ଖୋର୍ଦ୍ଧା: ଖୋର୍ଦ୍ଧା ଓ ଆଖପାଖ ଅଂଚଳରେ ଗତ ୫-୬ ମାସ ଧରି ହୋଇଥିବା ଏକାଧିକ ଚୋରି ଓ ଲୁଟ ଘଟଣାରେ ସମ୍ପୃକ୍ତ ଥିବା ଏକ ଡକାୟତ ଗ୍ୟାଙ୍ଗର ୭ ଜଣ ସଦସ୍ୟଙ୍କୁ ଆଜି ସକାଳେ ଖୋର୍ଦ୍ଧା ଟାଉନ୍ ଥାନା ପୁଲିସ ଗିରଫ କରିଛି । ଗିରଫ ୭ ଜଣଙ୍କ ନିକଟରୁ ଖଣ୍ଡା, ଫାର୍ସା, ଚାପଡ (କାତି), ଲୁହା ରଡ୍, ଟର୍ଚ୍ଚ ଲାଇଟ୍ ଓ ମୋଟର ସାଇକଲ ଏବଂ ଚୋରି କରି ଫେରାର୍ ହେବା ନିମନ୍ତେ ଖୋର୍ଦ୍ଧା ସହରର ବିଭିନ୍ନ ମାର୍ଗ ଥିବା ଏକ ହାତ ତିଆରି ମ୍ୟାପ୍ ଜବତ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଆଜି ସକାଳ ପ୍ରାୟ ସାଢ଼େ ୬ଟା ବେଳେ ମୁକୁନ୍ଦପ୍ରସାଦ ନିକଟ ଗୋଶାଳା ପଡ଼ିଆର ଏକ ପରିତ୍ୟକ୍ତ ଘରେ କେତେକ ଯୁବକ ସନ୍ଦିଗ୍ଧ ଅବସ୍ଥାରେ ଥିବା ପୁଲିସ ସୂଚନା ପାଇଥିଲା । ସୂଚନା ପରେ ଏସ୍ପି ରାଜକିଶୋର ଦୋରାଙ୍କ ନିର୍ଦ୍ଦେଶରେ ଏସ୍ଡିପିଓ ସୁଶୀଲ କୁମାର ମିଶ୍ରଙ୍କ ତତ୍ୱବଧାନରେ ଟାଉନ୍ ଥାନା ଆଇଆଇସି ସଂଜୟ ପଟ୍ଟନାୟକଙ୍କ ନେତୃତ୍ୱରେ ଏସ୍ଆଇ ଦିଗ୍ବିଜୟ ବିଶ୍ୱାଳ, ବିଜୟ କେତନ ବେହେରା, ଏଏସ୍ଆଇ ଶରତ ଚନ୍ଦ୍ର ପ୍ରଧାନଙ୍କୁ ନେଇ ଏକ ୮ ଜଣିଆ ପୁଲିସ୍ ଟିମ୍ ଘଟଣାସ୍ଥଳରେ ପହଂଚି ଚାରିପଟୁ ଘେରାବନ୍ଦୀ କରିଥିଲେ । ଏହି ଚଢ଼ଉରେ ୭ଜଣ ଯୁବକ ଧରାପଡ଼ିଥିଲେ । ସେମାନେ ହେଲେ ଜଟଣୀ ବେଣାପଂଜରୀର ସେକ୍ ଇବାଦୁଲ୍ଲା(୨୦), ସେକ୍ ୟୁସୁଫ୍ ଓରଫ ରିଙ୍କୁ ଓରଫ ହାଣ୍ଡି (୨୧), ଜେମାଦେଈର ମଇନା ବେହେରା ଓରଫ ସଂଜୟ (୨୭), ଭାଲିଆବାଡ଼ିର ବିପିନ ବେହେରା ଓରଫ ନିଲୁ (୨୨), ଜେମାଦେଈର ସନ୍ତୋଷ ସାହୁ ଓରଫ ଓବରାଇ (୩୩), ଦିପୁ ପରିଡ଼ା (୨୮) ଓ ଚନ୍ଦକା ହରିଡ଼ାମାଡ଼ର ବିକାଶ ବେହେରା (୨୦) ।
ଏନେଇ ସୂଚନା ଦେଇ କହିଛନ୍ତି ଯେ ସେମାନଙ୍କ ନିକଟରୁ ଗୋଟିଏ ଖଣ୍ଡା, ଗୋଟିଏ ଫାର୍ସା, ୨ଟି କାତି, ୩ଟି ଲୁହା ରଡ୍, ୪ଟି ଟର୍ଚ୍ଚ ଲାଇଟ୍, ୨ଟି ବାଇକ୍ (ଓଆର୍ ୦୨ ଟି ୨୫୩୪ ଏବଂ ଓଡି ୩୩ ଟି ୨୨୯୭) ଓ ଗୋଟିଏ ମ୍ୟାପ୍ ଜବତ ହୋଇଛି । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରୁ ସେକ୍ ଇବାଦୁଲ୍ଲା, ସେକ୍ ୟୁସୁଫ୍ ଚଳିତ ବର୍ଷ ମଇ ୧୩ ତାରିଖରେ ଗଡ଼ ଖୋର୍ଦ୍ଧା ଜଗନ୍ନାଥ ମନ୍ଦିରରୁ ଲୁଟ ଓ ଜୁନ୍ ୧୪ ତାରିଖରେ ବାଟମଙ୍ଗଳା ଛକ ଠାରେ ଥିବା ଏକ ପାନ ଦୋକାନ ଲୁଟରେ ସମ୍ପୃକ୍ତ ଅଛନ୍ତି । ପରେ ସେମାନଙ୍କୁ ପଚରାଉଚୁରାରେ ସେମାନଙ୍କ ଘରୁ ମନ୍ଦିରରୁ ଲୁଟ କରିନେଇଥିବା ଦାନ ବାକ୍ସ, ବିସ୍କୁଟ୍, ଟୁଥ୍ପେଷ୍ଟ, ସିଗାରେଟ୍, ସାନିଟାଇଜର, ଫିନଲ୍ ଆଦି ଉଦ୍ଧାର କରାଯାଇଛି ।
ଆଜିର ଘଟଣାରେ ଭାରତୀୟ ପିଙ୍ଗଳକୋଡ୍ ଦଫା ୩୯୯, ୪୦୨, ୨୯୪, ୫୦୬ ଓ ୨୫ ବେଆଇନ ଅସ୍ତ୍ରଶସ୍ତ୍ର ଆଇନରେ ୨୩୯/୨୦୨୧ରେ ମାମଲା ରୁଜୁ କରାଯିବା ସହ କୋର୍ଟ ଚାଲାଣ କରାଯାଇଛି ।