ଜଳେଶ୍ବର/ବାଲିଆପାଳ: ଉପରମୁଣ୍ଡରେ ଲଗାଣ ବର୍ଷା ଯୋଗୁ ସୁବର୍ଣ୍ଣରେଖା ନଦୀରେ ଚଳିତ ବର୍ଷର ତୃତୀୟ ବନ୍ୟା ଆସିଛି। ଫଳରେ ବାଲେଶ୍ବର ଜିଲ୍ଲାର ବାଲିଆପାଳ, ବସ୍ତା, ଭୋଗରାଇ ଓ ଜଳେଶ୍ବର ବ୍ଲକ୍‌ ଅନ୍ତର୍ଗତ ୩୧ଟି ପଞ୍ଚାୟତର ୯୪ଟି ଗାଁରେ ପାଣି ପଶିଛି।
ବାଲିଆପାଳ ବ୍ଲକ୍‌ ଅଧୀନ ନିଖିରା, ଅସ୍ତି, ବାଲିଆପାଳ, ବିଷ୍ଣୁପୁର, ଜାମକୁଣ୍ଡା, ମଧୁପୁରା, ଘଣ୍ଟୁଆ, କୁମ୍ଭାରୀ ପ୍ରଭୃତି ପଞ୍ଚାୟତ ବନ୍ୟା ଦ୍ବାରା ପ୍ରଭାବିତ ହୋଇଛି। ବିଶେଷ କରି ଚଡ଼ପାଳପଡ଼ା, ତଳ ଧାନଦା, ଚଡ଼ବଢ଼ାପାଳ, ପାଳଚମ୍ପେଇ, ଛୋଟଖାନପୁର, ରାଉତୁରାପୁର, କୁଦମାନସିଂ, କୁଦମାନସିଂ ଚଡ଼, ମନୁନଗର, ସୁଙ୍ଘମୁହଁ, ତଳ ବାଲିଆପାଳ,ରାମନଗର-ରସଲପୁର, ବିଷ୍ଣୁପୁର ଚଡ଼ସାହି, ନୟାବାଲି, ଇକଡ଼ପାଳ, ଚୌଧୁରୀକୁଦ, ଚଡ଼ବସ୍ତ କାଳରୁଇ, ତାଳପଦା, କୁହ୍ଲାଚଡ଼, ନଖପାଳ ଆଦି ଗ୍ରାମ ପାଣି ଘେରରେ ରହିଛି। ପାଳପଡ଼ା-ଚଡ଼ ପାଳପଡ଼ା, ପାରୁଳିଆ-ପାଳଚମ୍ପେଇ, ପଞ୍ଚୁରୁଖୀ-ଚଉଧୁରୀକୁଦ, ଜାମକୁଣ୍ଡା-ତାଳପଦା, ଜାମକୁଣ୍ଡା-କୁହ୍ଲାଚଡ଼, ଜାମକୁଣ୍ଡା-ନୟାବାଲି ପ୍ରଭୃତି ରାସ୍ତା ଉପରେ ବନ୍ୟାଜଳ ପ୍ରବାହିତ ହେଉଛି। ସେହିପରି ଜଳେଶ୍ୱର ବ୍ଲକ୍‌ର ବାଇଗଣବାଡ଼ିଆ, ଝାଡ଼ପିପଳ, ଆର୍‌ଆର୍‌ପୁର, ଲକ୍ଷ୍ମଣନାଥ, ପଶ୍ଚିମବାଡ଼, ଭୋଗରାଇ ବ୍ଲକ୍‌ର କୁମ୍ଭୀରଗଡ଼ି, ଖରିଦପିପଳ, ଆରୁହାବୃତ୍ତି, ଗବଗାଁ ଏବଂ ବସ୍ତା ବ୍ଲକ୍‌ର ଚୋରମାରା, ରଘୁନାଥପୁର ଓ କାଦରାୟାଁ ଆଦି ପଞ୍ଚାୟତର ଅନେକ ଗାଁ ପାଣିଘେରରେ ରହିଛି।