ଦିନକ ପରେ ବିଧାନସଭା: ହଇଜାଠାରୁ ଧାନ କିଣା ଅବ୍ୟବସ୍ଥା ଯାଏଁ

ଭୁବନେଶ୍ବର: ଚିକିଟି ମଦମୃତ୍ୟୁ ମାମଲାର ତଦନ୍ତ ହେବ। ବିଧାନସଭାରେ ହିଁ ଏମିତି ଘୋଷଣା କରିଥିଲେ ସରକାର। ଏ ଯାଏଁ କିନ୍ତୁ ତଦନ୍ତ ଆରମ୍ଭ ହେଲା ନାହିଁ। ସେପଟେ କଣାସରେ ହଇଜା ବ୍ୟାପିଲା। ସରକାର ନିନ୍ଦିତ ହେଲେ। ଧାନକିଣାରେ କଟ୍‌ନିଛଟ୍‌ନିକୁ ଆଦୌ ପ୍ରଶ୍ରୟ ଦିଆଯିବ ନାହିଁ ବୋଲି ମନ୍ତ୍ରୀମାନେ ବାରମ୍ବାର ହୁଙ୍କାର ଦେଇଥିଲେ। ଅଥଚ ଏଫ୍ଏକ୍ୟୁ ମାନ ଆଳରେ ଆଖିବୁଜା କଟ୍‌ନିଛଟ୍‌ନି ହେଉଥିବା ନେଇ ସବୁ ଜିଲ୍ଲାରୁ ଗଦାଗଦା ଅଭିଯୋଗ ଆସୁଛି। ଏସବୁ ପ୍ରସଙ୍ଗରେ ସରକାର ଯେତେ ସଫେଇ ଦେଲେ ବି ଗ୍ରହଣୀୟ ହେଉନି। ବିଧାନସଭାରେ ତିନିଟି ଯାକ ପ୍ରସଙ୍ଗ ଏବେ ବିରୋଧୀଙ୍କ ପାଇଁ ବଡ଼ ଅସ୍ତ୍ର ପାଲଟିଛି। ଏସବୁକୁ ନେଇ ସରକାରଙ୍କୁ ସେମାନେ ଅଡ଼ୁଆରେ ପକାଇବା ନିଶ୍ଚିତ। ବିରୋଧୀଙ୍କୁ ସାମ୍ନା କରିବାକୁ ଶାସକ ଦଳ ରକ୍ଷଣାତ୍ମକ ନା ଆକ୍ରମଣାତ୍ମକ ରଣନୀତି ଆପଣାଇବ, ତାହା ଉପରେ ଏବେ ସମସ୍ତଙ୍କ ନଜର। 

ଗୁରୁବାରଠାରୁ ଆରମ୍ଭ ହେଉଛି ବିଧାନସଭାର ବଜେଟ୍‌ ଅଧିବେଶନ। ୧୩ରୁ ୨୧ ତାରିଖ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟ ଏବଂ ମାର୍ଚ୍ଚ ୭ରୁ ଏପ୍ରିଲ୍ ୫ ତାରିଖ ପର୍ଯ୍ୟନ୍ତ ଦ୍ବିତୀୟ ପର୍ଯ୍ୟାୟ ଅଧିବେଶନ ହେବ। ଫେବ୍ରୁଆରି ୧୭ ତାରିଖରେ ୨୦୨୫-୨୬ ଆର୍ଥିକ ବର୍ଷର ବଜେଟ୍ ଉପସ୍ଥାପନ ହେବ। ଏହି ଅଧିବେଶନ ଲମ୍ବା ସମୟ ଧରି ଚାଲିବାକୁ ଥିବାରୁ ଗୃହ ବେଶ୍ ସରଗରମ ହେବ। ତେଣୁ ସରକାରଙ୍କୁ ଘେରିବା ପାଇଁ ବିରୋଧୀ ଦଳ ବହୁ ପ୍ରସଙ୍ଗକୁ ଏକାଠି କରିଛନ୍ତି। ୧୨ ତାରିଖ ତିନି ଦଳର ବିଧାୟକ ଦଳ ବୈଠକ ବସି ରଣନୀତି ପ୍ରସ୍ତୁତ କରିବେ। ହେଲେ ତାହା ପୂର୍ବରୁ ତିନି ଦଳରେ ମାନସ ମନ୍ଥନ ସରିଲାଣି। ନୂଆ ସରକାରକୁ ଏହା ମଧ୍ୟରେ ୮ ମାସ ପୂରିଲାଣି। ବିଜେପି ସରକାର ପୂର୍ବରୁ ଦୁଇଟି ବିଧାନସଭା ଅଧିବେଶନ ସାମ୍ନା କରି ସାରିଛନ୍ତି। ଦୁଇଟି ଯାକ ଅଧିବେଶନରେ ବହୁ ପ୍ରସଙ୍ଗ ଧରି ବିରୋଧୀ ସରକାରଙ୍କୁ ଘେରିଥିଲେ। ତେବେ ଅଧିକାଂଶ ପ୍ରସଙ୍ଗରେ ପୂର୍ବ ସରକାରକୁ ଦାୟୀ କରି ଶାସକ ଦଳର ବିଧାୟକମାନେ ମୁଖ୍ୟ ବିରୋଧୀ ଦଳ ବିଜେଡିକୁ ଅକଳରେ ପକାଇବାକୁ ଚେଷ୍ଟା କରିଥିଲେ। ଏହା କିଛିକାଂଶରେ ସଫଳ ମଧ୍ୟ ହୋଇଥିଲା। ହେଲେ ସରକାରକୁ ୮ ମାସ ବିତିଗଲାଣି। ଏଣୁ ଶାସକ ଦଳର ଏଭଳି ରଣନୀତି ଏଥର ସମ୍ଭବତଃ ଏତେଟା ଗ୍ରହଣୀୟ ନ ହୋଇପାରେ। 

