ବ୍ରହ୍ମଗିରି ନିକଟରେ ଓଲଟିଲା ପର୍ଯ୍ୟଟକଙ୍କ ବସ୍‌; ୭ ଯାତ୍ରୀ ଆହତ

ବ୍ରହ୍ମଗରି: ପୁରୀ ଜିଲ୍ଲା ବ୍ରହ୍ମଗିରି ଥାନା ଅଧୀନ ହଳଦିଆ ଛକ ନିକଟରେ ଆଜି ସନ୍ଧ୍ୟା ସମୟରେ ପର୍ଯ୍ୟଟକମାନଙ୍କ ଏକ ବସ୍‌ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୭ ଜଣ ଯାତ୍ରୀ ଆହତ ହୋଇଛନ୍ତି।

ସୂଚନା ଅନୁସାରେ ଆଜି ପୂର୍ବାହ୍‌ଣରେ ପଶ୍ଚିମବଙ୍ଗର ୩୫ ଜଣ ପର୍ଯ୍ୟଟକ ଏକ ବସ୍‌ରେ ସାତପଡ଼ା ବୁଲିବାକୁ ଯାଇଥିଲେ। ସେମାନେ ସେଠାରେ ଚିକିଲା ହ୍ରଦରେ ବୁଲାବୁଲି କରିଥିଲେ। ଅପରାହ୍ଣରେ ପଶ୍ଚିମବଙ୍ଗର ପର୍ଯ୍ୟଟକମାନେ ବସ୍‌ରେ ସାତପଡ଼ାରୁ ପୁରୀ ଫେରୁଥିଲେ। ସନ୍ଧ୍ୟା ପ୍ରାୟ ୫ଟାରେ ହଳଦିଆ ଛକ ନିକଟରେ ସେମାନଙ୍କର ବସ୍‌ ଦୁର୍ଘଟଣା ହୋଇଥିଲା। ବ୍ରେକ୍‌ ଫେଲ୍‌ ହେବାରୁ ବସ୍‌ଟି ରାସ୍ତାକଡ଼କୁ ଓଲଟିପଡ଼ିଥିଲା।

ସୂଚନା ପାଇ ବ୍ରହ୍ମଗିରି ଓ ପୁରୀରୁ ଦମକଳବାହିନୀ ଆସିଥିଲେ। ସେହିପରି ସ୍ଥାନୀୟ ପୁଲିସ ମଧ୍ୟ ଘଟଣାସ୍ଥଳକୁ ପହଞ୍ଚି ଥିଲା। ଆହତମାନଙ୍କୁ ଉଦ୍ଧାର କରାଯାଇ ଡାକ୍ତରଖାନା ପଠାଯାଇଥିଲା। ତେବେ ଯାତ୍ରୀମାନେ ସାମାନ୍ୟ ଆହତ ହୋଇଥିବାରୁ ପ୍ରାଥମିକ ଚିକିତ୍ସା ପରେ ସମସ୍ତଙ୍କୁ ଛାଡ଼ି ଦିଆଯାଇଥିଲା। ସ୍ଥାନୀୟ ଲୋକଙ୍କର ସହାୟତ‌ାରେ ପର୍ଯ୍ୟଟକଙ୍କ ବସ୍‌କୁ ପୁଲିସ ଉଦ୍ଧାର କରିଛି।