୯୦% ମାର୍କ ଉପରେ ୫୮୭
ଭୁବନେଶ୍ବର: ଗୋଟିଏ ସମୟରେ ପ୍ରକାଶ ପାଇଥିବା ଯୁକ୍ତ୨ କଳା, ବିଜ୍ଞାନ, ବାଣିଜ୍ୟ ଓ ଧନ୍ଦାମୂଳକ ବିଭାଗରେ ପାସ୍ହାର ବଢ଼ିଛି। ଗତବର୍ଷ ତୁଳନାରେ ଅଧିକ ସଂଖ୍ୟକ ପିଲା ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି। ୯୦%ରୁ ଅଧିକ ନମ୍ବର ରଖିଥିବା ପିଲାଙ୍କ ସଂଖ୍ୟା ମଧ୍ୟ ଉତ୍ସାହଜନକ ରହିଛି। ପ୍ରକାଶ ପାଇଥିବା ୪ଟି ଯାକ ବିଭାଗରେ ୫୮୭ଜଣ ଛାତ୍ରଛାତ୍ରୀ ୯୦% କିମ୍ବା ତା’ଠାରୁ ଅଧିକ ନମ୍ବର ରଖି କୃତକାର୍ଯ୍ୟ ହୋଇଛନ୍ତି। ବିଜ୍ଞାନ ବିଭାଗରେ ସର୍ବାଧିକ ୩୯୪ଜଣ ୯୦% ମାର୍କ ରଖିଥିବା ବେଳେ ବାଣିଜ୍ୟରେ ୧୩୫, କଳାରେ ୫୭ ଓ ଧନ୍ଦାମୂଳକ ବିଭାଗରେ ଜଣେ ପରୀକ୍ଷାର୍ଥୀ ୯୦%ରୁ ଅଧିକ ନମ୍ବର ରଖିବାରେ ସମର୍ଥ ହୋଇଛନ୍ତି। ପୂର୍ବବର୍ଷଗୁଡ଼ିକ ତୁଳନାରେ ଛାତ୍ରଛାତ୍ରୀଙ୍କ ପ୍ରଦର୍ଶନ ଭଲ ରହିଥିବା ଦେଖିବାକୁ ମିଳିଛି।
Sambad is now on WhatsApp
Join and get latest news updates delivered to you via WhatsApp
ବାଣିଜ୍ୟ ବିଭାଗରେ ୭୦୦୯ଜଣ ପ୍ରଥମ, ୪୬୦୯ଜଣ ଦ୍ବିତୀୟ ଓ ୯୫୫୮ଜଣ ତୃତୀୟ ଶ୍ରେଣୀରେ କୃତକାର୍ଯ୍ୟ ହୋଇଛନ୍ତି। କଳାହାଣ୍ଡି ଜିଲ୍ଲାର ପାସ୍ହାର ସର୍ବାଧିକ ୯୩.୨୩% ଓ ବୌଦ୍ଧ ଜିଲ୍ଲାରେ ପାସ୍ହାର ୩୫% ରହିଛି। କଳା ବିଭାଗରେ ୩୦ ହଜାର ୫୨୫ଜଣ ପ୍ରଥମ ଶ୍ରେଣୀ, ୩୦ହଜାର ୨୮୭ ଦ୍ବିତୀୟ ଓ ୧ ଲକ୍ଷ ୨୯ହଜାର ୪୧୨ଜଣ ତୃତୀୟ ଶ୍ରେଣୀରେ ପାସ୍ କରିଛନ୍ତି। ବରଗଡ଼ ଜିଲ୍ଲାର ପାସ୍ହାର ୮୮.୬୧% ଥିବା ବେଳେ ନବରଙ୍ଗପୁରର ପାସ୍ହାର ୭୦.୯୮% ହୋଇଛି। ବିଜ୍ଞାନ ବିଭାଗରେ ୫୨ହଜାର ୯୨ଜଣ ପ୍ରଥମ, ୩୦ହଜାର ୧୮୬ଜଣ ଦ୍ବିତୀୟ ଓ ୧୭ହଜାର ୬୮୧ଜଣ ତୃତୀୟ ଶ୍ରେଣୀରେ ପାସ୍ କରିଛନ୍ତି। ନୟାଗଡ଼ ଜିଲ୍ଲାର ପାସ୍ହାର ସର୍ବାଧିକ ୯୬.୭୭% ଓ ବୌଦ୍ଧରେ ସର୍ବନିମ୍ନ ପାସ୍ହାର ୫୯.୮୯% ହୋଇଛି।
ଡିଜିଲକର୍ରେ ମାର୍କସିଟ୍ ଓ ସାର୍ଟିଫିକେଟ୍
ପରୀକ୍ଷା ଫଳ ପ୍ରକାଶ ପାଇବା କ୍ଷଣି ଛାତ୍ରଛାତ୍ରୀଙ୍କୁ ମାର୍କସିଟ୍ ଓ ସାର୍ଟିଫିକେଟ୍ ପ୍ରଦାନ କରାଯାଇଛି। ଡିଜିଲକର୍ ମାଧ୍ୟମରେ ପିଲାମାନେ ମାର୍କସିଟ୍ ଓ ସାର୍ଟିଫିକେଟ୍ ପରି ଡିଜିଟାଲ ଏକାଡେମିକ ଡକ୍ୟୁମେଣ୍ଟ ଉପଲବ୍ଧ ହୋଇଛି। ଛାତ୍ରଛାତ୍ରୀ ନିଜ ନିଜ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକରୁ ପରିଷଦ ଦ୍ବାରା ପ୍ରଦାନ କରାଯାଇଥିବା ସାର୍ଟିଫିକେଟ୍ ଓ ମାର୍କସିଟ୍ର ହାର୍ଡକପି ମଧ୍ୟ ପାଇପାରିବେ।
ଜୁନ୍ ଶେଷ ସପ୍ତାହରେ ଇନ୍ଷ୍ଟାଣ୍ଟ ପରୀକ୍ଷା
ଯୁକ୍ତ୨ରେ ପାଇଥିବା ମାର୍କକୁ ନେଇ ଯଦି କୌଣସି ଛାତ୍ରଛାତ୍ରୀଙ୍କର କିଛି ବି ଅଭିଯୋଗ ରହିଥିବ ସେମାନେ ପୁନଃଯାଞ୍ଚ ଓ ପୁନଃଯୋଗ ପାଇଁ ଆବେଦନ କରିପାରିବେ। ଏନେଇ ଜୁନ୍ ୧ ମଧ୍ୟରେ ବିଜ୍ଞପ୍ତି ପ୍ରକାଶ ପାଇବ। ସେହିପରି ଯେଉଁ ପରୀକ୍ଷାର୍ଥୀ ଗୋଟିଏ ବିଷୟରେ ଫେଲ୍ ହୋଇଥିବେ ସେମାନଙ୍କ ପାଇଁ ଅନୁଷ୍ଠିତ ହେବାକୁ ଥିବା ଇନ୍ଷ୍ଟାଣ୍ଟ ପରୀକ୍ଷା ଜୁନ୍ ଶେଷ ସପ୍ତାହରେ ଅନୁଷ୍ଠିତ ହେବ ବୋଲି ପରିଷଦ ପକ୍ଷରୁ ସୂଚନା ଦିଆଯାଇଛି।