ଝିଅକୁ ଶାଶୂଘରେ ଛାଡ଼ି ଘରକୁ ଫେରିବା ବାଟରେ ଓଲଟିଲା ପିକଅପ୍ ଭ୍ୟାନ୍: ଜଣେ ମୃତ, ୧୬ ଗୁରୁତର

ଖଲ୍ଲିକୋଟ: କାଲି ଥିଲା ଝିଅର ବାହାଘର। ଝିଅକୁ ଶାଶୂଘରେ ଛାଡ଼ି ସଂପର୍କୀୟମାନେ ଯାଇଥିଲେ। ସେମାନେ ଝିଅକୁ ଛାଡ଼ି ଫେରିବା ବାଟରେ ଚାଲିଥିଲା ରାମାୟଣ ଯାତ୍ରା। ଏହି ଯାତ୍ରା ଦେଖିବାକୁ ସେମାନେ ଅଟକିଗଲେ। ଯାତ୍ରା ଦେଖି ଭୋର ସମୟରେ ସେମାନେ ଗାଁକୁ ଏକ ମହିନ୍ଦ୍ରା ପିକଅପ୍ ଭ୍ୟାନରେ ଫେରୁଥିଲେ। ହେଲେ ଗଞ୍ଜାମ ଜିଲ୍ଲା ବେଗୁନିଆପଡ଼ା ଥାନା କେ ବରିଡ଼ା ଛକରେ ଉକ୍ତ ପିକଅପ୍ ଭ୍ୟାନ୍ ଓଲଟିଯାଇଥିଲା।

ଏହା ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ଘଟିଥିବା ବେଳେ, ୧୬ଜଣ ଆହତ ହୋଇଛନ୍ତି। ସମସ୍ତ ମୃତାହତ ଖୋର୍ଦ୍ଧା ବାଣପୁର ଅଞ୍ଚଳର ସୂଚନା। ମୃତକଙ୍କ ପରିଚୟ ମିଳିଛି। ସେ ହେଲେ ପ୍ରଭାସ କୁମାର ପ୍ରଧାନ। ଘଟଣାସ୍ଥଳରେ ବେଗୁନିଆପଡ଼ା ଥାନା ପୁଲିସ ପହଞ୍ଚି ସମସ୍ତଙ୍କୁ ଉଦ୍ଧାର କରି ଖଲ୍ଲିକୋଟ ଡାକ୍ତରଖାନାରେ ଭର୍ତ୍ତି କରିଛି। ଏନେଇ ପୁଲିସ ଘଟଣାର ତଦନ୍ତ ବି ଆରମ୍ଭ କରିଛି।