ଏସ୍‌ସିବିର ବିଶ୍ବସ୍ତରୀୟ ପ୍ରକଳ୍ପ କାର୍ଯ୍ୟ ୩୨% ସରିଛି

ଭୁବନେଶ୍ବର: କଟକ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜକୁ ବିଶ୍ବସ୍ତରୀୟ କରିବା ପାଇଁ ୪୪୭୯.୪୯ କୋଟି ଟଙ୍କାର ପ୍ରକଳ୍ପ କାର୍ଯ୍ୟ ଚାଲୁ ରହିଛି। ୨୦୨୨ ମସିହା ଜାନୁଆରି ମାସରୁ ପ୍ରକଳ୍ପ ଆରମ୍ଭ ହୋଇଥିବା ବେଳେ ୨୦୨୫ ଡିସେମ୍ବର ସୁଦ୍ଧା କାର୍ଯ୍ୟ ଶେଷ ହେବ। ପ୍ରକଳ୍ପର ୩୨% କାର୍ଯ୍ୟ ଶେଷ ହୋଇଥିବା ସୂଚନା ଦେଇଛନ୍ତି ରାଜ୍ୟ ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ।

ବିଧାୟକ ସୋଫିଆ ଫିରଦୋସଙ୍କ ଏକ ପ୍ରଶ୍ନର ଉତ୍ତରରେ ଶ୍ରୀ ମହାଲିଙ୍ଗ କହିଛନ୍ତି ଯେ ଏସ୍‌ସିବିର ବିଶ୍ବସ୍ତରୀୟ ପ୍ରକଳ୍ପରେ ୪ଟି କ୍ଲିନିକାଲ ବ୍ଲକ୍ ସହ ୨ଟି ୟୁଟିଲିଟି ବିଲ୍ଡିଂ, ଆଇପିଡି ଓ ଆଇସିୟୁ ଶଯ୍ୟାର କାମ ଚାଲୁ ରହିଛି। କ୍ଲିନିକାଲ-୧ରେ ୧୦ମହଲା ବିଶିଷ୍ଟ ଜେନେରାଲ ମେଡିସିନ୍‌ରେ ୬ଶହ ଆଇପିଡି ଶଯ୍ୟା, କ୍ଲିନିକାଲ-୨ରେ ସ୍ପେଶାଲାଇଜ୍‌ଡ ମେଡିସିନ୍‌ରେ ୪୯୬ ଆଇପିଡି ଶଯ୍ୟା, କ୍ଲିନିକାଲ-୩ରେ ସ୍ପେଶାଲାଇଜ୍‌ଡ ସର୍ଜରିରେ ୪୫୬ ଆଇପିଡି ଶଯ୍ୟା ଓ କ୍ଲିନିକାଲ-୪ରେ ଜେନେରାଲ ସର୍ଜରି ଓ ଟ୍ରମାରେ ୫୦୬ ଆଇପିଡି ଶଯ୍ୟା ରହିଛି। ୟୁଟିଲିଟି ବ୍ଲକ୍‌-୧ରେ ରୋଷଶାଳ, ଲଣ୍ଡ୍ରି, ଡାଟା ସେଣ୍ଟର ଓ ସେଣ୍ଟ୍ରାଲ ଷ୍ଟୋର, ବ୍ଲକ୍‌-୨ରେ ଏଚ୍‌ଭିଏସି ପ୍ଲାଣ୍ଟ ରୁମ୍, ମେଡିକାଲ ଗ୍ୟାସ ପ୍ଲାଣ୍ଟ, ପ୍ଲମ୍ବିଂ, ଫାୟାର ପ୍ଲାଣ୍ଟ ରୁମ୍, ଇଲେକଟ୍ରିକାଲ ପ୍ୟାନେଲ ରୁମ୍, ଡିଜି ରୁମ୍, ବର୍ଜ୍ୟବସ୍ତୁ ପରିଚାଳନା ଓ ମର୍ଗ ରହିଛି। ଏସ୍‌ସିବିର କାର୍ଯ୍ୟକୁ ୨ଟି ପ୍ରମୁଖ ପ୍ୟାକେଜ୍ ଯଥା କ୍ଲିନିକାଲ ପ୍ୟାକେଜ୍, ରେ‌ସିଡେନ୍‌ସିଆଲ ପ୍ୟାକେଜ୍‌ରେ ସଂପାଦନ କରିବା ପାଇଁ ୨ଟି ଠିକା ସଂସ୍ଥା କାର୍ଯ୍ୟ କରୁଛି। ଏଲ ଏଣ୍ଡ ଟି ଓ ଏନ୍‌ସିସି ଚୁକ୍ତିବଦ୍ଧ ହୋଇଛନ୍ତି।