ଭୁବନେଶ୍ବର: ଅଶାନ୍ତ ସମୁଦ୍ରରୁ ଉଦ୍ଧାର ହେଲେ ୮ ମତ୍ସ୍ୟଜୀବୀ। ଧାମରା ବନ୍ଦର ନିକଟସ୍ଥ କାଳିନାଳୀରେ ଫଶି ଯାଇଥିବା ୨ଟି ମାଛଧରା ଡଙ୍ଗାକୁ ଉଦ୍ଧାର କଲା ପ୍ରଶାସନ। କାଳିନାଳୀ ନିକଟସ୍ଥ ଜଙ୍ଗଲରେ ୧୨ ଘଣ୍ଟା ରହିବା ପରେ ଜିଲ୍ଲା ପ୍ରଶାସନ ସମସ୍ତଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି।
Sambad is now on WhatsApp
Join and get latest news updates delivered to you via WhatsApp
ତେବେ ବାତ୍ୟା ବୁଲବୁଲ ପାଇଁ ଅଶାନ୍ତ ହୋଇଥିଲା ମଝି ସମୁଦ୍ର। ମାଛ ଧରିବାକୁ ଯାଇଥିବା ବେଳେ ମାଛ ଧରା ଡଙ୍ଗା ଦୋହଲିବାକୁ ଲାଗିଲା। ଆଉ କିଛି ସମୟ ପରେ ଡଙ୍ଗାରେ ପାଣି ପଶିଯିବାରୁ ଡଙ୍ଗା ବୁଡ଼ି ଯାଇଥିଲା। ଆଉ ତାପରେ ଜୀବନ ବିକଳରେ ୮ ମତ୍ସ୍ୟଜୀବୀ ପହଁରି ପହଁରି କୂଳକୁ ଯାଇଥିଲେ। ତେବେ ଅନ୍ଧାର ରାତିରେ କାଳିନାଳୀ ପାଖରେ ପହଞ୍ଚିବା ପରେ ସମସ୍ତେ ଜଙ୍ଗଲ ଭିତରକୁ ଧାଇଁଥିଲେ।
ବାତ୍ୟା ପାଇଁ ଜୁଆର ମାଡ ହେଉଥିବାରୁ ସମସ୍ତେ ଜୀବନ ବଞ୍ଚାଇବାକୁ ଜଙ୍ଗଲରେ ଥିବା ଗଛ ଉପରକୁ ଉଠି ଯାଇଥିଲେ। ଆଉ ସାରା ରାତି ସେଇ ଗଛ ଉପରେ ହିଁ ରହିଥିଲେ। ତେବେ କାଲି ରାତି ୨ଟାରୁ ଆଜି ଦିନ ୨ଟା ପର୍ଯ୍ୟନ୍ତ ଦୀର୍ଘ ୧୨ ଘଣ୍ଟା ଗଛ ଉପରେ ଚଢ଼ି ମୃତ୍ୟୁକୁ ମାତ ଦେଇଥିବା ମତ୍ସ୍ୟଜୀବୀଙ୍କୁ ଉଦ୍ଧାର କରିଛି ପ୍ରଶାସନ।
ଉଦ୍ଧାର ହୋଇଥିବା ୮ ମତ୍ସ୍ୟଜୀବୀ ସୁରକ୍ଷିତ ଥିବା ବେଳେ ୨ ଜଣ ଅଖିଆ ଅପିଆ ରହିଥିବାରୁ ଅସୁସ୍ଥ ଅଛନ୍ତି। ଆଉ ସେମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି। ତେବେ ଉଦ୍ଧାର ପରେ ସେ କାଳ ରାତିର କଳା କାହାଣୀ କହିଛନ୍ତି ମତ୍ସ୍ୟଜୀବୀ।କେମିତି ମୃତ୍ୟୁ ମୁହଁରୁ ସେ ଝଡ଼ ବର୍ଷା ରାତିରୁ ଉଦ୍ଧାର ହେଲେ ଗଣମାଧ୍ୟମ ସମ୍ମୁଖରେ ବଖାଣିଛନ୍ତ ମତ୍ସ୍ୟଜୀବୀମାନେ।