ସୋନପୁର: ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ଥାନା ଶୁଖା ଗ୍ରାମର ବହୁଚର୍ଚ୍ଚିତ ଇନ୍ଦ୍ର ନନ୍ଦ ହତ୍ୟା ମାମଲାର ରାୟ ୨୭ ବର୍ଷ ପରେ ପ୍ରକାଶ ପାଇଛି। ଏହି ମାମଲାର ୪ ଜଣ ଅଭିଯୁକ୍ତ କଇରୁ ବିଶ୍ବାଳ, ବିକଳ ବିଶ୍ବାଳ, ଟିକଳ ବିଶ୍ବାଳ ଓ ପୂର୍ଣ୍ଣ ବିଶ୍ବାଳଙ୍କୁ ଦୋ‌ଷୀ ସାବ୍ୟସ୍ତ କରି ଜିଲ୍ଲା ଓ ଦୌରାଜଜ୍‌ ହିରଣ୍ମୟ ବିଶୋଇ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏହା ସହିତ ହଜାରେ ଟଙ୍କା ଲେଖାଏଁ ଅର୍ଥ ଦଣ୍ଡାଦେଶ ମଧ୍ୟ ଦେଇଛନ୍ତି। ଜରିମାନା ଅନାଦେୟ ଅଧିକ ୩ ମାସ ଜେଲ ଦଣ୍ଡ ଭୋଗିବାକୁ ରାୟରେ ଦର୍ଶାଇଛନ୍ତି। ଅନ୍ୟ ବିଚାରାଧୀନ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।

Advertisment

ପ୍ରକାଶ ଯେ ଗତ ୧୯୯୫ ମସିହା ସେପ୍ଟେମ୍ବର ୨୫ ତାରିଖ ଦିନ ଡୁଙ୍ଗୁରିପାଲି ଥାନା ଶୁଖା ଗ୍ରାମର ଇନ୍ଦ୍ର ନନ୍ଦ ଗାଁର ଏକ ନିମ୍ବ ଗଛ ତଳେ ବସିଥିବା ବେଳେ ପ୍ରାୟ ୨୫ ଜଣ ମାରଣାସ୍ତ୍ର ଓ ଠେଙ୍ଗାବାଡ଼ି ଧରି ଗୋଡ଼ାଇଥିଲେ। ତାଙ୍କ ଘର ସମ୍ମୁଖରେ ଆକ୍ରମଣ କରିବାରୁ ଇନ୍ଦ୍ରଙ୍କ ମୃତ୍ୟୁ ଘଟିଥିଲା। ଏସମ୍ପର୍କରେ ଇନ୍ଦ୍ରଙ୍କ ପୁଅ ଜବଦୁ ଡୁଙ୍ଗୁରିପାଲି ଥାନାରେ ଏତଲା ଦେଇଥିଲେ। ଅଭିଯୋଗକୁ ଭିତ୍ତି କରି ପୁଲିସ ଡୁଙ୍ଗୁରିପାଲି ଥାନା କେସ୍‌ ନମ୍ବର ୧୪୫/ତା୨୫.୯.୧୯୯୫ ଅନୁଯାୟୀ ଏକ ହତ୍ୟା ମାମଲା ରୁଜୁ କରିଥିଲା। ମାମଲାରେ ଶୁଖା ଗ୍ରାମର ସଂପୃକ୍ତ ୪ ଜଣଙ୍କ ସମେତ ୨୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ମାମଲା ଜିଲ୍ଲା ଓ ଦୌରାଜଜ୍‌ଙ୍କ କୋର୍ଟରେ ବିଚାରାଧୀନ ଥିଲା। ମାମଲା ଚାଲିଥିବା ବେଳେ ଅଭିଯୁକ୍ତ କାର୍ତ୍ତିକ କୁମ୍ଭାର, ମନୋଜ ଦାଶ ଓ ଅଶ୍ବିନୀ ମେହେରଙ୍କ ମୃତ୍ୟୁ ଘଟିଥିଲା। ଅନ୍ୟ ଦୁଇ ନାବାଳକ ଅଭିଯୁକ୍ତଙ୍କ ଜୁଭେନାଇଲ ଜଷ୍ଟିସ ବୋର୍ଡରେ ବିଚାରାଧୀନ ଅଛି। ଏହି ଘଟଣାରେ ୧୧ ଜଣଙ୍କ ସାକ୍ଷ୍ୟ ଗ୍ରହଣ କରାଯାଇଥିଲା। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ପ୍ରକାଶ ଚନ୍ଦ୍ର ମିଶ୍ର ମାମଲା ପରିଚାଳନା କରୁଥିଲେ।