ଜିଲ୍ଲାରେ ୭୯ ପ୍ରତିଶତ ନବଜାତ ସଂପୂର୍ଣ୍ଣ ଟିକାକରଣରୁ ବଂଚିତ
ଖୋର୍ଦ୍ଧା: ଖୋର୍ଦ୍ଧା ଜିଲ୍ଲାରେ ୭୧ ପ୍ରତିଶତ ନବଜାତ ସଂପୂର୍ଣ୍ଣ ଟିକାକରଣରୁ ବଂଚିତ । ୪୮ ପ୍ରତିଶତ ଗର୍ଭବତୀ ମହିଳା ଆଂଟିନାଟାଲ୍ କେୟାର୍ ପଂଜୀକରଣରୁ ବଂଚିତ । ୧୭ ପ୍ରତିଶତ ଗର୍ଭବତୀ ମହିଳା ଆଇରନ ଫଲିକ୍ ଏସିଡ୍ ଟାବେଲ୍ଟ (ଲୌହ ବଟିକା)ପାଇବାରୁ ବଂଚିତ । ୧୬ ପ୍ରତିଶତ କାଲସିଅମ୍ ଟାବଲେଟ୍ ପାଇବାରୁ ବଂଚିତ । ଜିଲ୍ଲାର ଗର୍ଭବତୀ ମହିଳା ଓ ନବଜାତ ଶିଶୁଙ୍କ ସ୍ୱାସ୍ଥ୍ୟସେବାର ଏଭଳି ବିକଳିଆ ସ୍ଥିତିର ପରିସଂଖ୍ୟାନ ଆଜି ଜିଲ୍ଲାସ୍ତରୀୟ ସମୀକ୍ଷା ବୈଠକରେ ଉପସ୍ଥାପିତ କରାଯାଇଛି ।
ଆଜି ପୂର୍ବାହ୍ଣରେ ଜିଲ୍ଳାପାଳ କେ ସୁଦର୍ଶନ ଚକ୍ରବର୍ତୀଙ୍କ ଅଧ୍ୟକ୍ଷତାରେ ଜିଲ୍ଳା ମୁଖ୍ୟ ଚିକିତ୍ସାଳୟର ଏଡିଏଚ୍ଓ କକ୍ଷରେ ଜିଲ୍ଲାର ଗର୍ଭବତୀ ମହିଳା ଓ ନବଜାତ ଶିଶୁଙ୍କ ସ୍ୱାସ୍ଥ୍ୟସେବା, ମହିଳା ଓ ଶିଶୁ ମୃତ୍ୟୁହାର ଆଦି ନେଇ ସମୀକ୍ଷା ବୈଠକ ହୋଇଥିଲା ।
Sambad is now on WhatsApp
Join and get latest news updates delivered to you via WhatsApp
ବୈଠକରୁ ମିଳିଥିବା ସୂଚନାନୁସାରେ, ଚଳିତ ବର୍ଷ ଜୁନ୍ ମାସ ସୁଦ୍ଧା ଜିଲ୍ଲାରେ ୫୨ ପ୍ରତିଶତ ମହିଳା ଆଂଟିନାଟାଲ୍ କେୟାର୍ ପାଇଁ ପଂଜୀକରଣ କରିଛନ୍ତି । ଏହା ମଧ୍ୟରୁ ଜଟଣୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର (ସିଏଚ୍ସି)ରେ ସର୍ବାଧିକ ୧୩୧ ପ୍ରତିଶତ, ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ୯୧ ପ୍ରତିଶତ, ବାଣପୁର ସିଏଚ୍ସିରେ ୭୮ ପ୍ରତିଶତ, ମେଣ୍ଢାଶାଳ ସିଏଚ୍ସିରେ ୭୪%, ଭୁବନେଶ୍ୱର ସହାରାଂଚଳରେ ୭୪ ପ୍ରତିଶତ, ବାଲୁଗାଁ ୬୯%, କାଳକାଟି ୬୯%, ଟାଙ୍ଗୀ ୬୪%, ମୁକୁନ୍ଦପ୍ରସାଦ ସହରାଂଚଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ୬୦%, ବେଗୁନିଆ ୫୭%, ବାଲିପାଟଣା ୫୭%, ବୋଲଗଡ଼ ୫୪%, କୁଦିଆରୀ ସହରାଂଚଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ୫୦% ପ୍ରତିଶତ ରହିଛି । ଗର୍ଭବତୀ ମହିଳାଙ୍କୁ ଲୌହ ବଟିକା ମିଳିବାରେ ଜିଲ୍ଲାର ହାରାହାରି ହାର ୮୩ ପ୍ରତିଶତ ଥିବା ବେଳେ ଭୁବନେଶ୍ୱର ସହାରାଂଚଳ ଓ ବାଳକାଟି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଂଚଳରେ ଏହା ଜିଲ୍ଲା ହାର ଠାରୁ ସର୍ବନିମ୍ନ ରହିଛି । ଭୁବନେଶ୍ୱର ସହରାଂଚଳରେ ୭୬% ପ୍ରତିଶତ ଥିବା ବେଳେ ବାଳକାଟିରେ ଏହା ୭୪% ପ୍ରତିଶତ ରହିଛି । କାଲସିଅମ ବଟିକା ପାଇବାରେ ଜିଲ୍ଲାର ହାରାହାରି ହାର ୮୪% ପ୍ରତିଶତ ଥିବା ବେଳେ ଭୁବନେଶ୍ୱର ସହରାଂଚଳ ଓ ବାଳକାଟି ସିଏଚ୍ସିରେ ଏହା ସର୍ବନିମ୍ନ ରହିଛି ।
