ତି। କେବଳ ଏମ୍କେସିଜି ମେଡିକାଲ ନୁହେଁ ପୂରା ଗଞ୍ଜାମ ଜିଲ୍ଲାର ସ୍ବାସ୍ଥ୍ୟସେବା ମଧ୍ୟ ବିପର୍ଯ୍ୟସ୍ତ ଅବସ୍ଥାରେ। ସବୁ ବ୍ଲକ୍ ମୁଖ୍ୟଳୟ, ଗ୍ରାମାଞ୍ଚଳ ଡାକ୍ତରଖାନାରେ ଡାକ୍ତର ଅଭାବ ସମସ୍ୟା ଉତ୍କଟ ରୂପ ଧାରଣ କରିଛି। ଜିଲ୍ଲାରେ ୫୦ ପ୍ରତିଶତରୁ ଅଧିକ ଡାକ୍ତର ପଦବି ଖାଲି ପଡ଼ିଛି। ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ସ୍ବାସ୍ଥ୍ୟସେବାର ଏଭଳି ବିକଳ ଚିତ୍ର ବିଷୟରେ ତଥ୍ୟ ମିଳିଥିବା ବେଳେ ଓଡ଼ିଶାର ଅନ୍ୟ ଜିଲ୍ଲାର ସ୍ଥିତି କ’ଣ ଥିବ ତାହା ସହଜେ ଅନୁମେୟ।
Sambad is now on WhatsApp
Join and get latest news updates delivered to you via WhatsApp
ଗଞ୍ଜାମ ଜିଲ୍ଲାର ୨୨ଟି ବ୍ଲକ୍ରେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଥିବା ବେଳେ ବ୍ରହ୍ମପୁରରେ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ଭଞ୍ଜନଗର ଏବଂ ଛତ୍ରପୁରରେ ଦୁଇଟି ଉପଖଣ୍ଡସ୍ତରୀୟ ଚିକିତ୍ସାଳୟ ରହିଛି। ଏଥିପାଇଁ ଗଞ୍ଜାମ ଜିଲ୍ଲାକୁ ମୋଟ ୫୬୭ ଡାକ୍ତର ପଦବି ମଂଜୁର ହୋଇଛି। ତନ୍ମଧ୍ୟରୁ ୨୭୪ଟି ପଦବିରେ ଡାକ୍ତର ଥିବା ବେଳେ ଗତ ୧୨ ତାରିଖ ସୁଦ୍ଧା ୨୯୩ଟି ଡାକ୍ତର ପଦ ଖାଲି ପଡ଼ିଛି। ଜିଲ୍ଲା ପାଇଁ ୨୦୧ ଫାର୍ମାସିଷ୍ଟ୍ ପଦବି ମଂଜୁର ହୋଇଥିବା ବେଳେ ୧୪୯ ଜଣ ଅଛନ୍ତି ଓ ୫୨ ଫାର୍ମାସିଷ୍ଟ ପଦବି ଖାଲି ପଡ଼ିଛି। ସେହିଭଳି ଜିଲ୍ଲାକୁ ସମୁଦାୟ ୬୩୭ ନର୍ସ ପଦବି ସରକାର ମଂଜୁର କରିଥିବା ବେଳେ ସେଥିରୁ ୧୯୯ ପଦବି ଖାଲି ରହିଛି। ସେହିପରି ୧୦୮ ଲ୍ୟାବ୍ ଟେକ୍ନିସିଆନ୍ ପଦବି ମଂଜୁର ହୋଇଥିଲା ବେଳେ ଜିଲ୍ଲାରେ ୫୪ଟି ପଦବି ଖାଲି ପଡ଼ିଛି।
ଗଞ୍ଜାମ ଜିଲ୍ଲାର ୨ଟି ଉପଖଣ୍ଡସ୍ତରୀୟ ଚିକିତ୍ସାଳୟ ସହିତ ବ୍ରହ୍ମପୁରରେ ଥିବା ଜିଲ୍ଲା ମୁଖ୍ୟ ଚିକିତ୍ସାଳୟରେ ମଧ୍ୟ ଡାକ୍ତର ଅଭାବ ଲାଗି ରହିଛି। ଜିଲ୍ଲା ମୁଖ୍ୟ ଚିକିତ୍ସାଳୟ(ସିଟି ହସ୍ପିଟାଲ୍) ପାଇଁ ୭୭ ଡାକ୍ତର ପଦବି ମଂଜୁର ହୋଇଥିବା ବେଳେ ୫୦ଜଣ ଅଛନ୍ତି। ସେହିପରି ଭଞ୍ଜନଗର ଉପଖଣ୍ଡ ଡାକ୍ତରଖାନା ପାଇଁ ୨୩ ଡାକ୍ତର ପଦବି ମଂଜୁର ହୋଇଥିବା ବେଳେ ୧୬ଜଣ ଅଛନ୍ତି। ଛତ୍ରପୁର ଉପଖଣ୍ଡ ଡାକ୍ତରଖାନା ପାଇଁ ୧୮ ଡାକ୍ତର ପଦବି ମଂଜୁର ହୋଇଥିବା ବେଳେ ୧୨ଜଣ କାର୍ଯ୍ୟ କରୁଛନ୍ତି। ଗଞ୍ଜାମ ଜିଲ୍ଲାରେ ୫୦ ପ୍ରତିଶତରୁ ଅଧିକ ଡାକ୍ତର ପଦବି ଖାଲି ରହିଛି। ଗ୍ରାମାଞ୍ଚଳ ଡାକ୍ତରଖାନାଗୁଡ଼ିକରେ କାମ କରିବା ପାଇଁ ଡାକ୍ତରମାନେ ଇଚ୍ଛା ପ୍ରକାଶ କରୁ ନଥିବାରୁ ଏଭଳି ଅସୁବିଧା ସୃଷ୍ଟି ହେଉଥିବା ଜଣେ ଅଧିକାରୀ କହିଛନ୍ତି।
ରାଜ୍ୟ ସରକାର ରୋଗୀଙ୍କୁ ମାଗଣା ସ୍ବାସ୍ଥ୍ୟସେବା ପ୍ରଦାନ ପାଇଁ ନାନା ଯୋଜନା କରିଛନ୍ତି। ରୋଗୀଙ୍କୁ ମାଗଣାରେ ଔଷଧ ପ୍ରଦାନ ପାଇଁ ‘ନିରାୟମ’ ଯୋଜନା କାର୍ଯ୍ୟକାରୀ କରା ଯାଇଥିବା ବେଳେ ମାଗଣା ପରୀକ୍ଷା ପାଇଁ ‘ନିଦାନ’ ଯୋଜନା କାର୍ଯ୍ୟକାରୀ ହୋଇଛି। ସେହିପରି ଗରିବ ଶ୍ରେଣୀର ରୋଗୀଙ୍କ ପାଇଁ ବିଜୁ ସ୍ବାସ୍ଥ୍ୟ ବୀମା କାର୍ଡ଼ ମଧ୍ୟ କରାଯାଇଛି। ଏହା ବ୍ୟତୀତ ସରକାରୀ ମେଡିକାଲଗୁଡ଼ିକର ଭିତ୍ତିଭୂମି ସୁଦୃଢ଼ କରିବା ପାଇଁ ପାଣି ଭଳି କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ ସ୍ବାସ୍ଥ୍ୟସେବାର ସବୁଠାରୁ ମୌଳିକ ଆବଶ୍ୟକତା, ଡାକ୍ତର ନଥିଲେ ଏ ସବୁ ବ୍ୟବସ୍ଥା ଓ ଯୋଜନା କେଉଁ କାମରେ ଆସିବ ବୋଲି ବୁଦ୍ଧିଜୀବୀ ମହଲରେ ପ୍ରଶ୍ନ ସୃଷ୍ଟି ହୋଇଛି।