ଥାନା ହାଜତରେ ୩ ଦିନ ନାବାଳକ: ତଦନ୍ତ କରିଵେ ଅତିରିକ୍ତ ଏସ୍ ପି ପାହ୍ୟାର ଅଧିକାରୀ
କଟକ: କଟକ ବଡ଼ ଡାକ୍ତରଖାନା ମେଡିକାଲ୍ ଫାଣ୍ଡି ହାଜତରେ ଜଣେ ନାବାଳକଙ୍କୁ ପୁଲିସ ତିନିଦିନ ଅଟକ ରଖିବା ଘଟଣାର ଜଣେ ଅତିରିକ୍ତ ଏସ୍ ପି ପାହ୍ୟାର ଅଧିକାରୀ ତଦନ୍ତ କରିଵେ ବୋଲି ଜଣାଯାଇଛି। ଏନେଇ ସୂଚନା ଦେଇଛନ୍ତି ଡିସିପି ପ୍ରତୀକ ସିଂହ।
ସୂଚନାଯୋଗ୍ୟ, କଟକ ବଡ଼ ଡାକ୍ତରଖାନା ମେଡିକାଲ୍ ଫାଣ୍ଡି ହାଜତରେ ଜଣେ ନାବାଳକଙ୍କୁ ପୁଲିସ ତିନିଦିନ ଅଟକ ରଖିବା ଭଳି ଚାଞ୍ଚଲ୍ୟକର ଅଭିଯୋଗ ଆଜି ସାମ୍ନାକୁ ଆସିଛି। ସିଡବ୍ଲୁସି ଏଭଳି ଅଭିଯୋଗ ଆଣିଛି। ଆଜି ନାବାଳକଙ୍କୁ ହାଜର କରାଯାଇ ବୟାନ ରେକର୍ଡ କରାଯିବା ସହିତ ପୁଲିସ ବିରୋଧରେ ଏତଲା ଦେବ ସିଡବ୍ଲୁସି। ସିଡବ୍ଲିସିର ସୂଚନା ଅନୁଯାୟୀ, ଝାଡ଼ଖଣ୍ଡ ସାହେବଗଞ୍ଜ ଥାନା ରାଜମଲ ତିନିପାହାଡ଼ ଅଞ୍ଚଳର ଜଣେ ୧୨ ବର୍ଷୀୟ ନାବାଳକଙ୍କୁ କାବୁ କରି ବଡ଼ ଡାକ୍ତରଖାନା ମେଡିକାଲ୍ ଫାଣ୍ଡିରେ ଗଲା ତିନିଦିନ ହେବ ରଖାଯାଇଥିଲା। ଏହି ନାବାଳକ ଅନ୍ୟ କିଛି ଦୁର୍ବୃତ୍ତଙ୍କ ସହିତ ମିଶି ମୋବାଇଲ୍ ଚୋରି ଭଳି କାରବାରରେ ସମ୍ପୃକ୍ତ ଥିବା ଅଭିଯୋଗ ଥିଲା।
Sambad is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ, ନାବାଳକ ଜଣକ ତିନୋଟି ମୋବାଇଲ୍ ଚୋରି କରି ଅନ୍ୟ ଜଣେ ଦୁର୍ବୃତ୍ତକୁ ଦେଇଥିଲେ। ଏହାପରେ, ପୁଲିସ ଏହି ନାବାଳକଙ୍କୁ କାବୁ କରି ଗଲା ତିନିଦିନ ହେବ ମେଡିକାଲ୍ ଫାଣ୍ଡି ହାଜତ ଭିତରେ ଅଟକ ରଖିଥିଲା।
ଗତକାଲି ଏ ସଂକ୍ରାନ୍ତରେ ଚାଇଲ୍ଡ ଲାଇନ୍ ଖବର ପାଇବା ପରେ ଦିନ ପ୍ରାୟ ୧ଟା ବେଳେ ଚାଇଲ୍ଡଲାଇନ୍ ପକ୍ଷରୁ ସଦସ୍ୟ ଆର୍. ଡୋନାଲ୍ଡ ବେହେରା ପହଞ୍ଚି ଘଟଣାର ସତ୍ୟାସତ୍ୟ ଯାଞ୍ଚ କରିଥିଲେ। ନାବାଳକ ହାଜତ ଭିତରେ ବସିଥିବା ବେଳେ ବାହାର ପଟୁ ତାଲା ପଡ଼ିଥିବା ଦେଖିବାକୁ ମିଳିଥିଲା। ଏହି ମାମଲାରେ ଉଭୟ ସିଡବ୍ଲୁସି ଓ ଚାଇଲ୍ଡଲାଇନ୍ ହସ୍ତକ୍ଷେପ କଲା ପରେ ହଟଚମଟ ସୃଷ୍ଟି ହୋଇଥିଲା।