ଦରଜୀଙ୍କଠାରୁ ଜରିଗୋଟାଳି ଯାଏଁ ହାତ ଖୋଲିଦେଲେ: ଦୁର୍ଘଟଣାଜନିତ ମୃତ୍ୟୁ ପାଇଁ ୪ ଲକ୍ଷ ପାଇବେ

ଭୁବନେଶ୍ବର: ଓଡ଼ିଶା ଅଣସଂଗଠିତ ଶ୍ରମିକ ସାମାଜିକ ସୁରକ୍ଷା ବୋର୍ଡ କଲ୍ୟାଣ ଯୋଜନାରେ ଆଉ ପଚାଶ ବର୍ଗ ସାମିଲ ହେବେ। ଡେଲିଭରି ବୟ, କୁମ୍ଭାର, କମାର, ପାଇପମିସ୍ତ୍ରୀ ଆଦି ଏହି ବର୍ଗରେ ରହିବେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏହି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛନ୍ତି। ୨୦୧୭ ମଇ ପହିଲାରୁ ଆରମ୍ଭ ହୋଇଥିବା ଏହି ବୋର୍ଡ ଜରିଆରେ ବର୍ତ୍ତମାନ ବୁଲାବିକାଳୀ, ଛୋଟ ଦୋକାନୀ, ଘରୋଇ ସହାୟକ, ରିକ୍‌ସାବାଲା, ଅଟୋ ଡ୍ରାଇଭର, ମୋଚି, କୃଷି ଶ୍ରମିକ, ଜଙ୍ଗଲ ଶ୍ରମିକ, ସମ୍ବାଦପତ୍ର ହକର ଓ ସଫେଇ କର୍ମଚାରୀଙ୍କ ପରି ୧୦ଟି ବର୍ଗର ଲୋକ ସୁବିଧା ପାଉଛନ୍ତି। ଏହି ୧୦ଟି ବର୍ଗର ପ୍ରାୟ ୩.୬୫ ଲକ୍ଷ ପଞ୍ଜୀକୃତ ଶ୍ରମିକ ଅଛନ୍ତି। ବୋର୍ଡରେ ପଞ୍ଜୀକୃତ ଶ୍ରମିକମାନଙ୍କୁ ଦୁର୍ଘଟଣାଜନିତ ମୃତ୍ୟୁ କ୍ଷେତ୍ରରେ ସହାୟତାକୁ ୨ ଲକ୍ଷରୁ ୪ ଲକ୍ଷ ଟଙ୍କାକୁ ମୁଖ୍ୟମନ୍ତ୍ରୀ ବୃଦ୍ଧି କରିଛନ୍ତି। ସେହିପରି ସ୍ବାଭାବିକ ମୃତ୍ୟୁ କ୍ଷେତ୍ରରେ ସହାୟତାକୁ ୧ ଲକ୍ଷ ଟଙ୍କାରୁ ୨ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି, ଶ୍ରମିକ ତଥା ଗରିବ ବର୍ଗର କଲ୍ୟାଣ ପାଇଁ ରାଜ୍ୟ ସରକାର ପ୍ରତିବଦ୍ଧତାର ସହ କାର୍ଯ୍ୟ କରୁଛନ୍ତି। ସେମାନଙ୍କ ସାମାଜିକ ନିରାପତ୍ତା ପାଇଁ ଅନେକ ପଦକ୍ଷେପ ଗ୍ରହଣ କରାଯାଇଛି। ଓଡିଶା ଅଣସଂଗଠିତ ଶ୍ରମିକ ସାମାଜିକ ସୁରକ୍ଷା ବୋର୍ଡ ଜରିଆରେ ହିତାଧିକାରୀମାନଙ୍କୁ ବିଭିନ୍ନ ସହାୟତା ଯୋଗାଇ ଦିଆଯାଉଛି।

ଅଣସଂଗଠିତ ଶ୍ରମିକ କଲ୍ୟାଣ ଯୋଜନାରେ ଆଉ ୫୦ ବର୍ଗ
ଦୁର୍ଘଟଣାଜନିତ ମୃତ୍ୟୁ ପାଇଁ ୪ ଲକ୍ଷ ପାଇବେ
ସ୍ବାଭାବିକ ମୃତ୍ୟୁ କ୍ଷେତ୍ରରେ ୨ ଲକ୍ଷ ସହାୟତା