ବିରୋଧୀଙ୍କ ପାଖରେ ମାଳମାଳ ପ୍ରସଙ୍ଗ
ଶାସକ ଦଳର ରଣନୀତି ଉପରେ ନଜର

ଧାନ କିଣା ଅବ୍ୟବସ୍ଥା ଏଥର ଗୃହରେ ସବୁଠାରୁ ବଡ଼ ପ୍ରସଙ୍ଗ ହେବ। କଟ୍‌ନିଛଟ୍‌ନି ବନ୍ଦ ହେବ ବୋଲି ବିଭାଗୀୟ ମନ୍ତ୍ରୀଙ୍କ ସମେତ ଅନ୍ୟ ମନ୍ତ୍ରୀମାନେ ବାରମ୍ବାର ଗଣମାଧ୍ୟମରେ କହିଛନ୍ତି। କିନ୍ତୁ ପଶ୍ଚିମ ଓଡ଼ିଶାଠାରୁ ଉପକୂଳ ଓଡ଼ିଶା ଯାଏଁ ସବୁଠି ଧାନ କିଣାରେ ଅବ୍ୟବସ୍ଥା ଅଭିଯୋଗ ହୋଇଛି। ଓଲଟା ପୂର୍ବ ବର୍ଷଗୁଡ଼ିକ ପରି ଏଫ୍ଏକ୍ୟୁ ମାନକୁ ଆଳ କରି ଏଥର ବି କଟ୍‌ନିଛଟ୍‌ନି ଜୋର୍‌ଦାର ଚାଲିଛି। କିଛି ସ୍ଥାନରେ ଲୋକ ରାସ୍ତାକୁ ମଧ୍ୟ ଓହ୍ଲାଇଛନ୍ତି। ମଣ୍ଡିରେ ଅବ୍ୟବସ୍ଥା ସମାଧାନ ହୋଇପାରିନି। ଓଡ଼ିଶାର ଧାନ ପଡ଼ୋଶୀ ରାଜ୍ୟକୁ ମଧ୍ୟ ବେଆଇନ ଭାବେ ଚାଲିଯାଉଥିବାର ଜଣାପଡ଼ିଛି। ଏହି ପ୍ରସଙ୍ଗଟିକୁ ଏଥର ବିଧାନସଭାକୁ ସରଗରମ କରିବ। ବାରବାଟୀରେ ଆନ୍ତର୍ଜାତିକ ମ୍ୟାଚ୍ ବେଳେ ଫ୍ଲଡ୍ ଲାଇଟ୍ ବନ୍ଦ ହେବା ନେଇ ଏବେ ସାରା ଦେଶର ଗଣମାଧ୍ୟମରେ ଚର୍ଚ୍ଚା। ବିରୋଧୀ ଦଳ ମଧ୍ୟ ଏହି ପ୍ରସଙ୍ଗରେ ସରକାରଙ୍କୁ ଭର୍ତ୍ସନା କରିଛନ୍ତି। ସରକାର ମାପିଚୁପି ଏ ଦିଗରେ ପଦକ୍ଷେପ ନେଉଛନ୍ତି। ତେଣୁ ବିଧାନସଭା ଗୃହରେ ଏହି ପ୍ରସଙ୍ଗ ଉଠାଇ ବିରୋଧୀ ସରକାରଙ୍କୁ ଜବାବ ମାଗିବାର ସମ୍ଭାବନା ଅଛି। 

କଣାସରେ ହଇଜା ବ୍ୟାପିବା ଘଟଣାରେ ସରକାର ବ୍ୟାକ୍‌ଫୁଟ୍‌ରେ ଅଛନ୍ତି। ବିଜେଡି ଓ କଂଗ୍ରେସର ପ୍ରତିନିଧି ଦଳ ଘଟଣାସ୍ଥଳକୁ ଯାଇ ଲୋକଙ୍କ ସହ ଆଲୋଚନା କରି ସରକାରଙ୍କୁ ସମାଲୋଚନା କରିଛନ୍ତି। ସରକାର ଏହି ପ୍ରସଙ୍ଗରେ ବିଧାନସଭାରେ କି ଉତ୍ତର ରଖୁଛନ୍ତି, ତାହା ଉପରେ ସମସ୍ତଙ୍କ ନଜର ରହିବ।ପୋଲାଭରମ୍, ବଂଶଧାରା, ମହାନଦୀ, କୋଟିଆ ଆଦି ପ୍ରସଙ୍ଗରେ ସମସ୍ୟା ଯେଉଁଠି ଥିଲା ସେଇଠି ଅଟକିଛି। ତାହାର ସମାଧାନ ପାଇଁ ରାଜ୍ୟ ସରକାର କୌଣସି ଆଖିଦୃଶିଆ ପଦକ୍ଷେପ ନେଇନାହାନ୍ତି। ପଡ଼ୋଶୀ ରାଜ୍ୟ ସହ ବିବାଦର ସମାଧାନ ପାଇଁ ଏକ ଆନ୍ତଃମନ୍ତ୍ରୀସ୍ତରୀୟ କମିଟି ଗଠନ ହେବ ବୋଲି ନଭେମ୍ବର ମାସରେ ସରକାର ଘୋଷଣା କରିଥିଲେ। କିନ୍ତୁ ଏ ଦିଗରେ ପ୍ରକ୍ରିୟା ଆଗେଇନି। ‘ଓଡ଼ିଆ ଅସ୍ମିତା’ କଥା ଉଠାଇ ଏହି ପ୍ରସଙ୍ଗରେ ବିରୋଧୀ ନିଶ୍ଚିତ ସରକାରଙ୍କୁ ଅକଳରେ ପକାଇବାକୁ ଚେଷ୍ଟା କରିବେ। ରାଜ୍ୟର ଆଇନଶୃଙ୍ଖଳା ପରିସ୍ଥିତି ନିଶ୍ଚିତ ଭାବେ ଆସନ୍ତା ଅଧିବେଶନକୁ ସରଗରମ କରିବ। ରାଜ୍ୟର ବିଭିନ୍ନ ସ୍ଥାନ ସମେତ ଖୋଦ୍ ରାଜଧାନୀରେ ଆଇନଶୃଙ୍ଖଳା ବିଗିଡ଼ିଯାଇଥିବାରୁ ସରକାରଙ୍କୁ ବିରୋଧୀ ଘେରିବେ। ବିଧାନସଭା ଗୃହ କାର୍ଯ୍ୟରେ ବିରୋଧୀ ଦଳ ବାଧା ସୃଷ୍ଟି କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଗତ ମାସରେ ବାଚସ୍ପତି ଗଣମାଧ୍ୟମକୁ କହିଥିଲେ। ଏହାକୁ ନେଇ ଉଭୟ ବିଜେଡି ଓ କଂଗ୍ରେସ ବିଧାୟକମାନେ ବାଚସ୍ପତିଙ୍କ ଉପରେ ଖପ୍ପା ହୋଇଥିଲେ। ବିଧାନସଭା ଅଧିବେଶନ ସୁରୁଖୁରୁରେ ଚଳାଇବା ପାଇଁ ବାଚସ୍ପତି ଆସନ୍ତାକାଲି ସର୍ବଦଳୀୟ ବୈଠକ ଡାକିଛନ୍ତି। ତେଣୁ ଏହି ପ୍ରସଙ୍ଗଟି ବୈଠକରେ ଉଠିବ କି ନାହିଁ, ତାହା ଉପରେ ଏବେ ସମସ୍ତଙ୍କର ଦୃଷ୍ଟି ରହିଛି।