ସେହିଭଳି ଗର୍ଭବତୀ ମହିଳାଙ୍କ ପାଇଁ ସ୍ନାୟବିକ ସମସ୍ୟାରେ ଦିଆଯାଉଥିବା ଅଲବେଣ୍ଡାଜୋଲ୍ ବଟିକା ପାଇବାରେ ଜିଲ୍ଲାର ବିଭିନ୍ନ ସରକାରୀ ଚିକିତ୍ସାଳୟରେ ପଂଜିକୃତ ହୋଇଥିବା ଗର୍ଭବତୀ ମହିଳାଙ୍କ ମଧ୍ୟରୁ ୬ ପ୍ରତିଶତ ବଂଚିତ ହେଉଛନ୍ତି । ଜିଲ୍ଳାରେ ଏହି ବଟିକା ପାଇବା ହାର ୯୪% ଥିବା ବେଳେ ବାଲୁଗାଁ ସିଏଚ୍ସି, ଭୁବନେଶ୍ୱର ସହରାଂଚଳ, କୁଦିଆରୀ ୟୁପିଏଚ୍ସି ଓ ମୁକୁନ୍ଦପ୍ରସାଦ ୟୁପିଏଚ୍ସିରେ ଏହା ଜିଲ୍ଲାର ହାର ଠାରୁ କମ୍ ରହିଛି । ସବୁଠାରୁ ଗୁରୁତ୍ୱପୂର୍ଣ୍ଣ ଗର୍ଭବତୀ ମହିଳାଙ୍କ ଲୋହିତ ରକ୍ତକଣିକା (ହେମୋଗ୍ଲୋବିନ୍) ପରୀକ୍ଷଣର ହାର ଜିଲ୍ଲାସ୍ତରରେ ୮୧ ପ୍ରତିଶତ ରହିଛି । କୌଣସି ସରକାରୀ ହସ୍ପିଟାଲ୍ରେ ଏହା ଶତପ୍ରତିଶତ ଲକ୍ଷ୍ୟ ପୂରଣ ହୋଇପାରିନଥିବା ବେଳେ ବାଲିପାଟଣା, ବାଲୁଗାଁ, ଭୁବନେଶ୍ୱର ସହାରାଂଚଳ, ବାଣପୁର ଓ ବାଳକାଟିରେ ଏହା ଜିଲ୍ଲା ହାର ଠାରୁ ସର୍ବନିମ୍ନ ରହିଛି । ୭.୧ ଗ୍ରାମ ପ୍ରତିଶତ ଠାରୁ ୧୦.୯୯ ଗ୍ରାମ ପ୍ରତିଶତ ମଧ୍ୟରେ ରକ୍ତରେ ହେମୋଗ୍ଲୋବିନ୍ ର ମାତ୍ରା ରହିଲେ ଏହାକୁ ଲଘୁ ରକ୍ତହୀନତା ବୋଲି ଗ୍ରହଣ କରାଯାଏ ।
ଏହି ତାଲିକାରେ ଜିଲ୍ଳାରେ ପଂଜୀକୃତ ହୋଇଥିବା ମୋଟ ଗର୍ଭବତୀ ମହିଳାଙ୍କ ମଧ୍ୟରୁ ୨୬ ପ୍ରତିଶତ ଏଭଳି ରକ୍ତହୀନତାରେ ପୀଡ଼ିତ ଅଟନ୍ତି । ଏହି ମାତ୍ରା ବାଲୁଗାଁ, ଟାଙ୍ଗୀ, ଭୁବନେଶ୍ୱର ସହାରାଂଚଳ, ବୋଲଗଡ଼, ଖୋର୍ଦ୍ଧା ଓ ବେଗୁନିଆରେ ସର୍ବାଧିକ ଅଟେ । ଖୋର୍ଦ୍ଧାରେ ଏହା ୪୭ % ପ୍ରତିଶତ ଥିବା ବେଳେ ବେଗୁନିଆରେ ୫୨% ପ୍ରତିଶତ ଗର୍ଭବତୀ ମହିଳା ଏହି ରକ୍ତହୀନତାର ଶିକାର ଅଟନ୍ତି ।
ଏହି ବୈଠକର ଅନ୍ୟନ୍ୟ ପ୍ରସଙ୍ଗର ସମୀକ୍ଷା ସମ୍ପର୍କରେ ବିଷଦ ବିବରଣୀ ବିଭାଗ ପକ୍ଷରୁ ମିଳିପାରିନାହିଁ । ତେବେ ମିଳିଥିବା ସୂଚନାରେ, ଜିଲ୍ଳାରେ ଗର୍ଭବତୀ ମହିଳା ଓ ଶିଶୁଙ୍କ ନିକଟରେ ସଠିକ୍ ଭାବେ ସ୍ୱାସ୍ଥ୍ୟସେବା ପହଂଚିପାରୁନଥିବାରୁ ଜିଲ୍ଲାପାଳ ଶ୍ରୀ ଚକ୍ରବର୍ତୀ ତୀବ୍ର ଅସନ୍ତୋଷ ପ୍ରକାଶ କରିଥିବା ଜଣାଯାଇଛି । ବୈଠକରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା ଆର୍ତବନ୍ଧୁ ନାୟକ, ଡିଏମ୍ଓ ଡା ବିଶ୍ୱମୋହନ ମିଶ୍ର, ପରିବାର କଲ୍ୟାଣ ବିଭାଗର ଡା ରଘୁନାଥ ନାୟକ, ଡିଏମ୍ଆର୍ସି ଓ ଅନ୍ୟ ବିଭାଗୀୟ ଡାକ୍ତର ଓ ଅଧିକାରୀମାନେ ଉପସ୍ଥିତ ଥିଲେ ।