ଛତିଶଗଡ଼ ମୁହାଁ କଳାହାଣ୍ଡି ଧାନ: ମାତ୍ର ୪ଟି ମଣ୍ଡି ଆରମ୍ଭ ହୋଇଛି, ଦଲାଲ ହାତରେ ଚାଷୀଙ୍କ ଧାନ Latestକଳାହାଣ୍ଡିଜିଲ୍ଲା By Sambad Digital Last updated Nov 17, 2020 Sambad English ସେୟାର ଭବାନୀପାଟଣା: କଳାହାଣ୍ଡି ଜିଲ୍ଲାରେ ଗତ ନଭେମ୍ବର ୧୫ ତାରିଖ ଠାରୁ ଧାନ ମଣ୍ଡି ଆରମ୍ଭ ହୋଇଛି । ବର୍ତ୍ତମାନ ପର୍ଯ୍ୟନ୍ତ ମାତ୍ର ୪ ଟି ମଣ୍ଡି ଆରମ୍ଭ ହୋଇଥିବା ବେଳେ ଅନ୍ୟ ମଣ୍ଡି ଗୁଡିକ ଏପର୍ଯ୍ୟନ୍ତ ଆରମ୍ଭ ହୋଇନାହିଁ । ମଣ୍ଡି ଖୋଲିବା ବିଳମ୍ବ ହେଉଥିବା ଯୋଗୁଁ ଚାଷୀମାନେ ଅଣ୍ଡରରେଟ ରେ ଦଲାଲ ହାତକୁ ଟେକିଦେବାକୁ ବାଧ୍ୟ ହେଉଛନ୍ତି । ଦଲାଲ ଜରିଆରେ ଚାଷୀଙ୍କ ଧାନ ଏବେ ଛତିଶଗଡ଼ ମୁହାଁ ହେବା ସାଧାରଣ ରେ ଉଦବେଗ ପ୍ରକାଶ ପାଇଛି । ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାରେ ଗତ ନଭେମ୍ବର ୧୫ ତାରିଖ ଠାରୁ ଧାନ କ୍ରୟ ଆରମ୍ଭ ହୋଇଛି । ଏପର୍ଯ୍ୟନ୍ତ ଜୟପାଟଣା ବ୍ଲକର ଖଲିଆଭଟା ମଣ୍ଡିରେ ୭୭ କୁଇଣ୍ଟାଲ, ଜୟପାଟଣାରେ ୧୦୦ କୁଇଣ୍ଟାଲ, ରଣମାଲରେ ୧୦୦ କୁଇଣ୍ଟାଲ ଓ ନର୍ଲା ବ୍ଲକର ଭୀମକେଲା ମଣ୍ଡିରେ ୧୯୯ କୁଇଣ୍ଟାଲ ଧାନ ମଣ୍ଡିରେ କ୍ରୟ ହୋଇଛି ।ଅନ୍ୟ ମଣ୍ଡି ଗୁଡିକ ଆରମ୍ଭ ହୋଇନଥିବା ଯୋଗୁଁ ଚାଷୀମାନେ ପ୍ରାୟ କୁଇଣ୍ଟାଲ ପିଛା ୧୩୦୦ ଟଙ୍କା ରେ ଦଲାଲ ମାନଙ୍କୁ ବିକ୍ରି କରୁଥିବା ଅଭିଯୋଗ ହୋଇଛି । Sambad is now on WhatsApp Join and get latest news updates delivered to you via WhatsApp Join Now ସେହିଭଳି ଚାଷ ପୂର୍ବରୁ ଅଗ୍ରୀମ ନେଇଥିବା ଚାଷୀମାନେ କୁଇଣ୍ଟାଲ ୧୧୦୦ ଟଙ୍କା ରେ ଧାନ ବିକ୍ରି କରୁଥିବା ଦେଖା ଦେଇଛି । ଜିଲ୍ଲାରେ ପ୍ରଥମ ପର୍ଯ୍ୟାୟରେ ୩୦ ଲକ୍ଷ ୯୪ ହଜାର ୧୧୭ କୁଇଣ୍ଟାଲ ଟାର୍ଗେଟ ଆସିଛ । ଏଥି ମଧ୍ୟରୁ ୫୮ ଜଣ ମିଲର୍ସ ଓ ୩୪ ଟି ସ୍ୱୟଂ ସହାୟକ ଗୋଷ୍ଠୀକୁ ୨୨ ଲକ୍ଷ ୯୨ ହଜାର ୯୦୦ କୁଇଣ୍ଟାଲ ଟାର୍ଗେଟ ଧାନ ଉଠାଣ ନିମନ୍ତେ ଯୋଗାଣ ବିଭାଗ ପକ୍ଷରୁ ପ୍ରଦାନ କରାଯାଇଛି । କଳାହାଣ୍ଡି ଜିଲ୍ଲାର ୧୩ ଟି ବ୍ଲକ ରେ ୭୪ ଟି ପ୍ୟାକ୍ସ ଜରିଆରେ ୧୬୬ଟି ମଣ୍ଡି ଖୋଲା ଯାଇଛି । ସେହିଭଳି ୮୪ ହଜାର ୫୩ ଜଣ ଚାଷୀ ଧାନ ବିକ୍ରି ନିମନ୍ତେ ପଞ୍ଜିକୃତ କରିଛନ୍ତି । କଳାହାଣ୍ଡି ଜିଲ୍ଲାର ଧର୍ମଗଡ଼ ବ୍ଲକ କଦଳୀମୁଣ୍ଡା ପଞ୍ଚାୟତର ଝାକରପଡା ରାସ୍ତା, ଡୁମେରଗୁଡା ପଞ୍ଚାୟତର କୋଟମେର/କୀର୍କାକାନି ରାସ୍ତା, ପର୍ଲା ପଞ୍ଚାୟତ ର ସେମଳା ଓ ଗୋଳାମୁଣ୍ଡା ବ୍ଲକ ର ତୁମରା ରାସ୍ତା ଦେଇ କଳାହାଣ୍ଡି ଧାନ ଦଲାଲ ଜରିଆରେ ଛତିଶଗଡ଼ ଯାଉଛି । ସନ୍ଧିକୁଲିହାରୀ ମୁଖ୍ୟ ରାସ୍ତାରେ ପୁଲିସ ଚେକିଂ ଯୋଗୁଁ ଏହି ରାସ୍ତାମାନ ଦେଇ ଧାନ ପାର ହେଉଛି । କଳାହାଣ୍ଡି ଜିଲ୍ଲାର ତୁମରା, ପର୍ଲା, ପାଇକପଡା, ସନ୍ଧିକୁଲିହାରୀ, ହଳଦୀ ପ୍ରମୁଖ ଆରଏମସି ଚେକଗେଟ ଗୁଡିକୁ ଉଠାଇ ଦିଆଯାଇଥିବା ଯୋଗୁଁ ଦଲାଲ ମାନେ ଅନାୟସରେ ଛତିଶଗଡ଼ ଚାଲାଣ କରୁଛନ୍ତି । ସନ୍ଧିକୁଲିହାରୀ ଓ ଖୁଟ ଗାଁରେ ଧାନ ମହଜୁଦ ରଖି ଦେଭୋଗ ମଣ୍ଡିରେ ବିକ୍ରି ନିମନ୍ତେ ଚାଲାଣ ହେଉଥିବା ଅଭିଯୋଗ ହୋଇଛି । ଜିଲ୍ଲା ପ୍ରଶାସନ ପକ୍ଷରୁ ଏନଫୋର୍ସମେଣ୍ଟ ସ୍କ୍ବାର୍ଡ ଗଠନ ହୋଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଧରପଗଡ଼ କିମ୍ବା ଚଢଉ ହୋଇନାହିଁ । ଫଳରେ ଅବାଧରେ ଛତିଶଗଡ଼କୁ ଧାନ ପଠା ଯାଉଛି । ତୁରନ୍ତ ଜିଲ୍ଲାର ସମସ୍ତ ମଣ୍ଡି ଖୋଲା ନ ଗଲେ ପ୍ରାୟ ଧାନ ଛତିଶଗଡ଼ ଚାଲିଯିବା ସମ୍ଭାବନାକୁ ଏଡାଇ ଦିଆଯାଇପାରିବ ନାହିଁ ।