ସ୍କୁଲ୍ ହତା ଭିତରକୁ ପଶି ଆସିଲା ଭାଲୁ, ଖାଇଲା ବିସ୍କୁଟ୍, କଦଳୀ

ବୈପାରିଗୁଡ଼ା: ମା’ଠାରୁ ଅଲଗା ହୋଇ ସ୍କୁଲ୍ ଭିତରକୁ ପଶି ଆସିଲା ଛୁଆ ଭାଲୁ। ଏଭଳି ଘଟଣା ଦେଖିବାକୁ ମିଳିଥିଲା ବୈପାରିଗୁଡ଼ା ବ୍ଲକ୍ କେନ୍ଦୁଗୁଡ଼ା ପଞ୍ଚାୟତ ଅନ୍ତର୍ଗତ ବଡ଼ନାୟକଗୁଡ଼ା ପ୍ରାଥମିକ ବିଦ୍ୟାଳୟରେ। ଛାତ୍ରଛାତ୍ରୀମାନେ ମଧ୍ୟାହ୍ନଭୋଜନ କରୁଥିବା ବେଳେ ଭାଲୁ ବିଦ୍ୟାଳୟରେ ପଶିଥିଲା। ଭୟଭୀତ ଛାତ୍ରଛାତ୍ରୀ ଏ ସଂପର୍କରେ ଶିକ୍ଷକଙ୍କୁ ଜଣାଇଥିଲେ।

ପରେ ପରେ ଭାଲୁ ଦେଖିବାକୁ ଗ୍ରାମବାସୀଙ୍କ ଭିଡ଼ ଜମିଥିଲା। ତେବେ ଭାଲୁ ହଲଚଲ୍ ନ ହେବା ଦେଖି ସେ ଅସୁସ୍ଥ ଥିବା ଅନୁମାନ କରି ବିସ୍କୁଟ୍, କଦଳୀ ଭଳି କିଛି ଖାଦ୍ୟ ଦେବାରୁ ଖାଇବାକୁ ଲାଗିଲା। ଲୋକଙ୍କ ଗହଳି ଦେଖି ସ୍କୁଲ୍ ବାହାରକୁ ଆସି କିଛି ସମୟ ବୁଲାବୁଲି କରିବା ପରେ ଗଛମୂଳରେ ବସି ରହିଥିଲା। ଭାଲୁର ବୟସ ଏକ ବର୍ଷରୁ ଅଧିକ ହୋଇପାରେ। ଖବର ପାଇ ବନ ବିଭାଗ କର୍ମଚାରୀ ଦୁଇ ଘଣ୍ଟା ପରେ ପହଞ୍ଚି ଗ୍ରାମବାସୀ ଏବଂ ଶିକ୍ଷକଙ୍କ ସହାୟତାରେ ଭାଲୁକୁ ଉଦ୍ଧାର କରି ବୈପାରିଗୁଡ଼ା ପ୍ରାଣୀ ଚିକିତ୍ସା କେନ୍ଦ୍ରରେ ଭର୍ତ୍ତି କରାଇଥିବା ଜଣାପଡ଼ିଛି।