ଦୁର୍ଘଟଣାରେ ୫ ମୃତ : ରାଜ୍ୟର ବିଭିନ୍ନ ସ୍ଥାନରେ ଦୁର୍ଘଟଣା ଘଟି ୫ ଜଣଙ୍କର ମୃତ୍ୟୁ ହୋଇଥିବାବେଳେ ଅତିକମ୍‌ରେ ୧୨ ଜଣ ଆହତ ହୋଇଛନ୍ତି

ଦାରିଙ୍ଗବାଡ଼ି : ଏକ ବାଇକ୍‌ ଦୁର୍ଘଟଣାରେ କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ବ୍ରାହ୍ମଣୀଗାଁ ଥାନା ଗୁଡ଼ିକା ଗ୍ରାମର ତାର୍‌ଜନ ବଳିୟାରସିଂ(୨୬) ଓ ଝିଞ୍ଜିରିଗୁଡା ଗ୍ରାମର କୈଳାସ ବେହେରଦଳାଇ(୩୨)ଙ୍କ ମୃତ୍ୟୁହୋଇଛି। ଜୟ ନାୟକ(୨୪) ଓ ଆନନ୍ଦ ବଳିଆରସିଂ(୩୦)ଗୁରୁତର ହୋଇଥିବା ଜଣାପଡ଼ିଛି। ଉଭୟ ଆହତଙ୍କ ଘର ମଧ୍ୟ ଗୁଡିକା ଗାଁରେ ବୋଲି ଜଣାପଡିଛି ଓ ସେମାନଙ୍କୁ ଚିକିତ୍ସା ପାଇଁ ବ୍ରହ୍ମପୁର ସ୍ଥାନାନ୍ତର କରାଯାଇଛି।

ଘୁ.ଉଦୟଗିରି: ଘୁ.ଉଦୟଗିରି ଥାନା ଅଞ୍ଚଳରେ ଦୁଇଟି ଭିନ୍ନ ଦୁର୍ଘଣାରେ ଜଣଙ୍କ ମୃତ୍ୟୁ ହୋଇଥିବା ବେଳେ ୨ ଜଣ ଆହତ ହୋଇଥିବା ଜଣାପଡିଛି। ସୂଚନା ମୁତାବକ ସ୍ଥାନୀୟ କନବାଗେରି ନିକଟ ମୁଖ୍ୟ ସଡ଼କରେ ଅଜଣା ଗାଡି ଧକ୍କାରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି। ମୃତ ବ୍ୟକ୍ତି ଜଣକ ହେଲେ ସ୍ଥାନୀୟ ବ୍ଲକ ଅନ୍ତର୍ଗତ ରାଇକଲା ପଂଚାୟତର କଟଡ଼ଗଣ୍ଡା ଗ୍ରାମର ବିଘ୍ନରାଜ ପ୍ରଧାନ(୪୦)। ରାସ୍ତା ମଝିରେ ମୃତ ବିଘ୍ନରାଜ ଶରୀର ପଡିରହିଥିବାବେଳେ ଆଜି ସକାଳୁ ଲୋକେ ଏହାର ପ୍ରତିବାଦ କରିବା ସହିତ ପଥର ପକାଇ ରାସ୍ତା ଅବରୋଧ କରିଥିଲେ।

ସମ୍ବଲପୁର/ଯୁଯୁମୁରା: ସମ୍ବଲପୁର-କଟକ ୫୫ ନଂ ଜାତୀୟ ରାଜପଥର ଝାଙ୍କରପାଲି କେନାଲ ଛକଠାରେ ସୋମବାର ଅପରାହ୍ନ ପ୍ରାୟ ୨ଟା ବେଳେ ଏକ ଯାତ୍ରୀବାହୀ ଜିପ୍‌ (ଓଆର ୧୫ ଡି ୦୯୬୭)କୁ ଏକ କୋଇଲା ବୋଝେଇ ଟ୍ରକ୍‌ ପଛପଟୁ ଧକ୍କା ଦେଇଥିଲା। ଘଟଣାସ୍ଥଳରେ ହିଁ ଜଣଙ୍କର ମୃତ୍ୟୁ ହୋଇଥିବାବେଳେ ଅନ୍ୟ ୬ ଜଣ ଗୁରୁତର ଆହତ ହୋଇଛନ୍ତି। ମୃତକଙ୍କ ନାମ ତପସ୍ବିନୀ ସାହୁ(୫୯) ଓ ‌ସେ ସ୍ଥାନୀୟ ମୁରାହଲଦି ଗ୍ରାମର ବୋଲି ଜଣାପଡ଼ିଛି।

ପଦ୍ମପୁର: ବରଗଡ଼ ଜିଲ୍ଲା ପଦ୍ମପୁର-ପାଟଣାଗଡ଼ ରାସ୍ତା ରଜାପଡ଼ା ପୋଲ ନିକଟରେ ସୋମବାର ଏକ ପାଣି ଟ୍ୟାଙ୍କର୍‌ ଓଲଟିପଡ଼ିବା ଫଳରେ ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ହୋଇଛି। ଅନ୍ୟ ଦୁଇ ଜଣ ଗୁରୁତର ଆହତ ହୋଇଛନ୍ତି। ମୃତ ମହିଳା ‌େହଲେ, ତାରାବତୀ ସାହା (୪୫)। ୨ ଆହତ ମହିଳା ସୁବର୍ଣ୍ଣ ସାହା (୨୧) ଓ ଦୈମତି ଡନସନା (୩୮)।