ମହିଳାଙ୍କୁ ଦୁଷ୍କର୍ମ, ଫାଣ୍ଡି ଘେରିଲେ ଉତ୍ତ୍ୟକ୍ତ ମହିଳା

ହାଟଡ଼ିହି : ହାଟଡିହି ବ୍ଲକ ସୋସୋ ଥାନା ଅଧୀନ ଚଞ୍ଚକପଡ଼ା ଅଞ୍ଚଳର ଜଣେ ମହିଳାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ଦୁଷ୍କର୍ମକାରୀକୁ ଲୋକଙ୍କୁ ହସ୍ତାନ୍ତର କରିବା ଦାବିରେ ଶତାଧିକ ଉତ୍ତ୍ୟକ୍ତ ମହିଳା ବଉଳା ଫାଣ୍ଡି ଘେରାଉ କରିଥିଲେ। ସେଠାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା।

ଧନୁର୍ଜୟପୁର ପଞ୍ଚାୟତ ଅଧୀନ ଚଞ୍ଚକପଡ଼ା ଗ୍ରାମରେ ବୁଧବାର ରାତିରେ ଲକ୍ଷ୍ମୀପୂଜା ଭସାଣ ଅନୁଷ୍ଠିତ ହୋଇଥିଲା। ଭସାଣ ଦେଖିବାକୁ ନିକଟସ୍ଥ କୁଶଟିକିରି ଗ୍ରାମର କିଛି ଯୁବକ ଚଞ୍ଚକପଡା ଆସିଥିବାବେଳେ ରାମ ହୋ ନାମକ ଜଣେ ଯୁବକ ଜଣକ ଘରେ ପଶି ଜଣେ ମହିଳାଙ୍କୁ ଦୁଷ୍କର୍ମ କରିଥିଲା। ଗୁରୁବାର ସକାଳେ ଏ ଖବର ପ୍ରଚାରିତ ହେବାପରେ ଗ୍ରାମରେ ଉତ୍ତେଜନା ପ୍ରକାଶ ପାଇଥିଲା। ରାମ ହୋ ଗୁରୁବାର ଅପରାହ୍ଣରେ ଚଞ୍ଚକପଡ଼ା ଗ୍ରାମ ନିକଟକୁ ହାଣ୍ଡିଆ ପିଇବାକୁ ଆସିଥିବାବେଳେ ଚଞ୍ଚକପଡ଼ା ଗ୍ରାମର କିଛି ଯୁବକ ତାକୁ ଘଟଣା ସମ୍ପର୍କରେ ପଚାରିବାରୁ ସେମାନଙ୍କ ମଧ୍ୟରେ ଗଣ୍ଡଗୋଳ ଲାଗିଥିଲା। ଏନେଇ ରାମ ଓ ତା ସହିତ ଆସିଥିବା ଅନ୍ୟଜଣେ ଯୁବକ ବଉଳା ଫାଣ୍ଡିକୁ ଅଭିଯୋଗ କରିବାକୁ ଯାଇଥିବାବେଳେ ଚଞ୍ଚକପଡ଼ା ଗ୍ରାମର ଶତାଧିକ ମହିଳା ବଉଳା ଫାଣ୍ଡି ଘେରାଉକରି ଅଭିଯୁକ୍ତ ଯୁବକକୁ ଲୋକକୁ ହସ୍ତାନ୍ତର କରିବାକୁ ଦାବି କରିଥିଲେ।

ଫାଣ୍ଡି ଅଧିକାରୀ ଜଗବନ୍ଧୁ ନାୟକ ଯେତେ ପ୍ରକାର ବୁଝାଇବାକୁ ଚେଷ୍ଟା କରିଥିଲେବି ସଫଳ ହୋଇ ନଥିଲେ । ଖବରପାଇ ସୋସୋ ଥାନା ଆଇଆଇସି ଘଟଣାସ୍ଥଳରେ ପହଞ୍ଚି ବୁଝାସୁଝା କରିବାପରେ ମହିଳାମାନେ ହଟିଥିଲେ। ପୀଡିତାଙ୍କ ପରିବାର ଲୋକଙ୍କ ଅଭିଯୋଗ ଆଧାରରେ ପୁଲିସ ଏକ ମାମଲା ରୁଜୁକରି ଅଭିଯୁକ୍ତ ରାମ ହୋକୁ ଗିରଫ କରିଛି।