ତେଲେଙ୍ଗାନାରେ ବନ୍ଧା ପଡ଼ିଛନ୍ତି ୬ ଶ୍ରମିକ

ନୂଆପଡ଼ା: ନୂଆପଡ଼ା ଜିଲ୍ଲାରେ ପୁଣି ଦାଦନ ଦୁଃଖ ଦେଖିବାକୁ ମିଳିଛି। ଜୋଙ୍କ ଥାନା ସରେଇପାଲି ଗାଁର ଗୋଟିଏ ପରିବାରର ୬ ଜଣ ତେଲେଙ୍ଗାନା ରାଜ୍ୟକୁ କାମ କରିବାକୁ ଯାଇଥିବା ବେଳେ ସେଠାରେ ବନ୍ଧକ ପଡ଼ିଥିବା ଅଭିଯୋଗ ହୋଇଛି। ଏନେଇ ପରିବାର ମୁଖ୍ୟ ଜୋଙ୍କ ଥାନାରେ ଅଭିଯୋଗ କରି ପରିବାର ସଦସ୍ୟଙ୍କୁ ଉଦ୍ଧାର କରିବାକୁ ନିବେଦନ କରିଛନ୍ତି।

ସୂଚନାମତେ, ସରେଇପାଲି ଗ୍ରାମର ଗୋକୁଳ ବରିହାଙ୍କ ପରିବାରର ଜୀବନ ବରିହା (୩୩), ସବିତା ବରିହା (୨୧), ଆଲେଖ ବରିହା (୧୮), ଘନାରାମ ବରିହା (୨୪), ମହେନ୍ଦ୍ର ବରିହା (୨୪) ଓ ଜନକ ବରିହା (୧୮) ଦାଦନ ସର୍ଦ୍ଦାର ମୁଜୀବ ଖାନଙ୍କ କଥାରେ ପଡ଼ି ଗତ ୨୮ ଡିସେମ୍ବରରେ ତେଲେଙ୍ଗାନାକୁ କାମ କରିବାକୁ ଯାଇଥିଲେ। ତେଲେଙ୍ଗାନା ରାଜ୍ୟ ପାଇଦାପାର୍ଲି ଥାନା କରିମନଗର ଜିଲ୍ଲାରେ ଏକ ଇଟାଭାଟି କାମ କରିଥିଲେ। କିଛି ଦିନ କାମ କରିବା ପରେ ପରିବାର ଲୋକଙ୍କୁ ନିର୍ଯାତନା ଦିଆଯାଇଥିଲା। ପରେ ସେମାନେ ଜୀବନରେ ବିପଦ ରହିଥିବା ଜାଣିବାକୁ ପାଇଥିଲେ।

ଏଥିସହ ସେମାନଙ୍କୁ ଉଦ୍ଧାର କରିବା ପାଇଁ ଗୋକୁଳଙ୍କୁ ଫୋନ୍‌ ମାଧ୍ୟମରେ ଜଣାଇଥିଲେ। ଏନେଇ ଗୋକୁଳ ତୁରନ୍ତ ଦାଦନ ସର୍ଦ୍ଦାରଙ୍କୁ ଜଣାଇବା ସହ ଇଟାଭାଟି ମାଲିକଙ୍କ ସହ କଥାବାର୍ତ୍ତା ହୋଇଥିଲେ। ପରିବାର ଲୋକଙ୍କୁ ଘରକୁ ପଠାଇ ଦେବା ପାଇଁ ଗୋକୁଳ ଇଟାଭାଟି ମାଲିକଙ୍କ ଭଣଜାକୁ ୨୫ ହଜାର ଟଙ୍କା ପଠାଇଥିଲେ। ହେଲେ ଦୀର୍ଘ ଦିନ ବିତିଯାଇଥିଲେ ମଧ୍ୟ ସେମାନଙ୍କୁ ଛାଡ଼ି ନଥିବାରୁ ଗୋକୁଳ ଚିନ୍ତା ପ୍ରକଟ କରିଛନ୍ତି। ପରିବାର ଲୋକଙ୍କୁ ବହୁ ନିର୍ଯାତନା ଦିଆଯାଉଥିବା ଜାଣିବା ପରେ ସେମାନଙ୍କୁ ଉଦ୍ଧାର କରିବାକୁ ଗୋକୁଳ ବରିହା ଆଜି ଖରିଆରରୋଡ଼ ଜୋଙ୍କ ଥାନାର ଦ୍ବାରସ୍ଥ ହୋଇଛନ୍ତି।