ଓଭର୍‌ଟେକ୍‌ରୁ ଦୁର୍ଘଟଣା: ୩ ବାଇକ୍ ମଧ୍ୟରେ ଧକ୍କା, ୨ ଗୁରୁତର

ଜହ୍ନାପଙ୍କ/ ଲକ୍ଷ୍ମୀପ୍ରସାଦ: ଖୋର୍ଦ୍ଧା-ବଲାଙ୍ଗୀର ୫୭ ନମ୍ବର ଜାତୀୟ ରାଜପଥର ଖୁଣ୍ଟବନ୍ଧ ସେବା ସମବାୟ ସମିତି ନିକଟରେ ଗୁରୁବାର ସନ୍ଧ୍ୟା ପ୍ରାୟ ୭ଟା ସମୟରେ ଦୁଇଟି ବାଇକ୍ ସାମ୍ନାରୁ ଆସୁଥିବା ଅନ୍ୟ ଏକ ବାଇକ୍ ସହ ଧକ୍କା ହେବାରୁ ଦୁଇ ବାଇକ୍ ଚାଳକ ଗୁରୁତର ଆହତ ହୋଇଛନ୍ତି।

ପ୍ରାପ୍ତ ସୂଚନାରୁ ପ୍ରକାଶ, ଜହ୍ନାପଙ୍କ ପଟୁ ବୌଦ୍ଧ ଆଡ଼କୁ ଯାଉଥିବା ବାଇକ୍ ନଂ. ଓଡି-୨୭ସି-୨୦୯୫ ଏବଂ ଓଡି-୨୭-୨୦୮୪ର ଚାଳକ ଦ୍ବୟ ସତର୍କ ନ ହୋଇ ଜଣେ ଅନ୍ୟଜଣକୁ ଓଭରଟେକ୍ କରୁଥିବା ବେଳେ ସାମ୍ନା ଦିଗରୁ ଆସୁଥିବା ଅନ୍ୟଏକ ବାଇକ୍ ସହ ମୁହାଁମୁହିଁ ଧକ୍କା ହୋଇଥିଲେ। ଦୁର୍ଘଟଣାରେ ଅନ୍ୟ ଦୁଇଜଣ ସାମାନ୍ୟ ଆହତ ହୋଇଛନ୍ତି। ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସକୁ ଫୋନ୍ କରି ଡକାଇଥିଲେ। ସମସ୍ତଙ୍କୁ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଗୁରୁତର ଯୁବକ ଦ୍ୱୟ ହେଲେ ବୌଦ୍ଧ ସହର ବୁଟୁପାଲିର ଶରତ ମେହେର (୨୫) ଓ ବୀରନରସିଂହପୁରର ଯୋଗେଶ୍ବର ବେହେରା (୩୦)। ପରେ ସେମାନଙ୍କୁ ବୁର୍ଲା ଭିମସାରକୁ ସ୍ଥାନାନ୍ତର କରା ଯାଇଥିବା ସୂଚନା ମିଳିଛି। ଆହତମାନେ ହେଲେ ଜହ୍ନାପଙ୍କ ଗ୍ରାମର ଦୁଃଖନାଶକ ଦାସ ଓ ବନମାଳୀ ଦୋରା। ଜହ୍ନାପଙ୍କ ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବାଇକ୍ ଦୁଇଟିକୁ ଜବତ କରିଛି।