ପୁରୀ : ପୁରୀ ବଳିଆପଣ୍ଡା ଥାନା ଅଞ୍ଚଳରେ ଥିବା ଏକ ହୋଟେଲର ୬ ମହଲା କୋଠାରୁ ପଡ଼ି ଏକ ଫାଇନାନ୍ସ କମ୍ପାନିର ଜଣେ ଅଧିକାରୀ ମୃତ୍ୟୁବରଣ କରିଛନ୍ତି। ସେ ହେଉଛନ୍ତି, କମ୍ପାନିର ବଲାଙ୍ଗୀର ଜୋନ୍‌ ମାନବ ସମ୍ବଳ ବିଭାଗ ଦାୟିତ୍ବରେ ଥିବା ଲିଙ୍ଗରାଜ ସାହୁ। ତାଙ୍କ ଘର ଅସ୍ତରଙ୍ଗ ଥାନା ଅନ୍ତର୍ଗତ ଗଙ୍ଗପୁର ଗ୍ରାମରେ। ଖବର ପାଇ ପୁରୀ ଏସ୍‌ପି, ସିଟି ଡିଏସ୍‌ପିଙ୍କ ଓ ସାଇଣ୍ଟିଫିକ୍‌ ଟିମ୍‌ ସମେତ ବଳିଆପଣ୍ଡା ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି। ପ୍ରଥମେ ଫାଇନାନ୍ସ କମ୍ପାନିର ଅଧିକାରୀଙ୍କ ସୂଚନାକୁ ଆଧାର କରି ବଳିଆପଣ୍ଡା ଥାନା ପୁଲିସ ଏକ ଅପମୃତ୍ୟୁ ମାମଲା ରୁଜୁକରି ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।

Advertisment

ସୂଚନା ଅନୁସାରେ, ଏହି ଫାଇନାନ୍ସ କମ୍ପାନିର ମାନବ ସମ୍ବଳ ଅଧିକାରୀମାନଙ୍କର ସମ୍ମିଳନୀ ପୁରୀର କ୍ରିଷ୍ଣା ସି ସାଇଟ୍‌ ରିସର୍ଟରେ ହୋଇଥିଲା। ଗତ ୨୪ ତାରିଖଠାରୁ ଆରମ୍ଭ ହୋଇଥିବା ଏହି ଦୁଇ ଦିନିଆ ସମ୍ମିଳନୀରେ ଯୋଗ ଦେବାପାଇଁ ୭୩ ଜଣ ମାନବ ସମ୍ବଳ ଅଧିକାରୀ ଗୋଟିଏଦିନ ପୂର୍ବରୁ ହୋଟେଲରେ ପହଞ୍ଚିଥିଲେ। ଲିଙ୍ଗରାଜ ମଧ୍ୟ ଯୋଗ ଦେଇଥିଲେ। କମ୍ପାନି ପକ୍ଷରୁ ତାଙ୍କୁ ହୋଟେଲ୍‌ର ୬ ମହଲାରେ ଥିବା ୬୦୨ ନମ୍ବର ରୁମ୍‌ ତାଙ୍କୁ ଯୋଗାଇ ଦିଆଯାଇଥିଲା। ତାଙ୍କ ସହିତ ଭଦ୍ରକ ଜୋନ୍‌ର ଦାୟିତ୍ବରେ ଥିବା ମାନବ ସମ୍ବଳ ଅଧିକାରୀ କୈଳାସ ଚନ୍ଦ୍ର ସାହୁଙ୍କୁ ରହିଥିଲେ। ସମ୍ମିଳନୀର ଉଦ୍‌ଯାପନ ପରେ ହୋଟେଲରେ ରାତ୍ରୀଭୋଜନର ବ୍ୟବସ୍ଥା କରାଯାଇଥିଲା। ଏହାପରେ ସମସ୍ତ ଅଧିକାରୀମାନେ ନିଜ ନିଜ ରୁମ୍‌କୁ ଯାଇ ଶୋଇଥିଲେ। ରାତି ପ୍ରାୟ ୪ଟା ୪୩ ମିନିଟ୍‌ ସମୟରେ ଏହି ହୋଟେଲର ଚଟାଣରେ ହଠାତ୍‌ ଏକ ଶବ୍ଦ ହୋଇଥିଲା। ଏହି ଶବ୍ଦଶୁଣି ସୁରକ୍ଷାକର୍ମୀ ବାହାରକୁ ଆସି ଦେଖିଲାବେଳକୁ ଲିଙ୍ଗରାଜ ଚଟାଣରେ ପଡ଼ିଥିବାବେଳେ ତାଙ୍କ ମୁଣ୍ଡରୁ ପ୍ରବଳ ରକ୍ତସ୍ରାବ ହେଉଥିଲା। ତେଣୁ ଏହି ଯୁବକ ଜଣକ ହୋଟେଲର କୌଣସି ଏକ ପ୍ରକୋଷ୍ଠରୁ ପଡ଼ି ମୃତ୍ୟୁବରଣ କରିଥିବା ସନ୍ଦେହ କରି ହୋଟେଲ ଅଧିକାରୀ ଏନେଇ ବଳିଆପଣ୍ଡା ଥାନାକୁ ଖବର ଦେଇଥିଲେ। ଖବର ପାଇ ବଳିଆପଣ୍ଡା ଥାନା ଆଇଆଇସି ସୁଶାନ୍ତ କୁମାର ସାହୁ ଓ ଅନ୍ୟ ଅଧିକାରୀମାନେ ଘଟଣାସ୍ଥଳରେ ପହଞ୍ଚିବା ମୃତ ଯୁବକ ଜଣକ ଲିଙ୍ଗରାଜଙ୍କର ବୋଲି ଫାଇନାନ୍ସ କମ୍ପାନିର ଅନ୍ୟ ଅଧିକାରୀମାନେ ଚିହ୍ନଟ କରିଥିଲେ। ଏନେଇ କମ୍ପାନିର ଉପସଭାପତି ଅଙ୍କିତା ବଳିଆପଣ୍ଡା ଥାନା ପୁଲିସକୁ ଏହା ଏକ ଦୁର୍ଘଟଣା ବୋଲି ଲିଖିତ ଭାବେ ଦେଇଥିଲେ।