କେନ୍ଦୁଝରରେ ପୁଣି ୧୦୫ କରୋନା ସଂକ୍ରମିତ ଚିହ୍ନଟ
କେନ୍ଦୁଝର : ଦିନକୁଦିନ ଦ୍ରୁତଗତିରେ କେନ୍ଦୁଝର ଜିଲ୍ଲାରେ କରୋନା ସଂକ୍ରମଣ ବଢିବାରେ ଲାଗିଥିବାବେଳେ ପୁଣି ୧୦୫ ଜଣ ଚିହ୍ନଟ ହୋଇଛନ୍ତି। ଏହି ୧୦୫ଙ୍କୁ ମିଶାଇ କେନ୍ଦୁଝର ଜିଲ୍ଲାରେ କରୋନା ସଂକ୍ରମିତଙ୍କ ସଂଖ୍ୟା ୮ ହଜାର ୫୫୪ରେ ପହଞ୍ଚିଛି ବୋଲି ଜିଲ୍ଲାପାଳ ଆଶିଷ ଠାକରେ ଶୁକ୍ରବାର ଦିନ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ, ଜିଲ୍ଲାରେ ମୋଟ ୩୬୮ଟି ଆକ୍ଟିଭ କେସ ରହିଛି। ସେମାନଙ୍କ ମଧ୍ୟରୁ ୩୫୨ ଜଣ ଘରୋଇ ସଙ୍ଗରୋଧରେ ଅଛନ୍ତି । ଆଉ ୧୪ ଜଣ କୋଭିଡ କେୟାର ସେଣ୍ଟରେ ଅଛନ୍ତି । ରାଙ୍କିରେ ଥିବା କୋଭିଡ ହସ୍ପିଟାଲରେ ୧୮୦ ବେଡର ବ୍ୟବସ୍ଥା ହୋଇଛି । ଆଉ ଅଧିକ ବେଡର ବ୍ୟବସ୍ଥା କରାଯାଉଛି। ଏଥିରେ ୨୮ଟି ଆଇସିୟୁ ବେଡ ରହିଥିବା ବେଳେ ୨୪ଟି ସେମି ଆଇସିୟୁ ବେଡ଼୍ ରହିଛି। ୧୨ଟି ଭେଣ୍ଟିଲେଟର ବେଡ ରହିଛି । ୪୦ଟି ଅକ୍ସିଜେନ ବେଡ ରହିଛି । ଅବଶିଷ୍ଟ ବେଡକୁ ଅକ୍ସିଜେନ ବେଡରେ ପରିଣତ କରିବାର ବ୍ୟବସ୍ଥା କରାଯାଉଛି। କୋଭିଡ ହସ୍ପିଟାଲରେ ଅକ୍ସିଜେନ ବହୁ ପରିମାଣର ଗଚ୍ଛିତ ରଖାଯାଇଛି। ଟାଟା କୋଭିଡ ହସ୍ପିଟାଲ ମଧ୍ୟ ପ୍ରଶାସନର ନିୟନ୍ତ୍ରଣରେ ଅଛି । ସେଠାରେ ଥିବା ୫୦ ବେଡ ମଧ୍ୟରୁ ୧୦ଟି ଆଇସିୟୁ ବେଡ ଓ ୬ଟି ଭେଣ୍ଟିଲେଟର ବେଡ ରହିଛି ବୋଲି ଜିଲ୍ଲାପାଳ ଶ୍ରୀ ଠାକରେ ପ୍ରକାଶ କରିଛନ୍ତି ।
ସେହିପରି ଶନିବାରଠାରୁ ଜିଲ୍ଲାର ସମସ୍ତ ସହରାଞ୍ଚଳ କେନ୍ଦୁଝର, ବଡବିଲ, ଯୋଡା, ଚମ୍ପୁଆ ଏବଂ ଆନନ୍ଦପୁର ପୌରାଞ୍ଚଳରେ ନାଇଟ କର୍ଫ୍ୟୁ ଲାଗୁ ହେବ। ରାତି ୯ଟାରୁ ସକାଳ ୫ଟା ପର୍ଯ୍ୟନ୍ତ ଏହା ବଳବତ୍ତର ରହିବ । ଏହି ସମୟ ମଧ୍ୟରେ ଜରୁରୀକାଳୀନ ସେବା କରୁଥିବା ବ୍ୟକ୍ତିବିଶେଷ ତାଙ୍କର ଆଇଡେଣ୍ଟି ପ୍ରୁଫ୍ ଦେଖାଇ କାମ କରିପାରିବେ । ଆସନ୍ତା ୧୯ ତାରିଖରୁ ସମସ୍ତ ସ୍କୁଲ କଲେଜ, କୋଚିଂ ସେଣ୍ଟର ବନ୍ଦ ରହିବ। ପାଠପଢା କେବଳ ଅନଲାଇନରେ ହୋଇପାରିବ। ହଷ୍ଟେଲରେ ମଧ୍ୟ ଛାତ୍ରଛାତ୍ରୀ ରହିପାରିବେ ନାହିଁ । ସିନେମାହଲ ୫୦ ପ୍ରତିଶତ ଦର୍ଶକଙ୍କୁ ନେଇ ଚାଲିବ । ବାହାଘରରେ ୫୦ ଓ ଶୁଦ୍ଧିକ୍ରିୟାରେ ୨୦ ଜଣ ଲୋକରୁ ଅଧିକ ଯୋଗଦାନ ଦେଇପାରିବେ ନାହିଁ । ଶୋଭାଯାତ୍ରା, ପ୍ରୋସେସନକୁ ଅନୁମତି ଦିଆଯିବ ନାହିଁ । ବସରେ କେବଳ ସିଟ୍ ଅନୁଯାୟୀ ଯାତ୍ରୀ ଯାତ୍ରା କରିପାରିବେ । କୌଣସି ଯାତ୍ରୀ ଛିଡ଼ା ହୋଇ ଯାଇପାରିବେ ନାହିଁ । ରେଷ୍ଟୁରାଣ୍ଟ ରାତି ୯ଟା ପର୍ଯ୍ୟନ୍ତ ଖୋଳିବ । କରୋନା କଟକଣାକୁ କଡ଼ାକଡି ଭାବେ ପାଳନ କରାଯିବ ବୋଲି ଶ୍ରୀ ଠାକରେ ପ୍ରକାଶ କରିଛନ୍ତି।