ମାନସ ହତ୍ୟା ପଛରେ ୬୦ ‘ରହସ୍ୟମୟ ଭିଡିଓ’: ଅଫିସ କମ୍ପ୍ୟୁଟରରୁ ଡିଲିଟ୍ ହେଇଛି ଡାଟା; ଲ୍ୟାବକୁ ଗଲା ହାର୍ଡଡିସ୍କ
ନୟାଗଡ଼ ଘରେ କ୍ରାଇମବ୍ରାଞ୍ଚ୍ର ପୁଣି ଛାନ୍ଭିନ୍; ୨୫ ସାକ୍ଷୀଙ୍କ ତାଲିକା ପ୍ରସ୍ତୁତ
କଟକ/ନୟାଗଡ଼/ରଣପୁର: କ୍ୟାମେରାମ୍ୟାନ୍ ମାନସ ସ୍ବାଇଁ ହତ୍ୟାକାଣ୍ଡ ପଛରେ ରହିଛି ରହସ୍ୟମୟ ୬୦ଟି କ୍ଷୁଦ୍ର ଓ ବାହାଘର ଭିଡିଓ। ସମ୍ପୂର୍ଣ୍ଣା ଓ୍ବେବ୍ପୋର୍ଟାଲରୁ ମାନସ ଚାକିରି ଛାଡ଼ିବାପରେ ଅଫିସ କମ୍ପ୍ୟୁଟରରୁ ଏହି ଭିଡିଓଗୁଡିକୁ ଏକ ମେମୋରି କାର୍ଡରେ ନେଇଯିବା ସହିତ ସେଗୁଡିକୁ ଡିଲିଟ୍ କରି ଦେଇଥିଲେ। ଏହି ଭିଡିଓକୁ ଦେଇଦେବା ପାଇଁ ଶର୍ମିଷ୍ଠା ବାରମ୍ବାର କହିଥିଲେ ବି ମାନସ ତାହା ଫେରାଇନଥିଲେ। ଫଳରେ, ମାନସଙ୍କୁ ଅପହରଣ କରି ଅଫିସ କମ୍ପ୍ୟୁଟରରୁ ଡିଲିଟ୍ ହୋଇଥିବା ଭିଡିଓ ରିକ୍ଭରି କରିବାକୁ ଉଦ୍ୟମ କରାଯାଇଥିଲା। ମାନସଙ୍କୁ ଫେବ୍ରୁଆରି ୭ ତାରିଖ ରାତିରେ ଅପହରଣ କରି ଅଫିସକୁ ଅଣାଯାଇଥିଲା। ଡିଲିଟ୍ ହୋଇଥିବା ଡାଟା ରିକଭରି କରିଦେବାକୁ ମାନସ କହିଥିଲେ। କିନ୍ତୁ, ରିକଭରି ନକରିପାରିବାରୁ ତାଙ୍କୁ ପିଟିପିଟି ହତ୍ୟା କରାଯାଇଥିବା ଭଳି ଚାଞ୍ଚଲ୍ୟକର ତଥ୍ୟ ଶର୍ମିଷ୍ଠା କ୍ରାଇମବ୍ରାଞ୍ଚକୁ କହିଥିବା ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ସୁନ୍ଦରପଦା ସମ୍ପୂର୍ଣ୍ଣା ଓ୍ବେବ୍ପୋର୍ଟାଲରେ କ୍ୟାମେରାମ୍ୟାନ୍ ଭାବେ କାମ କରୁଥିବା ମାନସ ସ୍ବାଇଁ ଶେଷଥର ଜାନୁଆରି ୨୯ ତାରିଖରେ ଏକ ଭଜନ ସୁଟିଂ କରିବାପାଇଁ ସୂଚନା ଓ ଲୋକ ସମ୍ପର୍କ ବିଭାଗ ଅଧିକାରୀ ନିରଞ୍ଜନ ସେଠୀ ଓ ଅନ୍ୟ କଳାକାରଙ୍କ ସହିତ ପୁରୀ ଯାଇଥିଲେ। ଠିକ୍ ପରଦିନ ଅର୍ଥାତ୍ ୩୦ ତାରିଖରେ ଚାକିରି ଛାଡ଼ିବା ପୂର୍ବରୁ ଅଫିସ୍ର କମ୍ପ୍ୟୁଟରରେ ଥିବା ପାଖାପାଖି ୬୦ଟି କ୍ଷୁଦ୍ର ଭିଡିଓ ଏବଂ ବାହାଘର ଭିଡିଓ ମାନସ ନିଜ ମେମୋରି କାର୍ଡକୁ କପି କରିବାପରେ ଅଫିସ୍ କମ୍ପ୍ୟୁଟରରୁ ଡିଲିଟ୍ କରି ଗାଏବ ହୋଇଯାଇଥିଲେ। ଯେଉଁ ଭିଡିଓ ପାଇଁ ମାନସଙ୍କୁ ହତ୍ୟା କରାଯାଇଛି, ତାହାକୁ ରିକଭରି କରିବା ପାଇଁ କ୍ରାଇମବାଞ୍ଚ୍ ଅଫିସ କମ୍ପ୍ୟୁଟର ହାର୍ଡଡିସ୍କ୍କୁ ଜବତ କରିବା ସହ ରସୁଲଗଡ଼ ଫରେନସିକ୍ ସାଇନ୍ସ ଲାବରେଟୋରିକୁ ପଠାଇଛି। ଡିଲିଟ୍ ହୋଇଥିବା ଭିଡିଓ ଭିତରେ ସମ୍ପୂର୍ଣ୍ଣା ଓ୍ବେବପୋର୍ଟାଲର କେୟାରଟେକର୍ ଝୁନା ଭୋଇଙ୍କ ବି ଏକ ବାହାଘର ଭିଡିଓ ଥିଲା। ଜଣେ ଗ୍ରାହକ ଯେତେବେଳେ ତାଙ୍କୁ ଏକ ଭିଡିଓ ମାଗିଥିଲେ, ଶର୍ମିଷ୍ଠା ଦେଇ ନପାରି ଅଡ଼ୁଆରେ ପଡ଼ିଥିଲେ। ମାନସ ଭିଡିଓ ନଦେବାରୁ ତାଙ୍କୁ ଅପହରଣ ପରେ ହତ୍ୟା କରାଯାଇଥିବା ଶର୍ମିଷ୍ଠା କ୍ରାଇମବ୍ରାଞ୍ଚକୁ ଜେରାସମୟରେ କହିଥିବା ଜଣାପଡ଼ିଛି।
ଅନ୍ୟପକ୍ଷରେ, ଏହି ଭିଡିଓ ସହିତ ନିରଞ୍ଜନଙ୍କ ସମ୍ପର୍କକୁ ନେଇ କ୍ରାଇମବ୍ରାଞ୍ଚ ସନ୍ଦେହ କରୁଛି। କାରଣ, ଫେବ୍ରୁଆରି ୭ ତାରିଖ ରାତି ୭ଟାରୁ ୧୦ଟା ଯାଏ ନିରଞ୍ଜନ ସମ୍ପୂର୍ଣ୍ଣା ଅଫିସରେ ମାନସଙ୍କୁ ସେ ମାଡ଼ ମାରିଥିଲେ। ଡାଟା ରିକଭରି ପରେ ସବୁ ଘଟଣା ସ୍ପଷ୍ଟ ହୋଇପାରିବ ବୋଲି କୁହାଯାଉଛି। ତେଣେ, ଶର୍ମିଷ୍ଠା ନିକଟରେ ଭିଡିଓ ନଥିବାରୁ ମାନସଙ୍କ ନୟାଗଡ଼ ରଣପୁର ଥାନା ଗୋଡ଼ିପୋଖରୀ ଘରେ ଆଜି କ୍ରାଇମବ୍ରାଞ୍ଚର ଏକ ଟିମ୍ ରାତିସାରା ଯାଞ୍ଚ କରୁଛି। ମାନସ ସମ୍ପୂର୍ଣ୍ଣା ଅଫିସରେ ଚାକିରି କରୁଥିବା ସମୟରେ ନିର୍ଦ୍ଦିଷ୍ଟ ଭାବେ କେଉଁଠି ଘରଭଡ଼ା ନେଇ ରହୁ ନଥିଲେ। ବନ୍ଧୁ ଓ ସହଯୋଗୀଙ୍କ ନିକଟରେ ରହି କାମ ସରିବାପରେ ପୁଣି ନୟାଗଡ଼ ଫେରିଯାଉଥିଲେ। ସେଥିପାଇଁ ମେମୋରି କାର୍ଡ ଘରେ ଲୁଚାଇ ରଖିଥିବା ସନ୍ଦେହରେ ଯାଞ୍ଚ କରାଯାଇଛି। ଅନ୍ୟପଟେ ମାର୍ଚ୍ଚ ୩୧ ତାରିଖରେ ଯାଜପୁର ଚଣ୍ଡିଖୋଲ ଛକର ଦୈତାରୀ ରାସ୍ତାରୁ କ୍ରାଇମବ୍ରାଞ୍ଚ ଜବତ କରିଥିବା ଦରପୋଡ଼ା ଇଅରଫୋନ ଏବଂ ଚପଲ ମାନସଙ୍କର ବୋଲି ପରିବାର ଲୋକ ଚିହ୍ନଟ କରିଥିବା ସାନ ଭାଇ ରକେଶ ସ୍ବାଇଁ କହିଛନ୍ତି। ପ୍ରାୟ ଅଧଘଣ୍ଟା ଧରି କ୍ରାଇମ ବ୍ରାଞ୍ଚ ଟିମ୍ ମାନସଙ୍କ ପତ୍ନୀ ଯମୁନା ସ୍ବାଇଁ, ବାପା ପଞ୍ଚାନନ, ମା’ ଜୟନ୍ତୀ ଓ ସାନ ଭାଇଙ୍କୁ ବିଭିନ୍ନ କଥା ପଚାରି ବୁଝିଥିବା ଜଣାପଡ଼ିଛି। ଭୁବନେଶ୍ବରରେ ମାନସ କାହା ସହ ରହୁଥିଲେ, ସେ ସମ୍ପର୍କରେ ମଧ୍ୟ ପଚାରି ବୁଝିଛନ୍ତି।
ଏହି ହତ୍ୟା ମାମଲାରେ କ୍ରାଇମବ୍ରାଞ୍ଚ ବର୍ତ୍ତମାନ ସୁଦ୍ଧା ୨୫ ଜଣଙ୍କୁ ସାକ୍ଷୀ ଭାବେ ଚିହ୍ନଟ କରିଛି। ଏଥିରେ ଶର୍ମିଷ୍ଠାର ଭାଉଜ, ଝୁନାର ସ୍ବାମୀ ଅରୁଣ ଭୋଇ, ଅଫିସର କମ୍ପ୍ୟୁଟର ଅପରେଟର, ଚାନ୍ଦବାଲିର ସାମ୍ବାଦିକ ଶରତ ପଣ୍ଡାଙ୍କ ସମେତ ଭୁବନେଶ୍ବର ଏକନମ୍ବର ମାର୍କେଟରୁ ଝୋଟ ବ୍ୟାଗ, ସୁତୁଲି, ଗ୍ଲୋଭସ ବିକ୍ରି କରିଥିବା ଦୋକାନୀ, ରାଜାସୁନାଖଳାରୁ ଲୁଣ, ଗଇଁତି, ଫାଉଡ଼ା ବିକ୍ରି କରିଥିବା ଦୋକାନୀଙ୍କୁ ବି କ୍ରାଇମବ୍ରାଞ୍ଚ ସାକ୍ଷୀ ଭାବେ ଯୋଡ଼ିଛି। ଏହି ଘଟଣାରେ ସିବିଆଇ ତଦନ୍ତ କରିବା ପାଇଁ ମାନସଙ୍କ ପରିବାର ଲୋକେ ଆଜି ଦାବି କରିଛନ୍ତି।