ଅଂଶୁଘାତ: ଗୋଟିଏ ଦିନରେ ୭ ମୃତ
ଭୁବନେଶ୍ବର : ପ୍ରଚଣ୍ଡ ଖରାର ପ୍ରକୋପରେ ଛଟପଟ ହେଉଛନ୍ତି ରାଜ୍ୟବାସୀ। ଅଂଶୁଘାତ ଯୋଗୁଁ ଆଜି ବିଭିନ୍ନ ସ୍ଥାନରେ ୭ ଜଣ ପ୍ରାଣ ହରାଇଥିବାର ଅଭିଯୋଗ ହୋଇଛି। କେବଳ ବରଗଡ଼ ଜିଲ୍ଳାର ବରଗଡ଼ ବ୍ଲକରେ ତିନି ଜଣ ପ୍ରାଣ ହରାଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକ ବାଲିସାହିପାଟଣା ପଂଚାୟତ ମଧୁପୁର ଗାଁର ଭୋଳାନାଥ ନାୟକ (୬୫) ମଧ୍ୟ ଅଂଶୁଘାତରେ ପ୍ରାଣ ହରାଇଥିବାର ଅଭିଯୋଗ ହୋଇଛି।
ଖୋର୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ସାନ ହନ୍ତୁଆଡ ଶ୍ୟାମସୁନ୍ଦରପୁର ଗ୍ରାମର ସ୍ବର୍ଗତ କପିଳ ବିଶ୍ବାଳଙ୍କ ପତ୍ନୀ କୁମୁଦ (୬୦)ଙ୍କର ଆଜି ଅଂଶୁଘାତରେ ମୃତ୍ୟୁ ହୋଇଥିବା ତାଙ୍କ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଛି।
ରାଇରଙ୍ଗପୁର ବାଇଦାପୋଷି ପ୍ରାଥମିକ ସ୍କୁଲ ନିକଟରେ ଜନୈକ ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଛି। ମୃତ ବ୍ୟକ୍ତି ଜଣକ ବଣପାଖନା ପଞ୍ଚାୟତର ଗଡ଼ସାହିର ରାମସିଂହ ମୁର୍ମୁଙ୍କ ପୁଅ ଦୁର୍ଗା ଚରଣ ମୁର୍ମୁ। ଦୁର୍ଗାଙ୍କ ମୃତ୍ୟୁ ଅଂଶୁଘାତଜନିତ ବୋଲି ପରିବାର ଲୋକେ ଥାନାରେ ଅଭିଯୋଗ କରିଛନ୍ତି।
ଗଞ୍ଜାମ ଜିଲ୍ଲା ବେଗୁନିଆପଡ଼ା ବ୍ଲକରେ ଆଜି କ୍ଷେତ୍ରରେ ଡ୍ୟୁଟିରତ ଜଣେ କନିଷ୍ଠ ଯନ୍ତ୍ରୀଙ୍କ ଅଂଶୁଘାତରେ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ପୂର୍ବାହ୍ନ ୧୧ଟାରେ କୁମ୍ଭାରଗାଁ ପଞ୍ଚାୟତ ଦାୟିତ୍ବରେ ଥିବା ବେଗୁନିଆପଡ଼ା ବ୍ଳକ କନିଷ୍ଠ ଯନ୍ତ୍ରୀ ସୁଧୀର କୁମାର ହୋତା(୫୨) କ୍ଷେତ୍ର ପରିଦର୍ଶନ କରି ବ୍ଲକକୁ ଫେରିବା ସମୟରେ ଅଙ୍ଗାର ଗାଁ ଠାରେ ହଠାତ୍ ମୁଣ୍ଡ ବୁଲାଇ ତଳେ ପଡ଼ି ଯାଇଥିଲେ। ତାଙ୍କୁ ସ୍ଥାନୀୟ ଲୋକେ ତୁରନ୍ତ ସୁମଣ୍ଡଳ ମେଡିକାଲ୍ରେ ଭର୍ତ୍ତି କରିଥିଲେ। ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ଏମ୍କେସିଜିକୁ ସ୍ଥାନାନ୍ତର କରା ଯାଇଥିଲା। ମେଡିକାଲ୍ରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ଘଟିଥିବା ଡାକ୍ତର ଜଣାଇଥିଲେ।