ସମ୍ବଲପୁର: ମାତ୍ର ୨ ବର୍ଷରେ ସମ୍ବଲପୁର ଜିଲ୍ଲା ରେଙ୍ଗାଲି ବ୍ଲକର ୬,୪୭୫ ହେକ୍ଟର ଚାଷ ଜମି ଉଭାନ୍ ହୋଇଯାଇଛି। ୨୦୨୨ ମସିହାରେ ରେଙ୍ଗାଲି ବ୍ଲକ୍ରେ ୨୦ ହଜାର ୪୪୦ ହେକ୍ଟର ଚାଷ ଜମି ଥିଲା। କିନ୍ତୁ ୨୦୨୪ ମସିହା ବେଳକୁ ଏହା ୧୩ ହଜାର ୯୬୫.୦୭ ହେକ୍ଟରକୁ ଖସି ଆସିଛି। ତେଣୁ ଧାନ ଉତ୍ପାଦନ ୭.୧୭ ଲକ୍ଷ କ୍ବିଣ୍ଟାଲରୁ ୬.୮୪ ଲକ୍ଷ କ୍ବିଣ୍ଟାଲ ଏବଂ ଡାଲି ଜାତୀୟ ଫସଲ ଉତ୍ପାଦନ ୧୪ ହଜାର ୩୨୦ କ୍ବିଣ୍ଟାଲରୁ ୩,୮୮୪ କ୍ବିଣ୍ଟାଲକୁ ହ୍ରାସ ପାଇଛି। ଉଭାନ୍ ହୋଇଥିବା ଚାଷ ଜମି ମଧ୍ୟରେ କେବଳ ଶିଳ୍ପ ପ୍ରଭାବିତ ରେଙ୍ଗାଲି, ଠେଲକୋଲୋଇ କିମ୍ବା ବମାଲୋଇ ନାହିଁ, ବରଂ ଲଇଡ଼ା ଓ ରେଙ୍ଗଲୋଇ ଭଳି ଅଣଶିଳ୍ପାଞ୍ଚଳ ପଞ୍ଚାୟତ ମଧ୍ୟ ରହିଛି। ଏହାକୁ ନେଇ ରେଙ୍ଗାଲି ବ୍ଲକ କୃଷି ଅଧିକାରୀ କହିଛନ୍ତି, କାହିଁ କେତେ ବର୍ଷ ହେଲା କୃଷି ଜମିର ସର୍ଭେ କରାଯାଉ ନଥିଲା। ଏହି ସମୟ ମଧ୍ୟରେ ବ୍ଲକ୍ର ଅନେକ ଚାଷଜମି ଶିଳ୍ପ ପାଇଁ ଅଧିଗୃହୀତ ହୋଇଛି। ଚାଷଜମି ଅଣକୃଷି କାର୍ଯ୍ୟରେ ବ୍ୟବହୃତ ହୋଇଛି। ୨୦୨୪ ମସିହାରେ କୃଷି, ରାଜସ୍ବ, ପରିସଂଖ୍ୟାନ ଓ ଜଳସେଚନ ବିଭାଗର ମିଳିତ ସର୍ଭେ ପରେ ଚାଷ ଜମି ସଙ୍କୁଚିତ ହୋଇଥିବା ଜଣାପଡ଼ିଛି।
ସମ୍ବଲପୁର ଜିଲ୍ଲା ରେଙ୍ଗାଲି ବ୍ଲକ ତଲାବିରାର ଲଳିତ ବୁଧିଆ ୧୦ ଏକର ଚାଷ ଜମିରେ ଧାନ ଓ ପରିବା ଚାଷ କରୁଥିଲେ। କିନ୍ତୁ ୨୦୨୦ ମସିହାରେ ଏଠାରେ ଖଣି ଖନନ ଆରମ୍ଭ ହେବା ଦିନଠାରୁ ସବୁ ବନ୍ଦ ହୋଇଯାଇଛି। ଚାଷ ଜମିରେ ଖଣି ମାଟି ପଡ଼ିଛି। ନୂଆଖିଣ୍ଡାର ନାରାୟଣ ବସରା କହନ୍ତି, ସ୍ଥାନୀୟ ଗ୍ରାମ୍ୟଦେବୀଙ୍କ ୧୭ ଏକର ୬୪ ଡିସିମିଲ ଜମିରେ ଚାଷ ହେଉଥିଲା। କିନ୍ତୁ ୨୦୧୯ ମସିହାରୁ ଏହି ଝାଙ୍କର ଜମିରେ ଖଣିର ଓବି ଡମ୍ପ ମାଟି ପକାଇ ଦିଆଯିବାରୁ ଏହା ଚାଷ ଅନୁପଯୋଗୀ ହୋଇଛି। ସ୍ଥାନୀୟ ଅଧିବାସୀଙ୍କ ଅନୁସାରେ, ଗୋଟିଏ ସମୟରେ ରେଙ୍ଗାଲି ବ୍ଲକ୍ରେ ବ୍ୟାପକ ପରିମାଣରେ ପରିବା ଚାଷ ହେଉଥିଲା। କିନ୍ତୁ ୨୦୦୩ ମସିହାରୁ କାରଖାନା ପାଇଁ ବ୍ୟାପକ ଜମି ଅଧିଗ୍ରହଣ ଯୋଗୁ ଏଠାରେ ପରିବା ଚାଷ ସମ୍ପୂର୍ଣ୍ଣ ଠପ୍ ହୋଇଯାଇଛି। ରେଙ୍ଗାଲି, ଠେଲକୋଲୋଇ, ଜଙ୍ଗଲା, ବୋମାଲୋଇ, ଲପଙ୍ଗା ଆଦି ପଞ୍ଚାୟତରେ ଶିଳ୍ପ ଯୋଗୁ ଚାଷ ବନ୍ଦ ହୋଇଛି। ଶିଳ୍ପାୟନର ପ୍ରଭାବ ଅନ୍ୟ ପଞ୍ଚାୟତଗୁଡ଼ିକରେ ବି ପଡ଼ିଛି। ସେଠାରେ ମଧ୍ୟ ଚାଷ ଜମି କୋଠାବାଡ଼ି ନିର୍ମାଣ କିମ୍ବା ଅନ୍ୟ ଉଦ୍ଦେଶ୍ୟରେ ବିକ୍ରି ହୋଇଛି। ଚାଷ ଜମିଗୁଡ଼ିକ ସଙ୍କୁଚିତ ହେବା କାରଣରୁ ଧାନ ଓ ଅଣଧାନ ଚାଷ ସଙ୍କୁଚିତ ହୋଇଛି। ୨୦୨୨-୨୪ ମସିହା ମଧ୍ୟରେ ଧାନଚାଷ ୧୧ ହଜାର ୯୫୫ ହେକ୍ଟରରୁ ୧୦ ହଜାର ୬୮୯ ହେକ୍ଟର, ଡାଲି ଜାତୀୟ ଫସଲ ୩,୫୮୦ ହେକ୍ଟରରୁ ୯୭୧ ହେକ୍ଟର ଏବଂ ତୈଳବୀଜ ଚାଷ ୨୮୦ ହେକ୍ଟରରୁ ୧୫୫.୫ ହେକ୍ଟରକୁ ହ୍ରାସ ପାଇଛି।
Advertisment

Sambad is now on WhatsApp
Join and get latest news updates delivered to you via WhatsApp