ଟ୍ରକ-ବାଇକ୍‌ ଧକ୍କା, ଯୁବକ ମୃତ

ପାଟଣା: କେନ୍ଦୁଝର ଜିଲ୍ଲା ପାଟଣା ଥାନା ପୁଟୁଳିଆ ମାଧପୁରଛକ ବୁଲାଣି ନିକଟରେ ଟ୍ରକ୍‌ ଓ ବାଇକ୍‌ ମଧ୍ୟରେ ଧକ୍କା ହେବାରୁ ବାଇକ୍‌ ଆରୋହୀଙ୍କ ମୃତ୍ୟୁ ଘଟିଛି। ମୃତକ ଜଣଙ୍କ ହେଲେ ପାଟଣା ବ୍ଲକ୍‌ ଖୁଣ୍ଟାପଡ଼ା ଗ୍ରାମର ଜୀବନଜ୍ୟାତି ମହାନ୍ତ (୨୨)। ପାଟଣା ଆଡ଼ୁ ଦ୍ରୁତଗତିରେ ଏକ ୧୨ ଚକିଆ ଟ୍ରକ୍‌ ଆସୁଥିଲା। ନିଜ ଗ୍ରାମରୁ ଜୀବନଜ୍ୟୋତି ଏକ ବାଇକ୍‌ରେ ପାଟଣା ଅଭିମୁଖେ ଯାଉଥିଲେ। ମାଧପୁର ଛକ ବୁଲାଣି ନିକଟରେ ବାଇକ୍‌ ଓ ଟ୍ରକ୍‌ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଜୀବନଜ୍ୟୋତି ବାଇକ୍‌ରୁ ଛିଟିକି ପଡ଼ି ଗୁରୁତର ହୋଇଥିଲେ।

ତାଙ୍କୁ ତୁରନ୍ତ ପାଟଣା ଡାକ୍ତରଖାନା ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ପାଟଣା ଥାନା ଅଧିକାରୀ ମନୋରଞ୍ଜନ ପ୍ରଧାନ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବାଇକ୍‌ ଓ ଟ୍ରକ୍‌କୁ ଜବତ କରି ତଦନ୍ତ ଆରମ୍ଭ କରିଛନ୍ତି। ଟ୍ରକ୍‌ ଚାଳକକୁ ପୁଲିସ ଅଟକ ରଖିଛି। ଜୀବନଜ୍ୟୋତି ଜଣେ ଭଲ କ୍ରିକେଟ୍‌ ଖେଳାଳି ଥିଲେ। ତାଙ୍କ ଅକାଳ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।