ଖଣିରେ ଦୁର୍ଘଟଣା, କର୍ମଚାରୀଙ୍କ ମୃତ୍ୟୁ

କାଳିଆପାଣି : କାଳିଆପାଣି ଥାନା ଫେକର କଲରଙ୍ଗିଅତ୍ତା କ୍ରୋମାଇଟ୍‌ ଖଣିରେ ଆଜି ଦୁର୍ଘଟଣା ଘଟି ଠିକା ଖଣି ସୁପରଭାଇଜରଙ୍କ ମୃତ୍ୟୁ ହୋଇଛି। ମୃତକ ଜଣକ ଭଦ୍ରକ ଜିଲ୍ଲା ଧୁଷୁରି ଥାନା ସାହୁସାହି ଗାଁର ନାରାୟଣ ସାହୁଙ୍କ ପୁଅ କାଳନ୍ଦୀ(୫୫) ବୋଲି ସୂଚନା ମିଳିଛି। ପୂର୍ବାହ୍ଣ ସାଢ଼େ ୧୧ଟା ସମୟରେ ଅସାବଧାନତାରୁ ଡିଜେଲ ଭରିବାକୁ ଆସିଥିବା ଏକ ହାଇୱା ତାଙ୍କ ଅଣ୍ଟା ଉପରେ ଚଢ଼ି ଯାଇଥିଲା। ଖଣିରେ ପ୍ରାଥମିକ ଚିକିତ୍ସା ପରେ କାଳନ୍ଦୀଙ୍କୁ ତୁରନ୍ତ କଳିଙ୍ଗନଗର ଟାଟା ମେଡିକା ଡାକ୍ତରଖାନାକୁ ନିଆଯାଇଥିଲା।

ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ମୃତ୍ୟୁକୁ ନେଇ ସଂଧ୍ୟା ସୁଦ୍ଧା ଥାନାରେ ଏତଲା ଦାଏର ହୋଇନଥିବା ଥାନା ଅଧିକାରୀ ସୁଶାନ୍ତ କୁମାର ଦାସ କହିଛନ୍ତି।  ଏ ନେଇ ଖଣି ସୁରକ୍ଷା ନିର୍ଦ୍ଦେଶାଳୟକୁ ଅବଗତ କରାଯାଇଥିବା କମ୍ପାନି ପକ୍ଷରୁ କୁହାଯାଇଛି।