ଆବାସ ଅଡ଼ୁଆ: ପ୍ରତିଶ୍ରୁତି ଦେଇ ତାଲିକାଭୁକ୍ତ କଲେ, ପୁଣି ନାଁ କାଟିଦେଲେ

‌ବେସାହାରା ‌‌ଶୈଳଙ୍କ ଦୁଃଖ ଶୁଣିବ କିଏ ?

ପ୍ରତାପୁର : ପ୍ରଧାନମନ୍ତ୍ରୀ ଆବାସ ଯୋଜନାରେ ହିତାଧିକାରୀଙ୍କ ଚୂଡ଼ାନ୍ତ ତାଲିକା ପ୍ରକାଶ ପାଇବା ପରେ ସାରା ରାଜ୍ୟରେ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ପ୍ରକୃତ ତଥା ଯୋଗ୍ୟ ହିତାଧିକାରୀଙ୍କ ବଦଳରେ ଅଯୋଗ୍ୟ ଏବଂ ପୂର୍ବରୁ ସରକାରୀ ଆବାସରେ ତାଲିକାଭୁକ୍ତ ହିତାଧିକାରୀଙ୍କୁ ସାମିଲ କରାଯାଇଥିବା ଅଭିଯୋଗ ସାମ୍ନାକୁ ଆସିଛି। ଭାତହାଣ୍ଡିରୁ ଗୋଟିଏ ଚିପିବା ନ୍ୟାୟରେ ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ବ୍ଲକ୍ କୁଡ଼ୁତାଇ ପଞ୍ଚାୟତ ଖାରିସାହିର ଅସହାୟ ବୃଦ୍ଧା ଶୈଳ ନାୟକ (୭୦)ଙ୍କ ନାମ ଆବାସ ତାଲିକାରୁ କଟିଯିବା ପରେ ସେ ସଂପୂର୍ଣ୍ଣ ଭାବେ ଅସହାୟ ପାଲଟିଯାଇଛନ୍ତି। ଗତ ସେପ୍ଟେମ୍ବର ମାସରେ ଏକମାତ୍ର ପୁଅ ନରେନ୍ଦ୍ର ଡେଙ୍ଗୁରେ ପ୍ରାଣ ହରାଇବା ପରେ ଶୈଳ ଏକାକୀ ହୋଇଯାଇଥିଲେ। ଫଳରେ ତାଙ୍କୁ ଆବାସ ଯୋଗାଇ ଦେବାକୁ ପ୍ରଶାସନ ଓ ସ୍ଥାନୀୟ ଜନପ୍ରତିନିଧିଙ୍କ ପକ୍ଷରୁ ପ୍ରତିଶ୍ରୁତି ମିଳିଥିଲା। ପ୍ରଥମ ପର୍ଯ୍ୟାୟ ତାଲିକାରେ ତାଙ୍କ ନାଁ ମଧ୍ୟ ଥିଲା।
ହେଲେ ଏବେ ପ୍ରକାଶ ପାଇଥିବା ଚୂଡ଼ାନ୍ତ ତାଲିକାରେ ଶୈଳଙ୍କ ନାମ କଟିଯାଇଛି। ଫଳରେ ସେ ଦୁଃଖରେ ଭାଙ୍ଗିପଡ଼ିଛନ୍ତି। ବୋହୂ ଓ ନାତିନାତୁଣୀ ଘର ଅଭାବରୁ ଭଡ଼ା ଘରେ ରହିବା ସହ ପେଟପାଟଣା ପାଇଁ ଏଠିସେଠି କାମ କରୁଛନ୍ତି। ଶୈଳ ଏକ ଭଙ୍ଗାଦଦରା ଘରେ ପଲିଥିନ୍ ଟାଣି ଶୀତ କାକରରେ ପଡ଼ିରହିଛନ୍ତି। ସରକାରୀ ସହାୟତା ଭାବେ କେବଳ ଭତ୍ତା ମିଳୁଛି।
କେବଳ ଶୈଳ ନୁହଁନ୍ତି, ଗ୍ରାମରେ ରାଜେନ୍ଦ୍ର ନାୟକ ନାମକ ଜଣେ ବ୍ୟକ୍ତିଙ୍କ ଘର ଅଗ୍ନିକାଣ୍ଡରେ ସଂପୂର୍ଣ୍ଣ ଭାବେ ପୋଡ଼ିଯାଇଥିବା ବେଳେ ସରକାରୀ ଆବାସ ପାଇଁ ପ୍ରତିଶ୍ରୁତି ମିଳିଥିଲା। ହେଲେ ତାଙ୍କ ନାମ ମଧ୍ୟ ତାଲିକାରେ ନାହିଁ। ଏହିପରି ଅନେକ ଯୋଗ୍ୟ ହିତାଧିକାରୀଙ୍କ ନାମକୁ ତାଲିକାରୁ କାଟି ଦିଆଯାଇଥିବାରୁ ଅସନ୍ତୋଷ ତେଜିବାରେ ଲାଗିଛି। ଅନ୍ୟପକ୍ଷରେ ଅଭିଯୋଗ କରିବା ପାଇଁ ପ୍ରତି ପଞ୍ଚାୟତରେ ଅଭିଯୋଗ ବାକ୍ସ୍‌ ରଖାଯାଇଥିବା ବେଳ‌େ ଅନଲାଇନ୍ ମାଧ୍ୟମରେ ମଧ୍ୟ ଆବେଦନ ପାଇଁ ଆଜି ଶେଷଦିନ ଥିଲା। ଏଥିପାଇଁ ଶତାଧିକ ଲୋକ ଆବେଦନ କରିଥିବା ଜଣାପଡ଼ିଛି। ତେବେ ଏହି ବ୍ୟବସ୍ଥା କେବଳ ଏକ ପ୍ରହସନ ବୋଲି କିଛି ହିତାଧିକାରୀ କହିଛନ୍ତି।
ସମ୍ବନ୍ଧିତ ଖବର