ବଦଳିବ ୮୨ ବର୍ଷର ପରମ୍ପରା : ଅଗ୍ନିଶମ ସେବାରେ ମହିଳାଙ୍କୁ ନିଯୁକ୍ତି ପାଇଁ ପ୍ରସ୍ତାବ
ଫାୟାରମ୍ୟାନ ଓ ଷ୍ଟେସନ୍ ଅଫିସର ପଦବିର ୧୫ ପ୍ରତିଶତ ସଂରକ୍ଷିତ ରହିବ
କଟକ : ଓଡ଼ିଶା ଅଗ୍ନିଶମ ସେବାର ୮୨ ବର୍ଷର ପରମ୍ପରା ଭାଙ୍ଗିବ। ନିଅାଁଲିଭା ଓ ବିପର୍ଯ୍ୟୟ ପରିଚାଳନା ଇତ୍ୟାଦିରେ ମହିଳାମାନଙ୍କୁ ନିୟୋଜନ କରାଯିବ। ଏଭଳି ଏକ ପ୍ରସ୍ତାବ ଓଡ଼ିଶା ଅଗ୍ନିଶମ ସେବା ନିର୍ଦ୍ଦେଶାଳୟ ପକ୍ଷରୁ ରାଜ୍ୟସରକାରଙ୍କ ନିକଟକୁ ପଠାଯାଇଛି। ଓଡ଼ିଶାରେ ୧୯୩୬ ମସିହାରୁ ଅଗ୍ନିଶମ ବିଭାଗ କାର୍ଯ୍ୟକରିବା ଦିନଠୁ କୌଣସି ମହିଳାଙ୍କୁ ଫାୟାରମ୍ୟାନ କିମ୍ବା ଷ୍ଟେସନ୍ ଅଫିସର ପାହ୍ୟାରେ ନିଯୁକ୍ତି ଦିଆଯାଇନାହିଁ। କେବଳ ପ୍ରଶାସନିକ କାର୍ଯ୍ୟ ପାଇଁ କେତେକ ମହିଳାଙ୍କୁ ନିଯୁକ୍ତି ମିଳିଛି। ତେଣୁ ଖାଲି ରହୁଥିବା ପଦବିଗୁଡ଼ିକରେ ୧୫ ପ୍ରତିଶତ ମହିଳାମାନଙ୍କୁ ନିଯୁକ୍ତି ଦେବା ପାଇଁ ପ୍ରସ୍ତାବରେ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ଅଗ୍ନିଶମ ବିଭାଗରେ ସାହସୀ ଓ ନିର୍ଭିକ କର୍ମଚାରୀଙ୍କ ଆବଶ୍ୟକତା ରହିଥିବାରୁ ଆରମ୍ଭରୁ ମହିଳାମାନଙ୍କୁ ନିଯୁକ୍ତି ଦିଆଯାଉନଥିଲା। କିନ୍ତୁ ରାଜ୍ୟ ସରକାର ମହିଳା ମାନଙ୍କୁ ଏବେ ପ୍ରାଧାନ୍ୟ ଦେଉଥିବାବେଳେ ଅଗ୍ନିସେବା କ୍ଷେତ୍ରରେ ନିଯୁକ୍ତି ନିୟମ ଆସିଗଲେ ଏହା ବିଭାଗ ତଥା ସରକାରଙ୍କ ପାଇଁ ବଡ଼ ଉପଲବ୍ଧି ହେବ ବୋଲି କୁହାଯାଇଛି। ବର୍ତ୍ତମାନ ରାଜ୍ୟରେ ଥିବା ୩୩୫ଟି ଦମକଳ କେନ୍ଦ୍ରରେ ପ୍ରାୟ ୪ହଜାର ଅଗ୍ନିଶମ କର୍ମଚାରୀ କାର୍ଯ୍ୟ କରୁଛନ୍ତି। ସେମାନଙ୍କ ମଧ୍ୟରେ ବେସ୍ ଲେଭଲ୍ରେ ଫାୟାରମ୍ୟାନ ଓ ଷ୍ଟେସନ୍ ଅଫିସର୍ ପାଇଁ ମହିଳାମାନଙ୍କୁ ନିଯୁକ୍ତି ଦେବାକୁ ପ୍ରସ୍ତାବ ଦିଆଯାଇଛି। ଗୃହ ବିଭାଗରେ ଫାୟାରମ୍ୟାନ ମାନେ କନଷ୍ଟେବଳ ଓ ଷ୍ଟେସନ୍ ଅଫିସରମାନେ ସବ୍ ଇନ୍ସପେକ୍ଟର ପାହ୍ୟାର ଅଧିକାରୀ। ଏମାନଙ୍କ ମଧ୍ୟରୁ ଫାୟାରମ୍ୟାନ ମାନଙ୍କୁ ନିର୍ଦ୍ଦେଶାଳୟ ପକ୍ଷରୁ ସିଧାସଳଖ ନିଯୁକ୍ତି ମିଳୁଥିବାବେଳେ ଷ୍ଟେସନ୍ ଅଫିସରମାନେ ଷ୍ଟାଫ୍ ସିଲେକ୍ସନ୍ ବୋର୍ଡ ମାଧ୍ୟମରେ ନିଯୁକ୍ତି ପାଉଛନ୍ତି। ତେବେ ଏସବୁ ସ୍ଥାନରେ ମହିଳା ଫାୟାରମ୍ୟାନ କିମ୍ବା ଷ୍ଟେସନ୍ ଅଫିସର ନିଯୁକ୍ତି ପାଇଲେ ମହିଳାମାନଙ୍କ ଭିତରେ ଆତ୍ମବିଶ୍ୱାସ ବୃଦ୍ଧି ପାଇବା ସହ ନାରୀ ସଶକ୍ତିକରଣ କ୍ଷେତ୍ରରେ ମଧ୍ୟ ଏହାର ଅବଦାନ ରହିବ ବୋଲି ନିର୍ଦ୍ଦେଶାଳୟ ପକ୍ଷରୁ କୁହାଯାଇଛି।
ଗୃହ ବିଭାଗ ଅଧୀନରେ କାର୍ଯ୍ୟ କରୁଥିବା ସମସ୍ତ ବିଭାଗମାନଙ୍କ ଭିତରେ କେବଳ ଅଗ୍ନିଶମ ସେବାକୁ ଛାଡ଼ିଦେଲେ ଅନ୍ୟ ସବୁଥିରେ ୩୩ ପ୍ରତିଶତ ମହିଳାଙ୍କୁ ନିଯୁକ୍ତି ଦିଆଯାଉଛି। ଦେଶରେ ମୁମ୍ବାଇ ମୁନିସ୍ପାଲ୍ଟି, ତାମିଲନାଡୁ, ଜୟପୁର ମୁନିସ୍ପାଲ୍ଟି, ଭାରତୀୟ ବିମାନବନ୍ଦର ପ୍ରାଧିକରଣ ଇତ୍ୟାଦିଠାରେ ରହିଥିବା ଅଗ୍ନିଶମ ସେବା ୟୁନିଟ୍ ଗୁଡ଼ିକରେ ମହିଳାମାନଙ୍କୁ ସାମିଲ କରାଯାଇଛି। ସେହି ଅନୁସାରେ ଓଡ଼ିଶାରେ ମଧ୍ୟ ମହିଳାଙ୍କୁ ସୁଯୋଗ ଦିଆଯିବା ପାଇଁ ଅଗ୍ନିଶମ ଡିଜି ବିଜୟ ଶର୍ମା ସରକାରଙ୍କୁ ପ୍ରସ୍ତାବ ଦେଇଥିବା କୁହାଯାଇଛି। ସରକାର ମଧ୍ୟ ପ୍ରସ୍ତାବ ଉପରେ ଅଧିକ ସ୍ପଷ୍ଟ ହେବା ପାଇଁ ଅନ୍ୟ ରାଜ୍ୟର ଅଗ୍ନିଶମ ୟୁନିଟ୍ରେ ମହିଳାଙ୍କୁ ଦିଆଯାଉଥିବା ସୁବିଧା ସୁଯୋଗ ବିଷୟରେ ତଥ୍ୟ ଲୋଡ଼ିଛନ୍ତି। ଏଥିପାଇଁ ଉପରୋକ୍ତ ୟୁନିଟ୍ଗୁଡ଼ିକରୁ ତଥ୍ୟ ସଂଗ୍ରହ ଚାଲିଥିବା ମୁଖ୍ୟ ଅଗ୍ନିଶମ ଅଧିକାରୀ ସୁକାନ୍ତ ସେଠୀ ସୂଚନା ଦେଇଛନ୍ତି।