ନିର୍ବାଚନ ପ୍ରଚାରରେ ଭଣ୍ଡାରିପୋଖରୀରେ ଅଭିନେତ୍ରୀ ରିୟାଙ୍କ ରୋଡ୍‌ ସୋ ଲିଉଡ୍‌ ଷ୍ଟାର୍‌

ଭଣ୍ଡାରିପୋଖରୀ: ବିଜେଡି ପ୍ରାର୍ଥୀଙ୍କ ସପକ୍ଷରେ ସମର୍ଥନ ଜୁଟାଇବା ପାଇଁ ସିନେ ଅଭିନେତ୍ରୀଙ୍କ ପ୍ରଚାର। ପୂର୍ବରୁ ସିନେ ତାରକା ଏଲିନା ଚାନ୍ଦବାଲି ଓ ତିହିଡ଼ି ବ୍ଲକରେ ନିର୍ବାଚନୀ ପ୍ରଚାର କରିଥିବା ବେଳେ ଗତକାଲି ବର୍ଷା ପ୍ରିୟଦର୍ଶିନୀ ଭଦ୍ରକ ବ୍ଲକରେ ବିଜେଡି ପ୍ରାର୍ଥୀଙ୍କ ପାଇଁ ରୋଡ୍‌ ସୋ’ କରିଥିଲେ। ସୋମବାର ଦିନ ଭଣ୍ଡାରିପୋଖରୀ ବ୍ଲକର ବିଭିନ୍ନ ପଞ୍ଚାୟତରେ ଅଭିନେତ୍ରୀ ରିୟା ଦେ ଏକ ବାଇକ୍‌ ରାଲିରେ ବିଜେଡି ସମର୍ଥିତ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିଛନ୍ତି।

ଭଣ୍ଡାରିପୋଖରୀ ବ୍ଲକର ୨୩ଟି ପଞ୍ଚାୟତରେ ଆସନ୍ତା ୧୮ ତାରିଖରେ ନିର୍ବାଚନ ଅନୁଷ୍ଠିତ ହେଉଛି। ବିଭିନ୍ନ ଦଳର ପ୍ରାର୍ଥୀମାନେ ପ୍ରଚାରକୁ ଜୋରଦାର କରିଥିବା ବେଳେ ସିନେତାରକାଙ୍କ ଉପସ୍ଥିତି ପ୍ରଚାରକୁ ଆହୁରି ସରଗରମ କରିଛି। ନେରଡ଼ା ପଞ୍ଚାୟତଠାରେ ଅଭିନେତ୍ରୀ ରିୟା ଏକ ବାଇକ୍‌ ରାଲିରେ ବିଜେଡି ସମର୍ଥିତ ଜିଲ୍ଲା ପରିଷଦ ପ୍ରାର୍ଥୀ ବଦ୍ରିନାରାୟଣ ରାଉତ, ସରପଞ୍ଚ ପ୍ରାର୍ଥୀ ଦେବଦାସୀ ଜେନା ଓ ସମିତି ସଭ୍ୟ ପ୍ରାର୍ଥୀ ରାଜକିଶୋର ଜେନାଙ୍କ ପାଇଁ ପ୍ରଚାର କରିଛନ୍ତି। ଏଥିସହିତ ଟିକରା, ଆଖୁଆପଦା, ଡାହାଲା, ମିଟୁଆଣି, ବେଲପୋଖରୀ, ନେରଡ଼ା, ଯଶୋଟିକିରି ଅଞ୍ଚଳରେ ପ୍ରାର୍ଥୀମାନଙ୍କ ସପକ୍ଷରେ ଭୋଟ୍‌ ଦେବାକୁ ରିୟା ନିବେଦନ କରିଥିଲେ। ରୋଡ୍‌ ସୋ’ରେ ଜିଲ୍ଲା ଯୁବ ବିଜେଡି ସମ୍ପାଦକ ବିରଞ୍ଚି ନାରାୟଣ ରାଉତ, ବରିଷ୍ଠ ବିଜେଡି ନେତା ଶରତଚନ୍ଦ୍ର ଜେନା, ବସନ୍ତ ବେହେରା, ସୌମ୍ୟରଞ୍ଜନ ଜେନା, ଦିଲ୍ଲୀପ ପୃଷ୍ଟି, ମୁକ୍ତିକାନ୍ତ ମହାନ୍ତି, ସୁବ୍ରତ ବେହେରାଙ୍କ ସମେତ ଶତାଧିକ ବିଜେଡି କର୍ମୀ ଯୋଗ ଦେଇଥିଲେ।