ଟ୍ରେନ୍ କଣ୍ଡକ୍ଟର ଓ ଟିଟିଇ ଙ୍କ ସାଧୁତା; ୯୮ ହଜାର ଟଙ୍କା ସହ ସୁନା କାନଫୁଲ ପାଇ ଯାତ୍ରୀଙ୍କୁ ଫେରାଇଲେ
ବାଲେଶ୍ବର: ଏବେ ବି ମଣିଷପଣିଆ ବଂଚିଛି। ଯାହାକୁ ରେଳ ବିଭାଗର କର୍ମଚାରୀ ପ୍ରମାଣ କରି ଦେଖାଇଛନ୍ତି। ଜଣେ ଯାତ୍ରୀଙ୍କର ବ୍ୟାଗ୍ରେ ଥିବା ଟଙ୍କା ସହ ସୁନା ଗହଣା ଓ ଜରୁରୀ କାଗଜପତ୍ରକୁ ଟ୍ରେନ୍ ବଗିରୁ ପାଇବା ପରେ ଫେରାଇଥିବା ଜଣାଯାଇଛି। କର୍ମଚାରୀଙ୍କ ଏହି ସାଧୁତାକୁ ସବୁ ମହଲରୁ ପ୍ରଶଂସା କରାଯାଇଛି।
ସୂଚନା ମୁତାବକ, ପୁରୀ-ହାଉଡା ଏକ୍ସପ୍ରେସ୍ରେ ଜଣେ ଯାତ୍ରୀ କଟକରୁ ହାଉଡ଼ା ଯାଉଥିଲେ। ଗତକାଲି ରାତି ପାଖାପାଖି ୧ ଟା ସମୟରେ ଟ୍ରେନ୍ଟି ବାଲେଶ୍ବରର ଷ୍ଟେସନ୍ରେ ରୋକିଥିଲା। ଯାତ୍ରୀ ଜଣକ ପାଣି ଆଣିବାକୁ ଯାଇଥିଲେ। ହେଲେ ଟ୍ରେନ୍ଟି ଏହି ସମୟରେ ଛାଡ଼ିଦେଇଥିଲା। ଖଡ଼ଗପୁରରେ ଟ୍ରେନ୍ଟି ପହଞ୍ଚିବା ପରେ ୬ ନମ୍ବର ବଗିରେ ବ୍ୟାଗ୍ଟି ରହିଯାଇଥିବା ଦେଖି ଟିଟିଇ ମନୋଜ କୁମାର ଏ ସଂର୍ପକରେ ଉପରସ୍ଥ ଅଧିକାରୀ ତଥା ଟ୍ରେନ୍ କଣ୍ଡକ୍ଟର ଡିକେ ଶାହାଙ୍କୁ ଖବର ଦେଇଥିଲେ। ପରେ ଖଡ଼ଗପୁର ରେଳ ସୁରକ୍ଷା ବାହିନୀକୁ ବ୍ୟାଗ୍ଟିକୁ ହସ୍ତାନ୍ତର କରାଯାଇଥିଲା। ଏହି ବ୍ୟାଗ୍ ଭିତରୁ ୯୮ ହଜାର ଟଙ୍କା ସହିତ ଏକ ସୁନା କାନଫୁଲ ଓ ଜରୁରୀ କାଗଜପତ୍ର ରହିଥିଲା। ରେଳ ସୁରକ୍ଷା ବାହିନୀ ତଦନ୍ତ କରିବା ପରେ ଏହି ବ୍ୟାଗ୍ଟି ପଶ୍ଚିମବଙ୍ଗ ହୁଗୁଳି ଜିଲ୍ଲାର ଦାଦପୁର ଅମରା ଅଞ୍ଚଳର ସେଖ ଗୁଲାମ୍ଙ୍କର ବୋଲି ଜଣାପଡ଼ିଥିଲା। ଆଜି ସେଖ୍ ଗୁଲାମ୍ଙ୍କୁ ସୁରକ୍ଷିତ ଭାବେ ବ୍ୟାଗ୍କୁ ହସ୍ତାନ୍ତର କରାଯାଇଥିବା ଜଣାଯାଇଛି।