ସମ୍ବଲପୁର/ବୁର୍ଲା: ଭତ୍ତା ବୃଦ୍ଧି, ପେନସନ୍, ମିନି ଅଙ୍ଗନବାଡି କର୍ମୀଙ୍କୁ କର୍ମୀର ମାନ୍ୟତା, କର୍ମୀ ଓ ସହାୟିକାଙ୍କୁ ଶ୍ରମିକର ମାନ୍ୟତା, ସେବା ନିବୃତ କର୍ମୀ ତଥା ମୃତ୍ୟୁ ବରଣ କରିଥିବା କର୍ମୀ ପରିବାର ବର୍ଗଙ୍କୁ ୫ ଲକ୍ଷ ସହାୟତା ଦେବା ଦାବିରେ ଆସନ୍ତା ମାର୍ଚ୍ଚ ୧୩ ତାରିଖରୁ ଅଙ୍ଗନବାଡ଼ି କର୍ମୀ ଓ ସହାୟିକାମାନେ ଅନିର୍ଦ୍ଦିଷ୍ଟ କାଳ ଦିବାରାତ୍ର ଆନ୍ଦୋଳନକୁ ଓହ୍ଲେଇବେ। ରବିବାର ସମ୍ବଲପୁର ସାମ୍ବାଦିକ ସଂଘଠାରେ ପଶ୍ଚିମ ଓଡିଶା ଅଙ୍ଗନବାଡି କର୍ମୀ ଓ ସହାୟିକା ସଂଘ ନେତୃତ୍ବରେ ଅନୁଷ୍ଠିତ ପଶ୍ଚିମ ଓଡିଶାସ୍ତରୀୟ ପରିବର୍ଦ୍ଧିତ କାର୍ଯ୍ୟକାରିଣୀ ସଭାରେ ଏହି ନିଷ୍ପତ୍ତି ହୋଇଛି।

Advertisment

ବରିଷ୍ଠ ଉପସଭାପତି ରୁକ୍ମିଣୀ ଜୁଆଡିଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ସାଧାରଣ ସମ୍ପାଦକ ପ୍ରଭାସିନୀ ପାଢୀ, ଲିଲି ମିଶ୍ର, ଦିଶିଲା ଧୁରୁଆ, ବାଳକୃଷ୍ଣ ଭୋଇ, ପ୍ରମିଳା ସିଂହ, କ୍ଷିତିସୁତା ମିଶ୍ର, କନକ ପ୍ରଧାନ, ରଞ୍ଜିତା କେର‌େକଟା, ନିତମ୍ବ ଦାସ ପ୍ରମୁଖ ଏହି ନିଷ୍ପତ୍ତି ନେଇଥିଲେ। ଏହାପରେ ଏକ ସାମ୍ବାଦିକ ସମ୍ମିଳନୀରେ କହିଥିଲେ, ସରକାର ପୂର୍ବରୁ ଯାହା ଭତ୍ତା ବୃଦ୍ଧି କରିଛନ୍ତି ତାହା ସମୁଦ୍ରକୁ ଶଙ୍ଖେ। ଦରଦାମ୍ ଯେଭଳି ବଢ଼ିବଢ଼ି ଚାଲିଛି ସେଥିରେ ଚଳିବା କଷ୍ଟକର। ଅପରପକ୍ଷରେ ଦୈନନ୍ଦିନ କାର୍ଯ୍ୟ ଭାର ବଢି ବଢି ଚାଲିଛି। ତେଣୁ ଶ୍ରମ ସମିଳନୀରେ ୨୬ ହଜାର ଭତ୍ତା, ଅବସର ବୟସ ୬୫ କରିବା, ଗ୍ରାମ କଲ୍ୟାଣ ସମିତିରୁ ବାଦ ଦେବା ପାଇଁ ସଂଘ ଦାବି କରି ଆସୁଛି। ସରକାର ତୁରନ୍ତ ସମସ୍ୟାର ସମାଧାନ ନକଲେ ୧୩ ମାର୍ଚ୍ଚରୁ ଅଙ୍ଗନବାଡି କର୍ମୀ ଓ ସହାୟିକା ଆନ୍ଦୋଳନ କରିବେ ବୋଲି ସୂଚନା ଦେଇଥିଲେ।