ନୂଆଦିଲ୍ଲୀ : ପାରାଦୀପ ବନ୍ଦରର ବିକାଶ ପାଇଁ କେନ୍ଦ୍ର କ୍ୟାବିନେଟ ବୁଧବାରଦିନ ପ୍ରାୟ ୩ ହଜାର କୋଟି ଟଙ୍କା ମଂଜୁର କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାରଙ୍କ ପକ୍ଷରୁ ଜାରି ସୂଚନା ଅନୁସାରେ ପାରାଦୀପ ବନ୍ଦରକୁ ଆହୁରି ଗଭୀର କରିବାକୁ ବିଭିନ୍ନ ପ୍ରକଳ୍ପ କାର୍ଯ୍ୟକାରୀ କରାଯିବ । ବିଶେଷକରି ସରକାରୀ-ଘରୋଇ ଭାଗିଦାରିତାରେ ଓ୍ବେଷ୍ଟର୍ଣ୍ଣ ଡକ ବେସିନର ନିର୍ମାଣ କରାଯିବ । ଏହି ପ୍ରକଳ୍ପରେ ପ୍ରାୟ ୨୦୪୦ କୋଟି ଟଙ୍କା ବ୍ୟୟ ହେବ । ଏହାର କ୍ଷମତା ବାର୍ଷିକ ୨୫ ନିୟୁତ ଟନ ରହିବ । ଏହି କ୍ଷମତା ୨ଟି ପର୍ଯ୍ୟାୟରେ ହାସଲ କରାଯିବ । ବଟ୍ (ବିଲ୍ଟ-ଅପରେଟ-ଟ୍ରାନ୍ସଫର) ଭିତ୍ତିରେ ଏହି ପ୍ରକଳ୍ପର ଠିକା ଘରୋଇ କମ୍ପାନିମାନଙ୍କୁ ଦିଆଯିବ । ଅର୍ଥାତ ଯେଉଁ କମ୍ପାନି ପ୍ରକଳ୍ପ କାର୍ଯ୍ୟକାରୀ କରିବ ସେ ତାହାକୁ ୩୦ ବର୍ଷ ପର୍ଯ୍ୟନ୍ତ ପରିଚାଳନା କରିବ ଓ ତାପରେ ପାରାଦୀପ ବନ୍ଦରକୁ ହସ୍ତାନ୍ତର କରିବ ।
ସେହିପରି ୩୫୨ କୋଟି ବ୍ୟୟରେ ବନ୍ଦରର ଅନ୍ୟ ଭାଗକୁ ଆହୁରି ଗଭୀର କରାଯିବ । ଯଦ୍ବାରା ଏହି ବନ୍ଦରରେ କେପ ସାଇଜ ଜାହାଜ ( ବୃହତ ଜାହାଜ) ବନ୍ଦର ମଧ୍ୟକୁ ପ୍ରବେଶ କରିପାରିବ ବୋଲି କେନ୍ଦ୍ର ଜାହାଜ ଚଳାଚଳ ରାଷ୍ଟ୍ରମନ୍ତ୍ରୀ ମନସୁଖ ଲାଲ ମାଣ୍ଡବ୍ୟ କହିଛନ୍ତି ।
ଏହି ବିକାଶ କାର୍ଯ୍ୟ ସଂପୂର୍ଣ୍ଣ ହେଲେ କୋଇଲା, ଚୂନପଥର, ଲୁହାପଥର ଆମଦାନୀ-ରପ୍ତାନି କରୁଥିବା ବୃହତ ଜାହାଜମାନଙ୍କ ପାଇଁ ପାରାଦୀପ ବନ୍ଦର ବେଶ ସୁବିଧାଜନକ ହେବ ।