ଓଡ଼ିଆ ସିନେମାର ନାୟିକାଙ୍କ ବିରୋଧରେ ସଂଗୀନ ଅଭିଯୋଗ ଆଣିଲେ ବିଶାଖାପାଟଣାର ଯୁବକ
ଭୁବନେଶ୍ୱର: ଜନୈକା ଓଡ଼ିଆ ନାୟିକା ତଥା ପ୍ରଯୋଜିକାଙ୍କ ନାମରେ ସଙ୍ଗୀନ ଅଭିଯୋଗ ଆଣିଛନ୍ତି ବିଶାଖାପାଟଣାର ପଦ୍ମରାଜୁ ରବିକୁମାର। ନାୟିକା ତାଙ୍କ ସହ ଭଲପାଇବାର ନାଟକ କରି ଲକ୍ଷାଧିକ ଟଙ୍କା , ସୁନା ଗହଣା ଓ ଲାପଟପ୍ ଭଳି ଦାମୀ ଉପହାର ନେଇ ଠକି ଦେଇଛନ୍ତି ବୋଲି ପୁଲିସ ଡିଜିଙ୍କୁ ଇ-ମେଲ୍ କରି ଜଣାଇଛନ୍ତି ରବିକୁମାର। ମାତ୍ର ଏହି ଅଭିଯୋଗକୁ ଖଣ୍ଡନ କରିଛନ୍ତି ନାୟିକା । ଉଲ୍ଲେଖଯୋଗ୍ୟ କି ସେ ଦୁଇଟି ଓଡ଼ିଆ ଛବିରେ ନାୟିକା ହେବା ସହ ପ୍ରଯୋଜନା ମଧ୍ୟ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ରବିକୁମାରଙ୍କ କହିବା ଅନୁସାରେ ମାଟ୍ରିମୋନି ସାଇଟରୁ ଅଭିନେତ୍ରୀଙ୍କ ସହ ତାଙ୍କର ପରିଚୟ ହୋଇଥିଲା । ଏହାପରେ ଦୁହିଁଙ୍କ ମଧ୍ୟରେ ସଂପର୍କ ଗଢ଼ିଉଠିଥିଲା। ପରସ୍ପରକୁ ବିବାହ କରିବେ ବୋଲି କଥା ଛିଡ଼ିଥିଲା। ଏହି କାରଣରୁ ରବିକୁମାର ତାଙ୍କୁ ବିଭିନ୍ନ ସମୟରେ ଦାମୀ ଉପହାର ଓ ଟଙ୍କା ଦେଉଥିଲେ।
ଅଭିନେତ୍ରୀ ତାଙ୍କଠାରୁ ପର୍ଯ୍ୟାୟକ୍ରମେ ଲକ୍ଷାଧିକ ଟଙ୍କା, ସୁନାଚେନ୍ ଓ ଲାପଟପ୍ ନେଇଯାଇଥିବା ଅଭିଯୋଗ କରିଛନ୍ତି ପ୍ରେମିକ ରବିକୁମାର । ତେବେ ସବୁକିଛି ଠିକଠାକ ଚାଲିଥିଲା ବେଳେ ବିବାହ ପାଇଁ ରବିକୁମାର ଯେତେବେଳେ ପ୍ରସ୍ତାବ ଦେଲେ ତା’ପରେ ବିଭିନ୍ନ ବାହାନା ଦେଖାଇ ବିବାହ ପ୍ରସ୍ତାବକୁ ଏଡାଇ ଯାଇଥିଲେ ।
ଏହାପରେ ନାୟିକା-ପ୍ରଯୋଜିକାଙ୍କ ବାବଦରେ ଖୋଳତାଡ କରିଥିଲେ ରବିକୁମାରଙ୍କ ପରିବାର। ଏହାପରେ ଜାଣିବାକୁ ପାଇଥିଲେ ଯେ ଅଭିନେତ୍ରୀ ବିବାହ ଲାଗି ଆଗ୍ରହୀ ନୁହନ୍ତି । ବିବାହ ପ୍ରସ୍ତାବକୁ ଖଣ୍ଡନ କରିବା ପରେ ଉପହାର ସ୍ୱରୁପ ତାଙ୍କୁ ଦେଇଥିବା ଟଙ୍କା, ସୁନା ଚେନ ଓ ଲାପଟପ୍ ଫେରସ୍ତ ମାଗିଛନ୍ତି ରବିକୁମାର । ହେଲେ ଏସବୁ ଫେରାଇବା ବଦଳରେ ଅଭିନେତ୍ରୀ ତାଙ୍କୁ ପ୍ରତାରଣା କରିଥିବା ଓଡ଼ିଶା ପୁଲିସକୁ ଜଣାଇଛନ୍ତି ବିଶାଖାପାଟଣାର ଯୁବକ ରବିକୁମାର । ସେପଟେ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ଅଭିନେତ୍ରୀ । ସେ କହିଛନ୍ତି, ବନ୍ଧୁତାକୁ ଏଭଳି ଭାବେ ଚିତ୍ରିତ କରି ତାଙ୍କ ନାମରେ ମିଥ୍ୟା ଅଭିଯୋଗ ଆଣିଛନ୍ତି ରବିକୁମାର।