‘ମୋ ସରକାର’ରେ ଆଉ ୫ ବିଭାଗ : ଲୋକଙ୍କ ଇଚ୍ଛା ପୂରଣ କରିବାକୁ ଆମେ ବାଧ୍ୟ: ମୁଖ୍ୟମନ୍ତ୍ରୀ
ଭୁବନେଶ୍ବର : ରାଜ୍ୟ ସରକାରଙ୍କ ‘ମୋ ସରକାର’ ଅଭିଯାନରେ ଅାଉ ୫ଟି ବିଭାଗ ସାମିଲ ହୋଇଛି। ସେଗୁଡ଼ିକ ହେଲା ବିଦ୍ୟାଳୟ ଓ ଗଣଶିକ୍ଷା, ଗ୍ରାମ୍ୟ ଉନ୍ନୟନ, ଶକ୍ତି, ଉଚ୍ଚଶିକ୍ଷା ଏବଂ ବିଜ୍ଞାନ ଓ କାରୀଗରି ବିଭାଗ। ଏହି ୫ଟି ବିଭାଗ ସହ ମୋଟ୍ ୨୭ଟି ବିଭାଗ ଏବେ ‘ମୋ ସରକାର’ରେ ସାମିଲ୍ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଆଜି ଲୋକସେବା ଭବନରେ ଆୟୋଜିତ ଏକ କାର୍ଯ୍ୟକ୍ରମରେ ବିଭାଗୁଡ଼ିକୁ ମୋ ସରକାରରେ ସାମିଲ୍ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ, ଲୋକଙ୍କ ଇଚ୍ଛାକୁ ସମ୍ମାନ ଦେବା ଓ ପୂରଣ କରିବା ହେଉଛି ସରକାରୀ କର୍ମଚାରୀଙ୍କ କାମ। ଏହା ସରକାର ପ୍ରାଥମିକ ଦାୟିତ୍ବ। ସବୁ ବିଭାଗ ଏ ସମ୍ପର୍କରେ ନିଜ ନିଜ ଅଧିକାରୀମାନଙ୍କୁ ଆବଶ୍ୟକ ତାଲିମ ଦେବା ସହ ଉପଯୁକ୍ତ ମତାମତ ଗ୍ରହଣ ବ୍ୟବସ୍ଥା କରିବା ଆବଶ୍ୟକ। କର୍ମଚାରୀଙ୍କ ମଧ୍ୟରେ ମୋ ସରକାର ବ୍ୟବସ୍ଥା ସମ୍ପର୍କରେ ସ୍ପଷ୍ଟତା ଆଣିବା ପାଇଁ ତାଲିମ୍ କାର୍ଯ୍ୟକ୍ରମର ଆବଶ୍ୟକତା ରହିଛି। ଏହି ବ୍ୟବସ୍ଥାର ମୂଳ ଆଧାରକୁ କର୍ମଚାରୀମାନେ ବୁଝିଲେ ସେହି ଅନୁଯାୟୀ କାମ କରିବାରେ ସହଜ ହେବ।
ଆମ ସମ୍ବିଧାନ ‘ଉଇ ଦି ପିପୁଲ୍’ରୁ ଆରମ୍ଭ ହୋଇଛି। ଏ ଦେଶର ମହାନ ଜନତା ଆମକୁ ସମ୍ବିଧାନ ଦେଇଛନ୍ତି ଏବଂ ସେମାନଙ୍କ ତରଫରୁ ଶାସନ ଚଳାଇବା ପାଇଁ ଦାୟିତ୍ବ େଦଇଛନ୍ତି। ଆମେ ‘ସେମାନେ ନୁହେଁ’, ଆମେ ‘ସେମାନଙ୍କ ପକ୍ଷରୁ’। ଲୋକମାନେ ଆମକୁ ଦେଇଥିବା ନିର୍ଦ୍ଦିଷ୍ଟ ଦାୟିତ୍ବକୁ ନିର୍ବାହ କରିବା ପାଇଁ ଆମେ ବାଧ୍ୟ। ଏ ସମ୍ପର୍କରେ ଆମେ ସମସ୍ତେ ସ୍ପଷ୍ଟ ହେବାର ଆବଶ୍ୟକତା ରହିଛି।
‘ମୋ ସରକାର’ରେ ସାମିଲ୍ ହୋଇଥିବା ବିଭିନ୍ନ ବିଭାଗର ମନ୍ତ୍ରୀମାନେ ନିଜ ନିଜ ବିଭାଗରେ ମୋ ସରକାର ସଫଳତାର ସହ କାର୍ଯ୍ୟ କରିବ ବୋଲି କହିଥିଲେ। ମୁଖ୍ୟ ଶାସନ ସଚିବ ଅସିିତ ତ୍ରିପାଠୀ ସ୍ବାଗତ ଭାଷଣ ଦେଇଥିଲେ। ୫-ଟି ସଚିବ ଭି କେ ପାଣ୍ଡିଆନ୍ ୫ ବିଭାଗର ଜିଲ୍ଲା ସ୍ତରୀୟ ଅଧିକାରୀମାନଙ୍କ ସହ ଆଲୋଚନା କରିଥିଲେ। ଲୋକଙ୍କ ସମସ୍ୟା ସମାଧାନ କରିବା ପାଇଁ ନିଷ୍ଠାର ସହ କାର୍ଯ୍ୟ କରିବା ସହ ସ୍ବଚ୍ଛତା ରକ୍ଷା କରିବା ଉପରେ ସେ ଗୁରୁତ୍ବାରୋପ କରିଥିଲେ। ଉନ୍ନୟନ କମିସନର୍ ସୁରେଶ ଚନ୍ଦ୍ର ମହାପାତ୍ର ଧନ୍ୟବାଦ ଅର୍ପଣ କରିଥିଲେ।