୫୦ଟି ଅଣସଂଗଠିତ ବର୍ଗ କର୍ମଚାରୀ
୧. ଦରଜୀ, ଏମ୍ବ୍ରୋଡୋରୀ କାରିଗର, ୨. ବାରିକ, ସ୍ପା, ସେଲୁନ ଓ ବିଉଟି ପାର୍ଲରରେ କାମ କରୁଥିବା କର୍ମଚାରୀ, ୩. ମହାରଣା, ୪. ମତ୍ସ୍ୟଜୀବୀ, ୫. କମାର, ୬. ରେଳବାଇ କୁଲି, ୭. ମାଲ ଲୋଡିଂ ଓ ଅନ୍‌ଲୋଡିଂରେ ନିୟୋଜିତ ଶ୍ରମିକ ତଥା ମୁଣ୍ଡରେ ବୋଝ ବୋହୁଥିବା ଶ୍ରମିକ, ୮. କୁମ୍ଭାର, ୯. ପଥର ଶିଳ୍ପୀ ଓ ସହାୟକ, ୧୦. ଜରି ଗୋଟାଳି, ୧୧. ପରିମଳ କର୍ମଚାରୀ, ୧୨. ରଜକ/ ଲଣ୍ଡ୍ରି ଓ ଡ୍ରାଏ କ୍ଲିନର୍‌ କର୍ମଚାରୀ, ୧୩. ବୁଣାକାର, ହସ୍ତଶିଳ୍ପ ଓ ହସ୍ତତନ୍ତ କାରିଗର, ୧୪. କତା ଶିଳ୍ପ ଶ୍ରମିକ, ୧୫. ଲୋକକଳା କଳାକାର, ୧୬. ଚିତ୍ରଶିଳ୍ପୀ/ପଟ୍ଟଚିତ୍ର ଶିଳ୍ପୀ, ୧୭. ମାଂସ କଟାଳି, ୧୮. ରତ୍ନ ପଥର ତଥା ସୁନାରୂପା କାରିଗର, ୧୯. ହୋଟେଲ, ରେସ୍ତୋଁରା ଓ ଢାବାରେ କାର୍ଯ୍ୟରତ ଶ୍ରମିକ, ୨୦. ଫଟୋଗ୍ରାଫର ଓ ଭିଡିଓଗ୍ରାଫର, ୨୧. ୱେଲ୍‌ଡିଂ କାରିଗର, ୱେଲ୍‌ଡିଂ ସହାୟକ, ୨୨. ଇଲେକ୍ଟ୍ରିସିଆନ, ୨୩. ପାଣି ପାଇପ ମିସ୍ତ୍ରୀ, ୨୪. ଟୁଲ୍‌ ମେକର୍‌, ଡାଏ ମେକର୍‌, ରଙ୍ଗ ପ୍ରସ୍ତୁତକାରୀ, ୨୫. ମେକାନିକାଲ ଓ ଇଲେକ୍ଟ୍ରିକାଲ ଯନ୍ତ୍ରାଂଶ ମରାମତି କର୍ମଚାରୀ, ୨୬. ମାଳି, ୨୭. ଆସବାବପତ୍ର ମରାମତିରେ ନିୟୋଜିତ ଶ୍ରମିକ, ୨୮. ତେଜରାତି ଓ ପରିବା ଦୋକାନରେ କାର୍ଯ୍ୟରତ ସହାୟକ, ୨୯. ଫୁଲ ଦୋକାନୀ, ୩୦. ଟେଣ୍ଟହାଉସ/ଡେକୋରେସନ କାର୍ଯ୍ୟରେ ନିୟୋଜିତ ଶ୍ରମିକ, ୩୧. ବ୍ୟାଣ୍ଡପାର୍ଟି ସଦସ୍ୟ, ୩୨. ମନୋରଞ୍ଜନ କଳାକାର, ୩୩. ମ୍ୟୁଜିସିଆନ ଓ କଣ୍ଠଶିଳ୍ପୀ, ୩୪. ଚଳଚ୍ଚିତ୍ର ଅପରେଟର/ସହାୟକ, ୩୫. ସିନେମା ହଲ୍‌ ବୁକିଂ କ୍ଲର୍କ, ୩୬. ବାଦ୍ୟଯନ୍ତ୍ର ନିର୍ମାଣ କାର୍ଯ୍ୟରେ ନିୟୋଜିତ ଶ୍ରମିକ, ୩୭. ସମସ୍ତ ପ୍ରକାର କାରିଗର, ୩୮. ବୃକ୍ଷରୋପଣ କାର୍ଯ୍ୟରେ ନିୟୋଜିତ ଶ୍ରମିକ, ୩୯. ଡଙ୍ଗା ଚାଳକ/ସହାୟକ, ୪୦. ସ୍ନାକ୍ସ, ମିକ୍ସଚର୍‌ ଫ୍ୟାକ୍ଟ୍ରି ଶ୍ରମିକ, ୪୧. ଆଚାର, ବଡି, ପାମ୍ପଡ ପ୍ରସ୍ତୁତକାରୀ, ୪୨. ସ-ମିଲ୍‌ ଶ୍ରମିକ, ୪୩. କ୍ଷୀର ବିକ୍ରୟ କରୁଥିବା ବ୍ୟକ୍ତି, ୪୪. କେୟାରଟେକର/ହାଉସ କିପର/ବେଡ୍‌‌ସାଇଡ୍‌ ଆଟେଣ୍ଡାଣ୍ଟ୍‌, ୪୫. କେକ୍‌/କ୍ୟାଣ୍ଡି ପ୍ରସ୍ତୁତକାରୀ, ୪୬. ବରଫ ପ୍ରସ୍ତୁତକାରୀ/ ଆଇସକ୍ରିମ ପ୍ରସ୍ତୁତକାରୀ, ୪୭. ଡାଇରୀ ପ୍ରଡକ୍ଟ ପ୍ରସ୍ତୁତକାରୀ, ୪୮. ଟ୍ରାଭେଲ ଓ ଟୁରିଷ୍ଟ ଗାଇଡ୍‌, ୪୯. ଡେଲିଭରି ବଏ, ୫୦. କୃଷି ଶ୍ରମିକ